அண்டை நாடான பாகிஸ்தான் நிறுவனரான முகமது அலி ஜின்னா, அந்த நாட்டின் முதல் கவர்னர் ஜெனரலாக பதவி ஏற்றார். காசநோயால் பாதிக்கப் பட்டிருந்த இவர், 1948-ல் காலமானார். இவர் தன் கடைசி நாட்களில் வசித்து வந்த குடியிருப்பு கட்டடம், தேசிய நினைவுச் சின்னமாக அறிவிக்கப்பட்டது. 121 ஆண்டுகள் பழமையான இந்த கட்டடம், பலுாசிஸ்தான் மாகாணத்தின் ஜியாரத் பகுதியில் இருந்தது. எனினும் 2013-ல் பலுாச் பயங்கரவாதிகளால் அந்த கட்டடம் தகர்க்கப்பட்டு, தீ வைக்கப்பட்டது. இதில், அந்த கட்டடம் முழுதும் சேதமடைந்தது.   

இந்நிலையில் இந்த மாகாணத்தின் குவாடர் பகுதியில் இருந்த முகமது அலி ஜின்னாவின் சிலையும், நேற்று குண்டு வைத்து தகர்க்கப்பட்டதால் பெரும் பரபரப்பு ஏற்பட்டது. இந்த தாக்குதலுக்கு பலுாச் பயங்கரவாதிகள் பொறுப்பேற்றுள்ளனர்.

சுற்றுலா பயணிகள் அதிகம் கூடும் கடற்கரை நகரமான இங்கு, சமீபத்தில் தான் இந்த சிலை நிறுவப்பட்டது. இந்த சிலை தகர்ப்பு சம்பவம் குறித்து, உயர்மட்ட விசாரணை நடத்தப்பட்டு வருவதாக, பாகிஸ்தான்  ராணுவம் தரப்பில் தெரிவிக்கப்பட்டுள்ளது.

இலங்கை ராணுவத்தினர் நீர்க்காகம் என்ற பெயரில் ஆண்டுதோறும் போர்பயிற்சியில் ஈடுபட்டு வருகின்றனர். இலங்கை பாதுகாப்பு படையினரால் தொடர்ச்சியாக 11வது ஆண்டாக முன்னெடுக்கப்பட்டும் இந்த பயிற்சியில் அந்நாட்டு விமானங்கள், ஹெலிகாப்டர்கள் பங்கேற்றன. கொரோனா அச்சுறுத்தல் காரணமாக கடந்த வருடம் போலவே இந்தாண்டும் வெளிநாட்டுத் துருப்புகளின்றி போர் பயிற்சி நடைபெற்று வருகிறது.

29ஆம் தேதி வரை நடைபெறும் இந்த பயிற்சியில் எத்தகைய போர்ச் சூழலையும் சமாளிக்கும் வகையில் வீரர்கள் தங்களை தயார்ப்படுத்திக் கொள்கின்றனர்.  அந்த வகையில் இன்று விமானத்தில் இருந்து தாக்குதலை எதிர்கொள்ளும் வகையிலான போர்ப்பயிற்சி நடைபெற்றது. இதனைத்தொடர்ந்து தரை மற்றும் விமானம் சார்ந்த போர் உத்திகளை கையாள்வதற்கான பயிற்சிகள் நடைபெறும் என இலங்கை ராணுவம் தெரிவித்துள்ளது.

அமெரிக்க படைகள் ஆஸ்கானிஸ்தானில் இருந்து வெளியேறியதை அடுத்து தலிபான்கள் அங்கு ஆட்சிக்கு வந்தது. இதனையடுத்து அங்கு மிக கடுமையான சட்டங்கள் அமல்படுத்தப்பட்டு வருகின்றன. முகச்சவரம் செய்வது இஸ்லாமிய சட்டங்களை மீறுவதாக அமைந்துள்ளதாகவும் இதனால் ஹெல்மாண்ட் மாகாணத்தில் சலூன் கடைக்கு வரும் ஆண்களுக்கு முடிமட்டுமே திருத்த வேண்டும் என்று அவர்களுக்கு முகசவரம் செய்ய கூடாது என தலிபான்கள் உத்தரவிட்டுள்ளனர். இந்தத் தடையை மீறிப் அவர்களுக்கு தண்டனை வழங்கப்படும் என்றும் தாலிபன் அரசின் மத காவல்துறை தெரிவித்துள்ளது. 

