சென்னை ஆழ்வார்பேட்டை சித்தரஞ்சன் சாலையில் அமைந்துள்ள முதலமைச்சர் மு.க.ஸ்டாலினின் வீட்டின் முன்பு, நேற்று காலை சுமார் 45 வயது மதிக்கத்தக்க நபர் ஒருவர், தீக்குளித்து தற்கொலைக்கு முயன்றார். இதனைக் கண்ட போலீசார், நொடிப்பொழுதில் அவர் மீது தண்ணீர் ஊற்றி தீயை அணைத்து காப்பாற்றினர். பின்னர் கீழ்ப்பாக்கம் மருத்துவமனையில் சிகிச்சைக்காக அனுமதித்தனர்.

இச்சம்பவம் தொடர்பாக விசாரணை நடத்தியதில், அந்த நபர் தென்காசி மாவட்டத்தில் ஊராட்சி மன்றத் தேர்தலில் சுயேட்சையாக போட்டியிட வேட்புமனு தாக்கல் செய்துள்ளதாகவும், சிலர் அவரை தேர்தலில் இருந்து வாபஸ் பெறச்சொல்லி மிரட்டுவதாகவும் கூறப்படுகிறது. 

இதனால் மனமுடைந்த அவர் முதலமைச்சர் மு.க.ஸ்டாலினை சந்திக்க வந்த நிலையில், தற்கொலைக்கு முயன்றதும் தெரிய வந்தது. பலத்த போலீஸ் பாதுகாப்பு இருக்கும், முதலமைச்சரின் வீட்டின் முன்பு அரங்கேறிய இந்த சம்பவம், நேற்று பரபரப்பை ஏற்படுத்திய நிலையில், தற்போது இச்சம்பவத்தின் சிசிடிவி காட்சி வெளியாகி, நெஞ்சை பதற வைத்துள்ளது.

தமிழகம் முழுவதும் கொரோனா பாதிப்பு சமமான அளவில் இருந்து வரும் நிலையில், கூடுதல் தளர்வுகள் வழங்குவது தொடர்பாகவும், 6 முதல் 8ம் வகுப்பு வரை பள்ளிகள் திறப்பது குறித்தும் சுகாதாரத்துறை, பள்ளிக்கல்வித்துறை அதிகாரிகள் மற்றும் தமிழக அரசின் உயர் அதிகாரிகளுடன் தமிழ்நாடு முதலமைச்சர்  மு.க.ஸ்டாலின் இன்று ஆலோசனை மேற்கொள்கிறார்.

தமிழகத்தில் கடந்த மே மாதம் 7-ம் தேதி புதிய அரசு பதவி ஏற்றபோது கொரோனா தொற்று பரவல் தொடர்ச்சியாக அதிகரித்தது. கொரோனா பாதித்தவர்களின் எண்ணிக்கை நாள் ஒன்றிற்கு 36 ஆயிரத்தை கடந்தது.

அதைத் தொடர்ந்து தமிழகம் முழுவதும் தளர்வுகளுடன் மே 10ம் தேதி முதல் ஊரடங்கு அமல்படுத்தப்பட்டது..இருப்பினும், கொரோனா தாக்கம் குறையாத நிலையில், முழு ஊரடங்கு உத்தரவை அமல்படுத்தும்படி முதலமைச்சர் மு.க.ஸ்டாலின் உத்தரவிட்டார்.  அதன்படி மே 24ம் தேதி முதல் ஜூன் 7ம் தேதி வரை முழு ஊரடங்கு அமல்படுத்தப்பட்டது.

அதன் பின்னர் பொதுமக்களின் நலன் கருதி சில தளர்வுகளை தமிழக அரசு அறிவித்து வருகிறது. அக்டோபர் 31ம் தேதி வரை ஊரடங்கு அமல்படுத்தப்பட்டு நடைமுறையில் இருந்து வருகிறது.

மேலும், செப்டம்பர் 1ம் தேதி முதல் 9ம் வகுப்பில் இருந்து 12ம் வகுப்பு வரை மாணவர்களுக்கு பள்ளிகள் திறக்கப்பட்ட நிலையில், ஒரு சில மாவட்டங்களில் பள்ளி மாணவ, மாணவிகளுக்கும் ஆசிரியர்களுக்கும் கொரோனா உறுதி செய்யப்பட்டது.

