வெடிகுண்டுகள் வீசி ரவுடி வெட்டிக் கொலை.. முன்விரோதம் காரணமா என போலீசார் தீவிர விசாரணை!!

புதுச்சேரி மேட்டுப்பாளையம் சண்முகாபுரம் வடக்கு பாரதிபுரத்தை சேர்ந்தவர் பன்னீர்செல்வம் (24). பிரபல ரவுடியான இவர் மீது பல்வேறு வழக்குகள் நிலுவையில் உள்ளன.

மர்ம கும்பல்:

இந்த நிலையில், நள்ளிரவு நண்பர் சக்தி (20) என்பவருடன் தனது வீட்டில் பன்னீர்செல்வம் மது குடித்துக் கொண்டிருந்ததாக கூறப்படுகிறது. அப்போது மோட்டார் சைக்கிள்களில் திடீரென்று ஒரு மர்ம கும்பல் வந்து பன்னீர்செல்வம் வீட்டுக்குள் புகுந்தனர்.

சரமாரி அரிவாள் வெட்டு:

அவர்களை பார்த்ததும் பன்னீர்செல்வமும், சக்தியும் அங்கிருந்து தப்பி ஓட முயன்றனர். ஆனால் மர்மகும்பல் 2 நாட்டு வெடிகுண்டுகளை வீசி பன்னீர்செல்வம், அவரது கூட்டாளி சக்தி ஆகியோரை அரிவாளால் சரமாரியாக வெட்டி விட்டு தப்பியோடியது.

போலீசார் வழக்குப்பதிவு:

இதில் பலத்த காயமடைந்த இருவரையும் அங்கிருந்தவர்கள் மீட்டு , ஜிப்மர் மருத்துவமனைக்கு கொண்டு சென்றனர். ஆனால் அங்கு சிகிச்சை பலனின்றி ரவுடி பன்னீர்செல்வம் உயிரிழந்தார். மேலும் அவரது கூட்டாளியான சக்திக்கு சிகிச்சை அளிக்கப்பட்டு வருகிறது. இக்கொலை குறித்து, போலீசார் வழக்குப்பதிவு செய்து, தப்பியோடிய மர்ம கும்பலை தேடி வருகின்றனர்.

போலிசார் விசாரணை:

கொலை செய்யப்பட்ட பன்னீர்செல்வம் மீது பல்வேறு வழக்குகள் நிலுவையில் உள்ளதால் முன் விரோதம் காரணமாக இந்த கொலை சம்பவம் நடந்திருக்கலாம் என்ற கோணத்தில் போலிசார் விசாரணை மேற்கொண்டு வருகின்றனர்.