இனி தனியார் பள்ளிகளில் 'தமிழ் பாடம் கட்டாயம்'...தனியார் பள்ளிகள் கூட்டமைப்பு அறிவுறுத்தல்!

சி.பி.எஸ்.இ. உள்ளிட்ட அனைத்து வகை பள்ளிகளிலும் 'தமிழ் பாடம் கட்டாயம்' என தனியார் பள்ளிகள் கூட்டமைப்பின் இயக்குனர் அறிவித்துள்ளார்.

தமிழ்நாட்டில் உள்ள பள்ளிகளில் 10-ம் வகுப்பு வரை தமிழ் கட்டாயம் என்ற சட்டம் அமலில் உள்ளது. இருப்பினும், கடந்த 2015 - 16-ஆம் கல்வி ஆண்டு முதல் இந்த சட்டம் படிப்படியாக நடைமுறை படுத்தப்பட்டு வருகிறது. அடுத்த மாதம் தொடங்க உள்ள 2023 - 24ம் கல்வி ஆண்டில், ஒன்பதாம் வகுப்பு வரையிலும், 2024 - 25ம் ஆண்டில், 10ம் வகுப்பு வரையிலும் தமிழ் மொழி பாடம் கட்டாயமாகிறது. இதுதொடர்பாக தனியார் பள்ளிகள் கூட்டமைப்பு வெளியிட்டுள்ள செய்திக்குறிப்பில், தமிழ்நாட்டில் செயல்படும் சி.பி.எஸ்.இ., உள்ளிட்ட அனைத்து தனியார் பள்ளிகளிலும், 2024 - 25ம் கல்வி ஆண்டில், 10ம் வகுப்பு வரை தமிழ் கட்டாய பாடமாக பயிற்றுவிக்க வேண்டும் என அறிவுறுத்தப்பட்டுள்ளது. 

இதையும் படிக்க : போதை ஆசாமிகளே, பாத்து பேசுங்க..! இனிமே ஓடவும் முடியாது....! ஒளியவும் முடியாது....!

மேலும், மாணவர்களுக்கு தமிழ் மொழியை திறம்பட கற்பிக்க தகுதியான ஆசிரியர்களை தனியார் பள்ளி நிர்வாகம் நியமிக்க வேண்டும் எனவும், 2024 – 25ஆம் கல்வி ஆண்டுக்குள் அனைத்து தனியார் பள்ளிகளும் 10-ஆம் வகுப்பு வரை தமிழ் கற்பிக்கப்படுவதை உறுதி செய்ய வேண்டும் எனவும் அறிவுறுத்தப்பட்டுள்ளது. பாடத் திட்டம் மற்றும் அதற்கான தேர்வு முறையை தனியார் பள்ளிகளின் இயக்குநர் நிர்ணயம் செய்வார் என்றும், 9 மற்றும் 10.ஆம் வகுப்புகளில் தமிழ் கூடுதல் மொழியாக கற்பிக்கப்பட வேண்டும் என்றும் தனியார் பள்ளிகள் கூட்டமைப்பு அறிவுறுத்தியுள்ளது.