வலிந்து காணாமல் ஆக்கப்பட்டவர்களின் உறவுகள், தமது உறவுகளை தேடியும், நீதி கோரியும் தொடர் போராட்டம் ஆரம்பிக்கப்பட்டு 2000வது நாளான இன்று மாபெரும் போராட்டத்தினை முன்னெடுத்திருந்தனர். கந்தசுவாமி ஆலயம் முன்பாக ஆரம்பிக்கப்பட்ட ஆர்ப்பாட்ட பேரணியானது, டிப்புா சந்திவரை சென்று அங்கு கவனயீர்ப்பு போராட்டம் முன்னெடுக்கப்பட்டதனை தொடர்ந்து நிறைவு பெற்றது. சர்வதேச விசாரணையை வலியுறுத்தி முன்னெடுக்கப்பட்ட போராட்டத்தில் ஐக்கிய நாடுகள் சபையின் மனித உரிமை ஆணையகத்திற்கு மனு ஒன்றினையும் அவர்கள் இன்றைய தினம் அனுப்பி வைத்தனர்.

 குறித்த போராட்டத்தில் நாடாளுமன்ற உறுப்பினர்களான எஸ் சிறிதரன் மற்றும் எஸ் கஜேந்திரன், இலங்கை ஆசிரியர் சங்கத்தின் செயலாளர் ஜோசம் இஸ்ராலின் உள்ளிட்ட சிவில் அமைப்புக்களின் பிரதிநிதிகள், மத தலைவர்கள் உள்ளிட்ட பலர் கலந்து கொண்டனர்.

 மனுவில் குறிப்பிடப்பட்டுள்ளதாவது, கடந்த காலத்தில் கையளிக்கப்பட்டும், சரணடைந்தும், கடத்தப்பட்டும், விசாரணைக்கெனக் கூட்டிச் செல்லப்பட்டும், வலிந்து காணாமல் ஆக்கப்பட்ட எமது உறவுகளைத் தேடி வடக்கு, கிழக்கு வலிந்து காணாமல் ஆக்கப்பட்டவர்களின் உறவுகளாகிய நாம் கடந்த 2000 நாட்களாக நீதி இன்றி போராடி வருகின்றோம். ஆரம்பத்தில் இலங்கை அரசிடம் நீதியை எதிர்பார்த்து முன்னாள் அதிபர் மைத்திரி சிறிசேனவை சந்தித்து நீதி கோரியபோது அவர் கொடுத்த வாக்கை நிறைவேற்றாது எம்மை ஏமாற்றியிருந்தார்.

 இதன் காரணமாகவும் சிறிலங்காவின் நீதித்துறையின் ”சிங்களவர்க்கு ஒரு சட்டம், தமிழருக்கு ஒரு சட்டம்“ என்ற இனவிரோத அணுகுமுறை காரணமாகவும் (உ.ம் கொலை குற்றசாட்டு நீதிமன்றத்தால் நிரூபிக்கபட்ட சிங்கள இராணுவத்திற்கு சிறிலங்கா முன்னாள் ஜனாதிபதி கோத்தபாய இராயபக்ச பொது மன்னிப்பு வழங்கி பதவி உயர்வும் வழங்கியுள்ளார். இது போல பல உதாரணகள் உண்டு )  சிறிலங்கா அரசிடம் நீதி கிடைக்காது என்ற முடிவுக்கு வந்து சர்வதேசத்திடம் மட்டுமே நீதி கேட்டு போராடி வருகிறோம். எம்முடன் இப்போராட்டத்தில் இணைந்திருந்த 138 மேற்பட்ட பெற்றோர்கள்  தமது பிள்ளைகளின் நிலை அறியாமலும், நீதி கிடைக்காமலும் இறந்து விட்டனர். நாமும் எமது வயோதிப காலத்தில் நோய்வாய்ப்பட்டு உடல் இயலாத நிலையிலும்  சர்வதேசத்தில் நம்பிக்கை வைத்து போராட்டத்தை தொடர்ந்து மேற்கொண்டு வருகின்றோம்.

