தொடர் பண்டிகைகள்:

தமிழ்நாடு முழுவதும் நவராத்திரி, தசரா, விஜயதசமி, சரஸ்வதி பூஜை என அடுத்தடுத்து விழாக்கள் கொண்டாடப்படவுள்ளது. பொதுமக்கள் வீடுகளிலும், கோயில்களிலும் இந்த நாட்களில் சிறப்பு பூஜைகள், வழிபாடுகள் நடத்துவது வழக்கம். 

விலை அதிகரிப்பது வழக்கம்:

பூஜை நாட்களில் பூக்களின் விலையும், பழங்களின் விலையும் கணிசமாக அதிகரிப்பது உண்டு. சாதாரணமாக விஷேச நாட்களில் இவற்றின் விலை அதிகரிப்பது தாண்டி தற்போது வரத்து குறைவால் மேலும் அதிகரிப்பது குடும்பவாசிகளிடம் கலக்கத்தை ஏற்படுத்தியுள்ளது. 

ஆப்பிள் வரத்து குறைவு:

அந்த வகையில், சென்னை கோயம்பேடு சந்தைக்கு ஆப்பிளின் வரத்து குறைந்திருப்பதால், அதன் விலை அதிகரித்திருக்கிறது. வழக்கம்போல் வரக்கூடிய வரக்கூடிய ரூ.500கோடி மதிப்புடைய ஆப்பிள் பெட்டிகள் வரவில்லை எனக் கூறப்படுகிறது. 

பொதுமக்கள் கலக்கம்:

இதன் காரணமாக இமாச்சலப் பிரதேச ஆப்பிள் பெட்டிகள் 30 கிலோ ரூ.3,500-ஆகவும், சிம்லா ஆப்பிள் பெட்டிகள் 30 கிலோ ரூ.3,080ஆகவும் விலை அதிகரித்துள்ளது. தொடர்ந்து வரும் பண்டிகளில் முக்கியமாக வைக்கப்படும் ஆப்பிள் பழத்தின் விலை அதிகரித்து இருப்பது வியாபாரிகளிடமும், பொதுமக்களிடமும் கலக்கத்தை ஏற்படுத்தியுள்ளது.

22-வது நாளாக தொடரும் பயணம்:

காங்கிரஸ் கட்சியின் முன்னாள் தலைவரும், வயநாடு எம்பியுமான ராகுல் காந்தி, கன்னியாகுமரி தொடங்கி காஷ்மீர் வரை ஒற்றுமைப் பயணம் மேற்கொண்டு வருகிறார். தனது ஒற்றுமைப் பயணத்தின் 22வது நாளான நேற்று நீலகிரி மாவட்டம் கூடலூரில் நடைபயணம் மேற்கொண்ட அவர், அங்கு நடைபெற்ற பொதுக்கூட்டத்தில் பங்கேற்று உரையாற்றினார். 

பிரிவினைவாதம் அமைதியை சீர்குலைக்கும்:

அப்போது பேசிய ராகுல்காந்தி, பிரிவினைவாதம் மூலம் அமைதியை சீர்குலைக்கும் பாஜக அரசின் முயற்சியை தடுக்கவே தாம் ஒற்றுமை யாத்திரையை மேற்கொண்டுள்ளதாக தெரிவித்தார். 

ஜிஎஸ்டி நாட்டு மக்களுக்கு எதிரானது:

மத்தியில் ஆட்சி செய்யும் அரசு, மாநில அரசுகளுடன் ஒருங்கிணைந்து மக்களின் தேவைகளை பூர்த்தி செய்ய வேண்டும் என்று கூறிய அவர், சரக்கு மற்றும் சேவை வரி நாட்டு மக்களுக்கு எதிரானது என்றும், சிறு மற்றும் நடுத்தர தொழில்கள் இதனால் நலிவடைந்து வருவதாகவும் சாடினார். 

ஒரு மொழியை திணிக்க முயற்சிக்கிறது:

பல்வேறு மொழி பேசும் இந்தியாவில் மத்திய அரசு அனைத்து மாநில மொழிகளையும் ஊக்குவிக்காமல் ஒரு மொழியை திணிக்க முயற்சிப்பதாகவும் அவர் குற்றம்சாட்டினார். 

ஆளுநர்கள் மாநில அரசை மதிக்க வேண்டும்:

மக்களால் தேர்ந்தெடுக்கப்பட்ட மாநில அரசுகளை ஆளுநர்கள் மதித்து செயல்பட வேண்டும் என்று அறிவுறுத்திய ராகுல் காந்தி, தற்போதைய பாஜக ஆட்சியில் நாட்டில் வேலையில்லா திண்டாட்டம் பெருகி வருவதாகவும், பெட்ரோல், டீசல் விலை உயர்வு, பணமதிப்பிழப்பு நடவடிக்கைகளால் பாமர மக்கள், விவசாயிகள் கடுமையாக பாதிக்கப்பட்டுள்ளதாகவும் குற்றம்சாட்டினார். 

