சோனியா காந்தியும், ராகுல் காந்தியும் தலைவர் பதவியைத் தவிர்த்ததால் அவர்களது குடும்பத்தை சேர்ந்தவரல்லாது வேறு ஒருவர் தலைவராகப் பொறுப்பேற்கும் வாய்ப்பு ஏற்பட்டுள்ளது. இந்நிலையில் ராஜஸ்தான் முதலமைச்சர் அசோக் கெலாட் மற்றும் பாராளுமன்ற உறுப்பினரான சசி தரூர் இருவரும் காங்கிரஸ் கட்சியின் தேசிய தலைவருக்குப் போட்டியிடுவதாக தகவல்கள் வெளியாகி உள்ளன.
பாஜக ஆட்சியைப் பிடித்ததிலிருந்து காங்கிரஸ் தொடர் சரிவுகளை சந்தித்து வருகிறது. உள்கட்சியில் ஏற்படும் பிரச்சனைகள், கட்சி தாவல்கள் என காங்கிரஸின் பலம் நாளுக்கு நாள் குறைந்துக் கொண்டேயிருக்கிறது. ஆபரேஷன் தாமரையை செயல்படுத்தி காங்கிரஸ் கட்சியின் சட்டமன்ற உறுப்பினர்களை விலைக்கு வாங்கி கர்நாடகாவிலும் மத்திய பிரதேசத்திலும் ஆட்சியைக் கைப்பற்றியது பாஜக.
அதே பாணியில் ராஜஸ்தான் அரசையும் கவிழ்க்க நினைத்தது, ஆனால் அசோக் கெலாட் தனது சாமர்த்தியத்தால் அதிருப்தி எம்.எல்.ஏக்களை சமாதானம் செய்து பாஜகாவின் ஆபரேஷன் தாமரையைத் தோல்வியுற செய்தார். இதனால் ராகுல் காந்தி குடும்பத்தின் "நம்பிக்கை நாயகனாக" அசோக் கெலாட் இருப்பதால் கட்சியின் தலைவராகும் வாய்ப்பு அவருக்கே அதிகம் உள்ளதாக அரசியல் வட்டாரங்கள் தெரிவிக்கின்றன.
காங்கிரஸ் கட்சியின் தலைவர் பதவிக்கு ராஜஸ்தான் முதலமைச்சராக உள்ள அசோக் கெலாட் போட்டியிடும் நிலையில் காங்கிரஸ் கட்சியின் கொள்கையின்படி ஒருவர் ஒரு பதவியில் மட்டுமே இருக்க வேண்டும் என்பது விதி. இந்த விதியின்படி ஒருவேளை கெலாட் தலைவராக தேர்வாகும் பட்சத்தில், முதலமைச்சர் பதவியிலிருந்து அவர் விலக வேண்டும் என்று கூறப்படுகிறது. இதனையடுத்து, புதிய முதலமைச்சரை தேர்வு செய்வதற்கான காங்கிரஸ் எம்எல்ஏக்கள் கூட்டம், ஜெய்பூரில் உள்ள அசோக் கெலாட் இல்லத்தில் நேற்றிரவு நடைபெற்றது. இதில், ராஜஸ்தானின் புதிய முதலமைச்சராக சச்சின் பைலட் தேர்வு செய்யப்படுவார் என எதிர்பார்க்கப்பட்டது.
காங்கிரஸ் மூத்த தலைவர்கள் மல்லிகார்ஜுன கார்கே, அஜய் மக்கான் ஆகியோர் முன்னிலையில் நடைபெற்ற இக்கூட்டத்தை புறக்கணித்த அசோக் கெலாட் ஆதரவு எம்எல்ஏக்கள், சச்சின் பைலட்டுக்கு எதிராக போர்க்கொடி தூக்கினர். மேலும், அம்மாநில சபாநாயகர் சி.பி. ஜோஷியை 90 க்கும் அதிகமான காங்கிரஸ் எம்எல்ஏக்கள் சந்தித்து தங்களது ராஜினாமா கடிதத்தை வழங்கியுள்ளதாகவும் செய்திகள் வெளியாகின.
இதனையடுத்து, அசோக்கெலாட் ஆதரவு எம்எல்ஏக்களுடன் காங்கிரஸ் மூத்த தலைவர்கள் பேச்சுவார்த்தை நடத்த முயன்றனர். ஆனால் அவர்களை சந்திக்க மறுத்த காங்கிரஸ் எம்எல்ஏக்கள், அசோக்கெலாட்டே முதலமைச்சராக நீடிக்க வேண்டும் என கோரிக்கை விடுத்துள்ளனர். மேலும், அக்டோபர் 19ம் தேதி புதிய காங்கிரஸ் தலைவர் அறிவிக்கப்படும் வரை ராஜஸ்தானின் புதிய முதலமைச்சர் குறித்து முடிவு செய்யக்கூடாது என்றும் அவர்கள் வலியுறுத்தியுள்ளனர்.