 எமது உறவுகளில் பெருந்தொகையானோர் 2009 ஆம் ஆண்டு நடந்த யுத்தத்தின் போது சரணடைந்தும், கையளிக்கப்பட்டும் வலிந்து காணாமல் ஆக்கப்பட்டவர்கள், உயிரோடு கையளித்த சரணடைந்த  உறவுகளை இறந்து விட்டதாக முன்னாள் ஜனாதிபதி கோட்டாபாய  இரக்கமின்றி அறிவித்தார். இதில் 29ம் மேற்பட்ட கைக்குழந்தைகளும் சிறுவர்களும் அடங்குவர். எமது உறவுகள் காணாமல் ஆக்கப்பட்டதில்  பாதுகாப்புச் செயலராக இருந்து, கட்டளைகளை வழங்கி திட்டமிட்டு  இனவழிப்பை மேற்கொண்டதில் இவருக்கு பெரும் பங்கு உண்டு. தானே பாதுகாப்பு செயலராக இருந்து மனிதகுலத்திற்கு எதிரான யுத்தம் மூலம் தமிழின அழிப்பை மேற்கொண்டவர் இவரே. இவரின் இவ்வளவு அட்டுழியங்களுக்கும் இவரது சகோதரராகிய முன்னாள் ஜனாதிபதி மஹிந்த ராஜபக்ஸ ஜனாதிபதியாக இருந்து சகல வழிகளிலும் இவ் இனவழிப்பு யுத்தத்திற்கு முழு அதிகாரமும் கொடுத்து முன்னின்று வழிநடத்தினார். இவருக்கு துணையாக இவரது நம்பிக்கைக்குரிய படைத் தளபதிகளும், சிங்கள அதிகாரிகளும் தமிழரை சித்திரவதை செய்து, கொன்று, கற்பழித்து, ஊனமாக்கி,தமிழரின்  சொத்துக்களை  கொள்ளையடித்து  எம் இனத்தை இனவழிப்பு செய்தனர்.

 மேற்படி கொடூரங்களைப் புரிந்த சிங்கள அரசுக்கு ஐ.நா வின் தீர்மானம் 30/1  இன் படி பொறுப்புக் கூறலுக்கான கால அவகாசத்தை நீடித்ததன் மூலம் காலம் இழுத்தடிக்கப்பட்டது. இறுதியில் சிறிலங்கா அரசானது தன்னிச்சையாகவே  அனுசரணையிலிருந்து விலகிக் கொண்டது. கடந்க காலங்களிலும் இதையே சிறிலங்கா அரசாங்கம்  (சர்வதேச மத்தியத்துடன் நடைபெற இனப்பிரச்சனைகான அரசியல்  தீர்வு பேச்சுவார்த்தையில் இருந்து சிறிலங்கா அரசு ஒருதலை பட்சமாக விலகியது) தன் யுக்தியாகச் செய்தது.

 சிறிலங்கா அரசு பொறுப்புக்கூறும் என்று வீணாக எதிர்பார்த்து காலத்தை மேலும் கடத்தாது தமிழருக்கு இழைத்த அனைத்து குற்றங்களுக்காகவும்  சம்பந்தப்பட்ட அனைவரையும் சர்வதேச குற்றவியல் நீதிமன்றில் (ICC) நிறுத்தி  நீதி நிலைநாட்டப்பட வேண்டும்.  அதுவே ஐ.நா உட்பட்ட சர்வதேசமும் இறந்த பெற்றோர்களுக்கும், வாழ்நாட்களை எண்ணிக் கொண்டிருக்கும் வயோதிப பெற்றோராகிய எமக்கும் செய்யக்  கூடிய சர்வதேச நீதியாகும்.

 அதுமட்டுமல்ல,1956ம் ஆண்டிலிருந்து இனவழிப்புக்கு  உள்ளாக்கப்பட்ட இனம்  எமது தமிழ் இனம். குற்றவாளிகளுக்கு சரியான தண்டனை வழங்குவதன் மூலம் “மீள் நிகழாமையை” உறுதிப்படுத்த முடியுமே அன்றி காலங்களை கடத்துவதன் மூலம் தீர்வு காண முடியாது. வழங்கப்படும் தண்டனை இனி ஒரு இனவழிப்பு நிகழாமையை உறுதிப்படுத்த வேண்டும்.