எனவே, மாணவ, மாணவிகளுக்கு கொரோனா பரவலைக் கட்டுப்படுத்த கூடுதல் நடவடிக்கைகள் எடுக்க அரசு வலியுறுத்தியிருந்தது, இதுத்தொடர்பான அறிக்கையும் அண்மையில் தமிழ்நாடு முதலமைச்சரிடம் தாக்கல் செய்யப்பட்டது.

இந்த நிலையில், இன்று நடைப்பெறும் ஆலோசனையில், முதற்கட்டமாக,6 முதல் 8ம்  வகுப்பு வரையிலான மாணவர்களுக்கு பள்ளிகள் திறப்பது, வார இறுதி நாள்களில் கோயில்கள் மூடப்பட்டிருப்பதில் தளர்வுகளை அறிவிப்பது தொடர்பாக முக்கிய முடிவு எடுக்கப்படுவதற்கான வாய்ப்புகள் உள்ளது.
 
அதேப்போல், தொற்று எண்ணிக்கை அதிகமுள்ள மாவட்டங்களில் கூடுதல் கவனம் செலுத்த உத்தரவிடப்பட்டுள்ள நிலையில், தடுப்பூசி செலுத்தும் பணியை துரிதப்படுத்தி எடுக்கப்பட வேண்டிய முன்னெச்சரிக்கை நடவடிக்கை தொடர்பாகவும் ஆலோசனை மேற்கொள்ளப்பட்டதாக தகவல்கள் வெளியாகியுள்ளது.

இந்த ஆலோசனை கூட்டத்திற்கு பின், பள்ளிகள் திறப்பது தொடர்பான அதிகாரப்பூர்வ அறிவிப்பு இன்று மாலை அல்லது நாளை வெளியாக வாய்ப்புள்ளது.

தஞ்சாவூரை சோ்ந்தவா் குமரவேல் (31). கட்டடத் தொழிலாளியான இவா் கடந்த 8 ஆண்டுகளுக்கு முன்பு வேலைக்காக சவுதி அரேபியாவில் உள்ள ரியாத்திற்கு சென்றாா்.அங்கு கட்டிடத்தொழிலாளியாக வேலை செய்து வந்தாா்.

குமாரவேலுக்கான விசா காலம் முடிந்த பின்பும்,இவா் இந்தியாவிற்கு திரும்பி வராமல், சவுதி அரேபியாவிலேயே சட்டவிரோதமாக  தங்கியிருந்து  வேலை செய்து உள்ளார்.

இந்நிலையில் குமாரவேலுக்கு தற்போது சொந்த நாட்டிற்கு திரும்ப வேண்டும் என்ற ஆசை ஏற்பட்டது.ஆனால் காலாவதியான விசாவுடன் திரும்பி வரமுடியாத நிலையில் அந்த நாட்டு விமானநிலையத்தில் குடியுரிமை அதிகாரிகள் கண்டுப்பிடித்து கைது செய்து சிறை தண்டனை உட்பட கடுமையான தண்டையை அளிப்பாா்கள் என்று பயந்தாா்.

இந்நிலையில் அருகே உள்ள ஏமன் நாட்டிற்கு சென்றுவிட்டால், அங்கிருந்து போலி விசா போன்ற ஆவணங்களை பணம் கொடுத்து வாங்கி,சாா்ஜா வழியாக இந்தியாவிற்கு சென்றுவிடலாம் என்று நண்பா்கள் சிலா் கூறினா்.ஏமன் இந்திய அரசால் தடை செய்யப்பட்ட நாடு,என்பது தெரிந்தும் குமாரவேல்,15 நாட்களுக்கு முன்பு ஏமனுக்கு சென்றுவிட்டாா்.

ஏமனில் சட்டவிரோதமாக தங்கியிருந்து, சில ஏஜெண்ட்கள் மூலம் போலி விசா வாங்க ஏற்பாடு செய்தாா். இதற்கிடையே ஏமன் நாட்டு குடியுரிமை அதிகாரிகளுக்கு, குமாரவேல் பற்றிய தகவல் கிடைத்தது.  இதையடுத்து அந்நாட்டு குடியுறிமை அதிகாரிகள் குமாரவேலை கைது செய்து முகாமில் வைத்தனா். அதன்பின்பு அவரை இந்தியாவிற்கு  திருப்பி அனுப்ப முடிவு செய்தனா்.

அதன்படி குடியுரிமை அதிகாரிகள் குமாரவேலை சாா்ஜா வழியாக ஏா் அரேபியா விமானத்தில் சென்னைக்கு அனுப்பி வைத்தனா். அதோடு சென்னை விமானநிலைய குடியுரிமை அதிகாரிகளுக்கும் தகவல் தெரிவித்து விட்டனா்.