நீதிமன்ற அவமதிப்பு:

ஆர்எஸ்எஸ் அணிவகுப்புக்கு அனுமதி மறுத்ததை எதிர்த்து நீதிமன்ற அவமதிப்பு வழக்கு தாக்கல் செய்ய அனுமதியளித்த சென்னை உயர் நீதிமன்றம், மனுத்தாக்கல் நடைமுறைகள் முடிந்தால் இன்று விசாரணைக்கு எடுத்துக்கொள்வதாக தெரிவித்துள்ளது.

ஆர்.எஸ்.எஸ் அணிவகுப்புக்கு அனுமதி:

வரும் 2ம் தேதி காந்தி ஜெயந்தி அன்று தமிழகம் முழுவதும் 50க்கும் மேற்பட்ட இடங்களில் அணிவகுப்பு ஊர்வலம் நடத்த ஆர்எஸ்எஸ் அமைப்புக்கு பல்வேறு நிபந்தனைகளுடன் சென்னை உயர்நீதிமன்றம் கடந்த 22ம் தேதி அனுமதி அளித்து உத்தரவு பிறப்பித்தது.

மனித சங்கிலி பேரணிக்கு அனுமதி:

இந்நிலையில், பல்வேறு சட்டம் ஒழுங்கு பிரச்னை ஏற்படும் என்பதால் ஆர்எஸ்எஸ் ஊர்வலம் மற்றும் வேறுசில அமைப்புகளின் சமூக ஒற்றுமை நல்லிணக்க மனித சங்கிலி பேரணிக்கு காவல்துறை அனுமதி மறுத்துள்ளது. 

அரசு மீது நீதிமன்ற அவமதிப்பு வழக்கு:

இதனை எதிர்த்து, ஆர்எஸ்எஸ் தரப்பில் சென்னை உயர் நீதிமன்றத்தில் முறையீடு செய்யப்பட்டது. அதில், கடந்த 22 ஆம் தேதி உயர் நீதிமன்றம் பிறப்பித்த உத்தரவை ரத்து செய்யும் வகையில் தமிழக அரசு உத்தரவு பிறப்பித்துள்ளதால், நீதிமன்ற அவமதிப்பு வழக்கு தொடர அனுமதி அளிக்க வேண்டும் என்றும், இந்த வழக்கை அவசர வழக்காக விசாரணைக்கு எடுத்துக் கொள்ள வேண்டும் என்றும் ஆர்எஸ்எஸ் தரப்பில் கோரிக்கை வைக்கப்பட்டது.

அரசின் உத்தரவை எதிர்த்து வழக்கு:

இதை கேட்ட நீதிபதி இளந்திரையன், நீதிமன்ற அவமதிப்பு வழக்கிற்கு பதிலாக தமிழக அரசின் நிராகரித்த உத்தரவை எதிர்த்து வழக்கு தொடரலாம் என அறிவுறுத்தினார்.

அவசர வழக்காக விசாரிக்க வலியுறுத்தல்:

ஆனால் நீதிமன்ற அவமதிப்பு வழக்கை அவசர வழக்காக விசாரணைக்கு எடுத்துக் கொள்ள வேண்டும் என்று ஆர்எஸ்எஸ் தரப்பில் வலியுறுத்தப்பட்டதை அடுத்து, வழக்கை தாக்கல் செய்து எண்ணிடும் நடைமுறைகள் முடிந்தால் இன்று விசாரணைக்கு எடுத்துக் கொள்வதாக நீதிபதி இளந்திரையன் ஒப்புதல் தெரிவித்துள்ளார்.

திண்டுக்கல் மாநகராட்சி மாமன்ற இயல்பு கூட்டம் இன்று மாநகராட்சி மேயர்  இளமதி தலைமையில் நடைபெற்றது.

மாநகராட்சிக் கூட்டம்

கூட்டத்தில் துணை மேயர் ராஜப்பா, மாநகராட்சி ஆணையர் சிவசுப்பிரமணியன், மற்றும் 48 மாமன்ற உறுப்பினர்கள் கலந்து கொண்டனர். இந்தக் கூட்டத்தில் 92 தீர்மானங்கள் நிறைவேற்றப்பட்டன.