 நாம்  தமிழர்களாக எமது அடையாளங்களுடன், சுதந்திரமாக  வாழவே ஆசைப்படுகின்றோம். உண்மையில் ஒரு பிரச்சனைக்குத் தீர்வு காண்பதானால் சம்பந்தப்பட்ட தரப்பின் கோரிக்கை அறியப்பட வேண்டும். எமது தமிழ் பரராளுமன்ற  உறுப்பினர்கள் தேர்தல் காலங்களில் நமக்கு அளித்த வாக்குறுதிகளுக்கு மாறாக,சுய இலாபமே நோக்காகக் கொண்டு பாதிக்கப்பட்டவர்கள் விடயத்திலும், தமிழர் உரிமை (அரசியல் தீர்வு) விடயத்திலும் செயற்படுகிறார்கள். எனவே அவர்களின் கருத்து மக்கள் கருத்தாகக் கணக்கிலெடுக்கப்படாமல்  காணாமல் ஆக்கப்பட்டவர்கள் தொடர்பில் பாதிக்கப்பட்ட எமது விருப்பே மேலோங்க வேண்டும்.

 இந்த போராட்டத்தின் மூலம் பின்வரும் கோரிக்கைகளை வலியுறுத்த விரும்புகின்றோம்

1. எமது வாழ்நாள் முடிவதற்கு முன் நீதியின் தீர்ப்பை காண விரும்புகின்றோம். ஆகவே மஹிந்த, கோத்தபாய உட்பட எம் மீதான இனவழிப்பிற்கு காரணமான அனைவரையும் சர்வதேச குற்றவியல் நீதிமன்றத்தில் (ICC) நிறுத்தி தண்டனை வழங்கப்படவேண்டும்

2. தற்போது தென்னிலங்கையில் ஏற்பட்ட அரசியல் சூழ்நிலை காரணமாக சிறிலங்காவை விட்டு தப்பியோடிய கோத்தபாய ராஜபக்ஸ, எந்த நாட்டில் ஒளித்திருந்தாலும் சர்வதேச நீதிபொறிமுறையினூடாக கைது செய்து எம்மீது மேற்கொண்ட மனிதகுலத்திற்கெதிரான குற்றங்கள், போர்க்குற்றங்கள் மற்றும் இனவழிப்பிற்காக நீதியின் முன் நிறுத்த சர்வதேசம் முன்வரவேண்டும்.

3. இன்றும் கூட எமது பிள்ளைகள் காணாமல் ஆக்கப்பட்டமைக்கு காரணமான சிங்கள இராணுவமே எமது நிலங்களை ஆக்கிரமித்து நிற்கின்றது. இந்த சிங்கள இராணுவமே எம்மை தொடர்ச்சியாக அச்சுறுத்துவதுடன், தொடர்ந்தும் எம்மை பீதி நிலையிலேயே வைத்துள்ளது. இந்த இராணுவம் உடனடியாக எமது நிலங்களிருந்து அகற்றப்படவேண்டும்.

4. எம் மீதான ஆக்கிரமிப்பு யுத்தத்தை தொடர்ந்து சிங்கள பெளத்த அரசானது எமது நிலங்களையும் ஆலயங்களையும் அடாவடியாக அபகரித்து சிங்கள பெளத்த மயமாக்கலை வெகு வேகமாக செய்து வருகின்றது. இந்நடவடிக்கைகள் உடனடியாக நிறுத்தப்பட்டு காணிகள் உரிய சட்டபூர்வமான உரிமையாளர்களிடம் ஒப்படைக்கப்படவேண்டும்.

5. சிறையில் தமிழ் அரசியல் கைதிகளாக வாடும் எமது சொந்தங்கள் எவ்வித நிபந்தனைகளுமின்றி உடனடியாக விடுதலை செய்யப்படவேண்டும்.

