சீனாவை முறியடிக்கதான் இலங்கைக்கு உதவுகிறதா இந்தியா?!!!

இலங்கை இந்த ஆண்டின் நடுப்பகுதியில், அதனது வரலாற்றில் மிக மோசமான பொருளாதார நெருக்கடியை எதிர்கொண்டபோது, ​​இந்தியா தனது அண்டை நாடுக்கு உதவி அதனுடைய தாராள மனதை வெளிப்படுத்தியது.  இலங்கையில் எரிபொருள், மருந்துகள் மற்றும் உணவுப் பொருட்கள் தட்டுப்பாடு மற்றும் அரசாங்க ஊழல் போன்றவற்றால் உள்நாட்டுப் போர் போன்ற சூழ்நிலைக்கு மத்தியில், இந்தியா அண்டை நாட்டிற்கு அனைத்து உதவிகளையும் அனுப்பியது. 

ஜனவரி முதல் ஜூலை வரை மட்டும் கணக்கிட்டால் கூட, இந்தியா சுமார் சுமார் 33 ஆயிரம் கோடி ரூபாய் உதவியை இலங்கைக்கு அனுப்பியுள்ளது. இவை வட்டியில்லா கடன்கள் முதல் நாணய பரிமாற்றம் வரை இருக்கும் என தெரிவிக்கப்பட்டுள்ளது.  இது தவிர, ஏற்றுமதிக்கான கட்டணத் தள்ளுபடி மற்றும் 22 மில்லியன் மக்களின் மருத்துவத் தேவைகளைப் பூர்த்தி செய்ய மருந்துகள் ஏற்றப்பட்ட போர்க்கப்பல்களும் அங்கு அனுப்பப்பட்டன. 

இந்தியா அனுப்பிய இந்த உதவி, அரசியல் குழப்பங்களுக்கு மத்தியில் இலங்கையில் நிலைமையை சீராக்குவதில் நீண்ட தூரம் சென்றது.  சர்வதேச நாணய நிதியத்திடம் இருந்து 2.9 பில்லியன் டாலர் கடனை செலுத்துவதற்கான இறுதி கட்டத்தில் இலங்கை இருப்பதால், இந்தியாவும் அதனுடன் பல திட்டங்களில் முதலீடு செய்து நாட்டை நெருக்கடியிலிருந்து விடுவிப்பதற்கான வழிகளை ஆலோசித்து வருகிறது. இலங்கையில் இந்தியாவின் இந்த முதலீட்டுத் திட்டங்கள் அதற்கு உதவுவது மட்டுமன்றி, இந்து சமுத்திரத்தில் அதிகரித்து வரும் சீனாவின் செல்வாக்கைக் கட்டுப்படுத்துவதற்கும் பயனுள்ளதாக இருக்கும் எனவும் அரசியல் வட்டாரங்கள் தெரிவிக்கின்றன.

இந்த மாத தொடக்கத்தில், இலங்கை வெளியுறவு அமைச்சர் அலி சப்ரியும் இந்தியாவில் இருந்து முதலீடு செய்ய விரும்புவதாக கூறியிருந்தார் என்பது இங்கு குறிப்பிடத்தக்கது.  தற்போது, ​​இந்தியாவிற்கும் இலங்கைக்கும் இடையில் சுமார் ஒரு பில்லியன் டாலர் முதலீடு குறித்து பேசப்பட்டு வருவதாகவும் செய்திகள் தெரிவிக்கின்றன.

-நப்பசலையார்

இதையும் படிக்க:   அமெரிக்க அதிபராகிறாரா எலான் மஸ்க்?!!!