டெல்லி, உத்தரபிரதேசம் உள்ளிட்ட வடமாநிலங்களில் கோடைக்காலம் தொடங்கியது முதல் வெப்பம் வாட்டி வருகிறது. குறிப்பாக ராஜஸ்தான் உள்ளிட்ட மாநிலங்களில் வரலாறு காணாத அளவுக்கு வெப்பம் பதிவானது.

இதனிடையே மக்களுக்கு தற்காலிக நிவாரணம் அளித்திடும் விதமாக டெல்லி மற்றும் அதன் சுற்றுவட்டார பகுதிகளில் இரவு நேரங்களில் மழை பெய்தது.  இதனால் மக்கள் நிம்மதி அடைந்தனர்.

இந்தநிலையில் இன்று முதல் மீண்டும் வெப்ப அலை அதிகரிக்க கூடும் என்றும், அதன் அண்டை மாநிலங்களில் வெள்ளிக்கிழமை முதல் வெப்ப அலை வீசக்கூடும் எனவும் வானிலை மையம் கணித்துள்ளது.

சினிமா எப்போதும் சுதந்திரத்தின் பக்கம் தான் நின்றிருக்கிறது என கேன்ஸ் சர்வதேச திரைப்பட விழாவில் உக்ரைன் அதிபர் விளாடிமிர் செலன்ஸ்கி தெரிவித்துள்ளார்.

காணொலிக் காட்சி மூலம் நிகழ்ச்சியில் பங்கேற்ற அவர், சினிமா ஊமை இல்லை என்பதை நிரூபிக்க மற்றொரு சாப்ளின் தேவை என வலியுறுத்தினார். சார்லி சாப்ளினின் "தி கிரேட் டிக்டேட்டர்" படத்தை மேற்கோள் காட்டிப் பேசிய அவர், விரைவில் சர்வாதிகாரிகள் கொல்லப்பட்டு அவர்கள் பெற்ற அதிகாரங்கள் மீண்டும் மக்களுக்கே திரும்பும் எனக் கூறினார். 

உக்ரைனில் நூற்றுக்கணக்கானோர் தொடர்ந்து இறந்து கொண்டிருக்கும் வேளையில் திரைப்பட இயக்குநர்கள் அமைதியாக இருக்க வேண்டாம் எனவும் அவர் கேட்டுக்கொண்டார். 

ஆந்திர மாநிலம் நகரி பகுதியில் முதியோர் உதவித்தொகை வருகிறதா எனக் கேட்ட அமைச்சர் ரோஜாவிடம் அதெல்லாம் வருகிறது, என்னை பார்த்துக்கொள்ளத் தான் யாருமில்லை திருமணம் செய்து வையுங்கள் எனக் கேட்ட முதியவரின் வீடியோ இணையத்தில் வைரலாகி வருகிறது.

ஆந்திர சுற்றுலாத்துறை அமைச்சரான ரோஜா, தனது நகரி தொகுதியில் வீடு வீடாக சென்று மக்கள் குறைகளை கேட்டறிந்தார். அப்போது என்னை பார்த்துக்கொள்ளத் தான் யாருமில்லை என ஒரு முதியவர் பாவமாக  தெரிவித்தார். 

இதனை எதிர்பாராத ரோஜா குபீரென சிரித்து விட்டு, அரசால் உதவித்தொகை தான் வழங்க முடியும், திருமணம் எல்லாம் செய்து வைக்க முடியாது என நகைப்புடன் கூறி விட்டு அங்கிருந்து நகர்ந்தார்.

பெண் மீது கை ஓங்கும் ஆணின் கையை உடைத்து அவரிடமே ஒப்படைப்பேன் என மகாராஷ்டிராவின் பாரமதி தொகுதி எம்பி சுப்ரியா சூலே கடுமையாக சாடியுள்ளளார்.

புனேவில் காங்கிரஸ் கட்சி சார்பில் நடைபெற்ற நிகழ்ச்சி ஒன்றில் பேசிய அவர், ஷாகு மகாராஜ், மகாத்மா பூலே, பாபாசாகேப் அம்பேத்கர், சத்ரபதி சிவாஜி ஆகியோரின் மண் மகாராஷ்டிரா என குறிப்பிட்டார்.

இந்த மாநிலத்தில் பெண்கள் மீது ஆண்கள் தாக்குதல் நடத்தினால் சம்பவ இடத்துக்கு தானே நேரில் விரைந்து நீதிமன்றத்தில் வழக்கு தொடர்வேன் என தெரிவித்தார்.  புனேவில் மத்திய அமைச்சர் ஸ்மிருதி ராணி தலைமையில் நடைபெற்ற நிகழ்ச்சியில் பாஜகவினரால் பெண் தொண்டர்கள் தாக்கப்பட்டதாக புகார் எழுந்தது குறிப்பிடத்தக்கது.

போதை தலைக்கேறிய பயணி விமானத்தில் ரகளையில் ஈடுபட்டதால் விமானம் அவசரமாக தரையிறக்கப்பட்ட சம்பவம் பரபரப்பை ஏற்படுத்தியுள்ளது.

கடந்த சனிக்கிழமை கத்தார் தலைநகர் தோகாவில் இருந்து இண்டிகோ விமானம் ஒன்று பெங்களூருக்கு புறப்பட்டுள்ளது. விமானம் நடுவானில் பறந்துக் கொண்டிருக்கும் போது போதை தலைக்கேறிய பயணி ஒருவர் குடிபோதையில் சக பயணிகளுடன் ரகளையில் ஈடுபட்டதாக கூறப்படுகிறது.

இதனால் விமானமானது மும்பை சர்வதேச விமான நிலையத்தில் அவசரமாக தரையிறக்கப்பட்டது.  இதையடுத்து போதை தலைக்கேறி ரகளையில் ஈடுபட்ட பயணியை மும்பை போலீசார் 3 பிரிவுகளின் கீழ் வழக்கு பதிவு செய்து கைது செய்தனர். இதனால் மும்பை விமான நிலையத்தில் சிறிது நேரம் பரபரப்பு ஏற்பட்டது.