6. சுயநிர்ணய உரிமைக்கு உரித்துடைய தமிழ் மக்கள் ஆகிய நாம் எமது அரசியல் தலைவிதியை நாமே தீrமானிக்கும் சந்தர்ப்பம் வழக்கப்படவேண்டும். 1948 பெப் 4ம் திகதிக்கு முன் வடக்கு கிழக்கு மாகாணங்களில் வாழ்ந்த மக்களிடமும் அவர்களின் வழித்தோன்றல்களிடையேயும் சர்வதேசத்தினால் நடத்தி கண்காணிக்கப்படும் சர்வசன வாக்கெடுப்பு மூலம் நிரந்திர அரசியல் தீர்வு வழங்கப்படப் வேண்டும்.

இந்தப் போராட்டத்தில் பல்வேறு தரப்பினரும் பங்கேற்று தமது கோரிக்கைகளை வலியுறுத்தினர்.

சீனாவில் கொரோனா வைரஸ் தொன்றி மூன்று ஆண்டுகளைக் கடந்த நிலையில் தற்போது புதிதாக ஒரு விலங்கு வைரஸ் கண்டறியப்பட்டுள்ளதாக தகவல்கள் வெளியாகியுள்ளன.  இதுவரை 35 பேருக்கு தொற்று ஏற்பட்டுள்ளதாகவும் தெரியப்படுகிறது. இவர்கள் அனைவரும் விவசாயிகள் என தெரிய வருகிறது. இந்த புது வகை வைரஸ்க்கு லாங்யா வைரஸ் அல்லது லேவி எனப் பெயரிடப்பட்டுள்ளது. 

லாங்யா வைரஸ்: 

இந்த வைரஸ்கள் உயிர் பாதுகாப்பு நிலை நோய்க்கிருமிகளாக வகைப்படுத்தப்பட்டுள்ளது.  இவை விலங்குகளுக்கும் மனிதர்களுக்கும் கடுமையான நோயை ஏற்படுத்தக்கூடும் என தெரிக்கப்பட்டுள்ளது.  தற்போது வரை இதற்கான எந்த தடுப்பு மருந்துகளும் இல்லை என அறியப்படுகிறது. 

எவ்வாறு கண்டுபிடிக்கப்பட்டது: 

கிழக்கு சீனாவில் காய்ச்சலால் பாதிக்கப்பட்டவர்களை சோதித்தப் போது அவர்களிடம் புதிய வைரஸ் தொற்று இருப்பது கண்டறியப்பட்டுள்ளது.  பாதிக்கப்பட்டவர்களுக்கு தொண்டையில் சவ்வு மாதிரியான பாதிப்பு இருந்ததாகவும் தெரிவிக்கப்பட்டுள்ளது. 

அறிகுறிகள் என்ன? 

காய்ச்சல், சோர்வு, இருமல், வாந்தி, தலைவலி போன்ற அறிகுறிகள் இருப்பதாக தகவல்கள் தெரிவிக்கின்றன.   சில பேருக்கு கல்லீரல் செயல்பாடு பாதிக்கப்பட்டுள்ளதாகவும் சிறுநீரக செயல்பாடு பாதிக்கப்பட்டுள்ளதாகவும் கூறுகின்றனர். 

வைரஸ் எங்கிருந்து வந்தது: 

இந்த புதிய வைரஸ் எலி போன்ற தோற்றமுடைய சிறிய மோல் என்ற விலங்கிடமிருந்து மனிதர்களுக்கு பரவியிருக்கலாம் என சந்தேகிக்கப்படுகிறது.  இதுவரை உறுதியான எட்டப்படவில்லை என தெரிகிறது. 

இந்தியாவின் எதிர்ப்பை மீறி, இலங்கை நோக்கி பயணத்தை தொடங்கியுள்ள சீனாவின் 'யுவான் வாங் 5' கப்பல், ஹம்பன்தொட்டா துறைமுகத்துக்கு வந்தடையும் என எதிர்பார்க்கப்படுகிறது.

சீனாவின் ”யுவான் வாங் 5” ஆராய்ச்சி கப்பல்:

சீனா தனது ‘யுவான் வாங் 5’ என்ற ஆராய்ச்சி கப்பலை, இலங்கையின் ஹம்பன் தொட்டா துறைமுகத்தில் ஆகஸ்ட் 11ஆம் தேதி தொடங்கி அன்றிலிருந்து  6 நாட்கள் நிறுத்தி வைக்கப்பட்டு செயற்கைக்கோள் தொடர்பான ஆய்வினை மேற்கொள்ள இருப்பதாக அறிவித்தது.