இப்படிப்பட்ட சூழ்நிலையில் ராஜஸ்தானில் என்ன நடக்கிறது என்ற கேள்விகள் தொடர்ந்து எழுந்து வருகின்றன. கெலாட் ஆதரவு எம்.எல்.ஏ.க்கள் தங்கள் ராஜினாமா கடிதத்தை சபாநாயகரிடம் சமர்ப்பித்ததன் விளைவு என்ன? ராஜஸ்தானில் காங்கிரஸ் அரசுக்கு ஏதேனும் அச்சுறுத்தல் உள்ளதா? இது தவிர, சச்சின் பைலட் தனிமைப்படுத்தப்பட்டால், அவரது அடுத்த முடிவு என்ன? தெரிந்து கொள்வோம்...
தற்போது ராஜஸ்தானில் 200 சட்டமன்ற இடங்கள் உள்ளன. அதில் எந்த இடமும் காலியாக இல்லை. மாநிலத்தில் பெரும்பான்மை பெறுவதற்கான இலக்கு 101 எம்எல்ஏக்கள். காங்கிரசுக்கு அதிகபட்சமாக 108 எம்எல்ஏக்கள் உள்ளனர். பாஜகவுக்கு 71 எம்எல்ஏக்கள் உள்ளனர். இதையடுத்து 13 சுயேச்சை எம்எல்ஏக்கள் உள்ளனர். சுயேச்சை எம்.எல்.ஏக்களில் பெரும்பாலானவர்களின் ஆதரவு காங்கிரசுக்கு உள்ளது.
பொதுவாக, ஒரு எம்எல்ஏ தனது சட்டமன்ற உறுப்பினர் பதவியை விட்டுக்கொடுக்க ஒரு குறிப்பிட்ட செயல்முறையை மேற்கொள்ள வேண்டும். அரசியலமைப்புச் சட்டத்தின் 190(3)(பி) பிரிவின்படி, ஒரு எம்எல்ஏ தனது பதவியை விட்டு வெளியேற விரும்பினால், சபாநாயகருக்கு கடிதம் எழுதி ராஜினாமா செய்யலாம். எனினும், மக்களவைத் தலைவர் ராஜினாமாவை ஏற்றுக்கொண்டால் மட்டுமே இந்த நடைமுறை நிறைவடையும்.
ராஜஸ்தான் குறித்து பேசுகையில், 80க்கும் மேற்பட்ட காங்கிரஸ் எம்எல்ஏக்கள் தங்கள் ராஜினாமா கடிதத்தை சபாநாயகரிடம் அளித்துள்ளதாக கூறப்படுகிறது. இந்த எண்ணிக்கையை 80 ஆக எடுத்துக் கொண்டால், காங்கிரஸில் 28 எம்எல்ஏக்கள் மட்டுமே எஞ்சியிருப்பர். இந்நிலையில் ராஜஸ்தானில் பாஜக 71 இடங்களுடன் பெரும்பான்மையை பெற்று ஆட்சி அமைக்கும்.
எம்எல்ஏக்களின் ராஜினாமாவை சபாநாயகர் ஏற்காமல் போகவும் வாய்ப்பு உள்ளது. எந்த அழுத்தமும் இன்றி எம்.எல்.ஏ.க்கள் தங்கள் சொந்த விருப்பத்தின் அடிப்படையில் தான் ராஜினாமா செய்தார்கள் என சபாநாயகர் திருப்தி அடையும் வரை அவர் ராஜினாமாவை ஏற்க மறுக்கலாம். கெலாட் தற்போது இந்த தந்திரத்தை பின்பற்றுவதாகவே நம்பப்படுகிறது.
இந்த முழு ஆட்டத்திலும் பாஜக பெரும் குழப்பத்தை ஏற்படுத்தலாம். இந்த முழு ஆட்டத்துக்கும் மத்தியில், சட்டசபையில் காங்கிரஸுக்கு எதிராக நம்பிக்கையில்லா தீர்மானத்தை பாஜக முன்வைத்து, பெரும்பான்மையை சோதிக்கக் கோரினால், கெலாட் அரசுக்கு சிக்கல்கள் அதிகரிக்கலாம். உண்மையில், இந்த சூழ்நிலையில் காங்கிரஸ் நிச்சயம் அதனுடைய பெரும்பான்மையை நிரூபிக்க வேண்டும். , இங்கிருந்து ஆட்டம் சச்சின் பைலட்டின் பிடியில் மாறும் வாய்ப்புள்ளது. காங்கிரஸின் மூன்றில் இரண்டு பங்கு எம்.எல்.ஏக்களை பைலட் முறியடித்து பாஜகவுக்கு ஆதரவை வழங்கினால், கட்சித் தாவல் தடைச் சட்டத்தின் கீழ் வராமல் பாஜக ஆட்சியை அமைக்க முடியும்.