இதே மாதிரியான உத்தரவுகள் தங்களுக்கு கிடைத்துள்ளதாக தலைநகர் காபூலில் உள்ள முடிதிருத்தும் கலைஞர்கள் தெரிவித்துள்ளனர்.தாலிபன்கள் முன்பு ஆட்சி செய்த 1996 - 2001 காலகட்டத்தில் இருந்ததைப் போலல்லாமல் தற்போதைய ஆட்சி மிதமானதாக இருக்கும் என்றும் தாலிபன் தரப்பில் தெரிவிக்கப்பட்டது. எனினும் தற்போது கடுமையான இஸ்லாமிய சட்டங்கள் அமல்படுத்தப்பட்டு வருகின்றன.

கிழக்கு லடாக் பகுதியில் கிட்டதட்ட ஒரு ஆண்டுக்கும் மேலாக சீனா தனது ராணுவ துருப்புகளை நிலைநிறுத்தி பதற்றத்தை ஏற்படுத்தி வருகிறது. பதற்றத்தை தணிக்கவும் அமைதியை மீட்டெடுக்கவும் இரு நாடுகளும் ராணுவ மட்டத்திலான பேச்சுவார்த்தையை நடத்தி வருகின்றன. சமீபத்தில் சின்ஜியாங் மலைசிகரத்தில் கிட்டதட்ட 16 ஆயிரம் அடி உயரத்தில்  சீன ராணுவம் போர் பயிற்சியில் ஈடுபட்டது.

இந்த நிலையில் தற்போது கிழக்கு லடாக் பகுதியில் கட்டுப்பாட்டு கோடு அருகே சீனா 8  இடங்களில் புதிதாக ராணுவ முகாம்களை அமைக்கும் பணியில் ஈடுபட்டு வருகிறது.  கரகோரம் கணவாய்க்கு அருகில் உள்ள வஹாப் ஜில்கா என்னும் பகுதியில் 8 இடங்களில் புதிய ராணுவ முகாம்களை அமைக்கும் சீனா தனது விமான தளங்களை வலுப்படுத்தும் நடவடிக்கையில் ஈடுபட்டு வருகிறது. இது இந்தியாவுக்கு புதிய அச்சுறுத்தலை ஏற்படுத்தியுள்ளது.

ஜெர்மனி நாடாளுமன்ற தேர்தலுக்கான வாக்குபதிவு நேற்று விறுவிறுப்பாக நடைபெற்று முடிந்தது. ஜெர்மனியின் முதல் பெண் பிரதமராக கடந்த 2005-ஆம் ஆண்டு பொறுப்பேற்ற ஏஞ்சலா மெர்க்கல், தொடர்ந்து 16 ஆண்டுகளாக பிரதமராக பதவி வகித்து வந்தார்.

தொடர்ந்து 16 ஆண்டுகளாக பிரதமராக இருந்து வந்த ஏஞ்சலா மெர்கல் இந்த முறை தேர்தலில் போட்டியிடப் போவதில்லை என்றும் அரசியல் வாழ்வில் இருந்தும் முழுமையாக விலகுவதாக அவர் அறிவித்தார்.

இந்தநிலையில் நாடாளுமன்ற தேர்தல் முடிவுகள் வெளியாகியுள்ளன. அதில் தற்போதைய பிரதமர் ஏஞ்சலா மெர்க்கல் தலைமையிலான கன்சர்வேட்டிவ் கட்சி 1.  5 சதவீதம் வாக்குகள் வித்தியாசத்தில் தோல்வியை தழுவியுள்ளது. இதன் மூலம் 16 வருட ஏஞ்சலா மெர்க்கல் தலைமையிலான ஆட்சி முடிவுக்கு வந்துள்ளது. சமூக ஜனநாயகக் கட்சி ஆட்சியை பிடித்துள்ளது.