முதலில் அனுமதி அளித்த இலங்கை அரசு:

சீனாவின் ”யுவான் வாங் 5” ஆராய்ச்சி கப்பலை இலங்கையின் ஹம்பன் தொட்டா துறைமுகத்தில் வைத்து ஆய்வு மேற்கொள்வதற்கு இலங்கை அரசு அனுமதி அளித்துள்ளது.

மறுப்பு தெரிவிக்கும் இலங்கை அரசு:

சீனாவின் ஆராய்ச்சி கப்பலுக்கு இலங்கை அனுமதி அளித்த நிலையில், ஆராய்ச்சி கப்பல் என்ற பெயரில் உளவு கப்பலை சீனா இலங்கை அருகே நிறுத்துவது இந்தியாவுக்கு அச்சுறுத்தலாக இருக்கும் என, மத்திய அரசு தரப்பில் கவலை தெரிவிக்கப்பட்டது. இதை ஏற்று, 'யுவான் வாங்-5' கப்பலின் பயணத்தை ரத்து செய்யும்படி சீனாவிடம் இலங்கை அரசு தெரிவித்தது. 

இந்தியாவை எச்சரித்த சீனா:

இலங்கை அரசு மறுப்பு தெரிவித்தும் தனது முடிவில் உறுதியாக உள்ள சீனா, இலங்கை அரசு தனது முடிவை பரிசீலனை செய்ய வேண்டும் என கூறியது.  மேலும் இலங்கையின் வெளியுறவுக் கொள்கைகளில், இந்தியா தேவையில்லாமல் தலையிட வேண்டாம் என எச்சரித்த சீனா, "பாதுகாப்பு கவலைகள்" என்ற பெயரில், சில நாடுகள் இலங்கைக்கு அழுத்தம் கொடுப்பது நியாயமற்றது என்றும் தெரிவித்துள்ளது. 

இலங்கையை நோக்கி பயணத்தை தொடங்கியது சீனா:

இந்தநிலையில், இந்தியாவின் எதிர்ப்பை மீறியும், இலங்கையின் அனுமதி இன்றியும் சீனாவின் 'யுவான் வாங் 5' கப்பல் இலங்கையின் ஹம்பன்தொட்டா துறைமுகம் நோக்கி பயணத்தை தொடங்கியுள்ளது.   

சந்தேகம்:

சீனாவின் 'யுவான் வாங் 5' கப்பல் உண்மையிலேயே ஆராய்ச்சி கப்பல் தானா? அல்லது இந்திய மத்திய அரசு கவலை தெரிவிப்பது போல உளவு கப்பலா? என்ற சந்தேகம் எழுகிறது. ஏனென்றால், இந்தியாவின் எதிர்ப்பையும், இலங்கையின் அனுமதியையும் மீறி சீனா தனது கப்பல் பயணத்தை தொடர்ந்திருப்பது ஆராய்ந்து பார்க்க வேண்டிய விஷயமாக கருதப்படுகிறது.

இலங்கையில் அனைத்துக் கட்சிகளையும் உள்ளடக்கிய அரசு அமைப்பது தொடர்பில் தமிழ் மற்றும் முஸ்லிம் கட்சிகள் உள்ளிட்ட சில கட்சிகளின் பிரதிநிதிகள் அதிபர் ரணில் விக்கிரமசிங்கவை சந்தித்துப் பேச்சுவார்த்தையில் ஈடுபட்டுள்ளனர்.

பல கட்சிகள் இன்று தனித்தனியாக இலங்கை ரணில் விக்ரமசிங்கவை சந்தித்து கலந்துரையாடியுள்ளன. அதிபர் அலுவலகத்தில் இந்த சந்திப்புகள் இடம்பெற்றுள்ளன.