மாநகராட்சி அலுவலகத்தில் கூட்டம் நடந்து கொண்டிருந்த பொழுது மாநகராட்சியின் 14 வது வார்டு மாமன்ற உறுப்பினர் பாஜகவை சேர்ந்த தனபால் திண்டுக்கல் பேருந்து நிலையத்தில் புதிதாக கட்டப்பட்ட 34 கடைகள் ஏலம் விடுவதில் குளறுபடி நடந்துள்ளதாகவும் இதில் ஊழல் நடந்துள்ளதால் மாநகராட்சி ஆணையர் வெள்ளை அறிக்கை தாக்கல் செய்ய வேண்டும் என கூறினார்.

மாமன்ற உறுப்பினர்கள் எதிர்ப்பு

இதற்கு திமுக மற்றும் காங்கிரஸ் மாமன்ற உறுப்பினர்கள் எதிர்ப்பு தெரிவித்து. தனபாலுடன் வாக்குவாதத்தில் ஈடுபட்டனர். இதனை அடுத்து சம்பந்தப்பட்ட அதிகாரி மாநகராட்சி சட்ட திட்டங்களுக்கு உட்பட்டு தான் கடைகள் ஏலம் விடப்பட்டதாகவும் இதில் எந்த ஊழலும் எந்த குளறுபடியும் நடைபெறவில்லை என விளக்கம் அளித்தார். இதனை ஏற்காத தனபால் அதிகாரியுடன் வாக்குவாதத்தில் ஈடுபட்டார். 

துணை மேயர் குற்றச்சாட்டு

இதனைத் தொடர்ந்து துணை மேயர் ராஜப்பா செய்தியாளர்களிடம் பேசுகையில், கடந்த அதிமுக ஆட்சியில் திண்டுக்கல் பேருந்து நிலையத்தில் புதிதாக 34 கடைகள் கட்டப்பட்டது அந்த கடைகள் மாநகராட்சி சட்ட திட்ட விதிகளுக்கு உட்பட்டு முறையாக ஏலம் விடப்பட்டுள்ளது. இதில் எந்த முறைகேடும் நடைபெறவில்லை என்றார் பாஜக மாமன்ற உறுப்பினர் தனபால் மாமன்ற கூட்டங்களில் பொது மக்களின் பிரச்சினைகள் கூறித்து பேசுவதில்லை. 

அரசியல்  கால்புணர்ச்சியாகவே பேசி வருகிறார். மாமன்ற கூட்டத்தில் குழப்பம் விளைவித்து வருகிறார். கடையில் ஏலம் விட்டது தொடர்பாக சம்பந்தப்பட்ட அதிகாரிகள் விளக்கம் அளித்தும் அதனை ஏற்க மறுத்து வாக்குவாதம் செய்வதாக குற்றம் சாட்டினார். இவர் கடை ஏலத்தில் கையூட்டு எதுவும் பெற முடியுமா என எதிர்பார்த்து தான் மாமன்ற கூட்டத்தில் பிரச்சனை எழுப்பி வருவதாக குற்றம் சாட்டினார்.

மதுரை வந்த தமிழ்நாடு எதிர்க்கட்சித் தலைவர் எடப்பாடி பழனிச்சாமிக்கு ஆர்.பி.உதயகுமார் தலைமையிலான அதிமுகவினர் உற்சாக வரவேற்பு அளித்தனர்ர்.

பொதுக்கூட்டங்களில் பங்கேற்பு

மதுரை விருதுநகர் மாவட்டங்களில் நடைபெறும் பொதுக் கூட்டங்களில் பங்கேற்பதற்காக சென்னையில் இருந்து விமான மூலம் மதுரை வந்த முன்னாள் முதல்வரும் எதிர்க்கட்சித் தலைவருமான எடப்பாடி பழனிச்சாமியை மதுரை விமான நிலையத்தில் அதிமுகவினர் சிறப்பான வரவேற்பு அளித்தனர்.

இதைத் தொடர்ந்து விருதுநகர் செல்வதற்காக மதுரை திருமங்கலம் வழியாக மேலக்கோட்டை, சிவரக்கோட்டை, கள்ளிக்குடி உள்ளிட்ட பகுதிகளில் முன்னாள் அமைச்சர் ஆர்.பி.  உதயகுமார் தலைமையிலான அதிமுகவினர் எடப்பாடி பழனிச்சாமிக்கு உற்சாக வரவேற்பு அளித்தனர்.

பழனிச்சாமிக்கு வீரவாள்!

அப்போது மேலக்கோட்டை பகுதியில் முன்னாள் அமைச்சர் ஆர்.பி.உதயகுமாரின் மகள் எடப்பாடி பழனிச்சாமிக்கு வீரவாள் வழங்கிய வரவேற்றார். தொடர்ந்து கள்ளிக்குடி வழியாக விருதுநகரில் நடைபெறும் அதிமுக பொதுக்கூட்டத்தில் பங்கேற்பதற்காக எடப்பாடி பழனிச்சாமி புறப்பட்டு சென்றார்.