அதிபருடன் மனோ கணேசன் சந்திப்பு

தமிழ் முற்போக்கு கூட்டணியின் பிரதிநிதிகளும் இன்று அதிபர் ரணில் விக்ரமசிங்கவை சந்தித்துள்ளனர். நாடாளுமன்ற உறுப்பினரும் அக்கூட்டணியின் தலைவருமான  மனோ கணேசன் தலைமையில் இவர்கள் சந்தித்துப் பேசியுள்ளார்கள்.

தமிழ்-முஸ்லிம் கட்சிகளுடன் அதிபர் சந்திப்பு

தமிழ் மக்கள் தேசியக் கூட்டணியின் தலைவரும் பாராளுமன்ற உறுப்பினருமான சி.வி. விக்னேஸ்வரனும் இன்று ரணில் விக்ரமசிங்கவை சந்தித்துள்ளார். இன்று அகில இலங்கை மக்கள் காங்கிரஸ் தலைவர் நாடாளுமன்ற உறுப்பினர் ரிசாட் பதியூதீன் தலைமையில் ஒரு குழுவும் ஜனாதிபதியை சந்தித்துள்ளனர். இந்தச் சந்திப்புக்களின் போது அனைத்து கட்சிகளையும் உள்ளடக்கிய அரசு அமைப்பது தொடர்பில் பேசப்பட்டதாக தெரிவிக்கப்பட்டுள்ளது.

இங்கிலாந்தில் அதிக குடும்பங்கள் மிகவும் மோசமான சூழலில் வாழ்ந்து வருகின்றன எனவும் அவர்களுக்கு வாழ்வதற்கு தேவையான அடிப்படை வசதிகளை செய்து தர வேண்டும் என்பதே தன்னுடைய விருப்பம் எனவும் ரிஷி சுனக் பேட்டியில் பேசியுள்ளார்.  மேலும் குளிர்காலத்தில் அவர்களுக்கு அதிக உதவி செய்ய வேண்டும் எனவும் கூறியுள்ளார்.

மேலும் படிக்க: இங்கிலாந்து பிரதமர் தேர்தலில் இந்திய வம்சாவளியை சேர்ந்தவர் போட்டி!

மற்றுமொரு பிரதமர் வேட்பாளரான லிஸ் ட்ரஸ் வரி குறைப்பு செய்வதாக தேர்தல் வாக்குறுதி அளித்துள்ளார்.  அதைக் குறித்து பேசிய ரிஷி சுனக் வரி குறைப்பு என்பது பணக்காரர்களுக்கு மட்டுமே ஆதாயமாக இருக்கும் என விமர்சித்துள்ளார்.  மேலும் தேர்தலில் பொய்யான வாக்குறுதிகளை தந்து வெற்றி பெறுவதை விட தோல்வியடைவதே சிறந்தது என தெரிவித்துள்ளார். 

இந்த நாடு முழுவதும் உள்ள மக்களுக்கு கடினமான குளிர்காலத்தில் உதவ வேண்டும் என்பதே அவரது  விருப்பம் எனவும் ரிஷி சுனக் குறிப்பிட்டுள்ளார்.  ஆனால் அவருடைய முதல் விருப்பமாக மக்களிடமிருந்து எப்போதும் பணத்தை எடுக்க கூடாது என்பதே எனவும் சுனக் கூறியுள்ளார்.

அவரது அரசியல் செயல்பாடுகளை ஏற்கனவே மக்கள் நன்கு தெரிந்துள்ளனர் எனவும் கோவிட் காலத்தில் அவர் சிறப்பாக செயல்பட்டதையும் இங்கு நினைவுகூர்கிறார் சுனக்.

நாட்டின் கோடிக்கணக்கான மக்கள் பணவீக்கத்தைக் குறித்து கவலை கொள்கின்றனர்.  குறிப்பாக எரிசக்தி பொருள்களின் விலை அதிகரிப்பு அவர்களை அதிகமாக கவலையடைய செய்கின்றன எனவும் அவர் பிரதமரானால் இதற்கான நடவடிக்கை எடுப்பதாகவும் கூறியுள்ளார்.

இதையும் படிக்க: உலகை அச்சுறுத்தும் சீனா-ரிஷி சுனக்