இதையடுத்து சென்னை விமானநிலையத்தில் குடியுரிமை அதிகாரிகள், இந்திய அரசால் பாதுகாப்பு காரணங்களுக்காக   தடை செய்யப்பட்ட ஏமன் நாட்டிற்கு சென்ற குற்றத்திற்காக கைது செய்தனா். குமாரவேலிடம் பல மணி நேரம் விசாரித்தனா் அதோடு மத்திய உளவுத் துறையினரும் விசாரணை நடத்தினா் குமாரவேலின் செல்போன் பதிவுகளை முழுமையாக ஆய்வு செய்தனா். மேலும் குமாரவேல் ஏமனில் எங்கு தங்கியிருந்தாா்? இந்திய அரசின் தடையை மீறி,ஏமன் நாட்டிற்கு சென்றது ஏன்? என்றும் விசாரணை நடந்தது. 

அதன்பின்பு  சென்னை விமானநிலைய போலீசில் ஒப்படைத்தனா். சென்னை விமான நிலைய போலீசாரும் பாஸ்போா்ட்டை தவறாக பயன்படுத்துதல், அரசால் தடை செய்யப்பட்ட நாட்டிற்கு சட்ட விரோதமாக சென்றது உள்ளிட்ட பிரிவுகளில் வழக்குப்பதிவு செய்து விசாரணை நடத்தி வருகின்றனர்.

நீலகிரி மாவட்டம் கூடலூர் அருகே தேயிலைத் தோட்டத்திற்குள் உலா வரும் புலி, மனிதர்களையும் மாடுகளையும் தாக்கி கொன்றுள்ளது. தேவன் எஸ்டேட் பகுதியில் பதுங்கி உள்ள புலியின் நடமாட்டத்தை நேரில் பார்த்ததாக மக்கள் கூறியதன் அடிப்படையில் தேடுதல் வேட்டை நடைபெற்று வருகிறது.

10 க்கும் மேற்பட்ட இடங்களில் கண்காணிப்பு கேமராக்கள் பொருத்தப்பட்டு 4 இடங்களில் கூண்டுகள் வைக்கப்பட்டுள்ளன.மேலும் மரங்களின் மீது பரண்கள் அமைத்து கண்காணிப்பு பணிகளை வனத்துறையினர் மேற்கொண்டு வருகின்றனர். 

புலியை மயக்க ஊசி செலுத்தி பிடித்து வண்டலூர் பூங்காவிற்கு கொண்டு செல்ல முடிவு செய்யப்பட்டுள்ளது. கேரள மாநிலத்தில் இருந்து வந்துள்ள 15 பேர் கொண்ட குழு, பிரத்யேக உடை அணிந்து, வனப்பகுதியில் முகாமிட்டு கண்காணித்து வருகிறது.  

புலியை பிடிக்கும் வரை இரவு நேரங்களில் எந்த காரணத்திற்காகவும் பொதுமக்கள் வீட்டை விட்டு வெளியே வர வேண்டாம் என வனத்துறையினர் எச்சரிக்கை விடுத்துள்ளனர்.

அண்ணா பல்கலை இணைப்பில் உள்ள 440 இன்ஜினியரிங் கல்லுாரிகளில், மாணவர் சேர்க்கைக்கான, 'ஆன்லைன்' கவுன்சிலிங் 17ம் தேதி துவங்கியது.6,000 இடங்கள் ஒதுக்கீடுமொத்தம் 1.52 லட்சம் இடங்களுக்கு 1.39 லட்சம் மாணவர்கள் விண்ணப்பித்துள்ளனர். அவர்களில், சிறப்பு ஒதுக்கீட்டு பிரிவு மாணவர்களுக்கு முதற்கட்ட கவுன்சிலிங் நடந்துள்ளது.இதில்,அரசு பள்ளி மாணவர்களுக்கான 7.5 சதவீத இட ஒதுக்கீடு, விளையாட்டு பிரிவு, மாற்று திறனாளிகள் மற்றும் முன்னாள் ராணுவ வீரர்களுக்கான பிரிவினருக்கு இடங்கள் ஒதுக்கப்பட்டுள்ளன.   

மொத்தம் 6,000 இடங்கள் ஒதுக்கீடு செய்யப்பட்டுள்ளன. இதையடுத்து, பொது பிரிவில் சேரும் மாணவர் களுக்கான, கட்டணம் செலுத்தும் வசதி நேற்று துவங்கியது. இதில், தரவரிசை பட்டியலில், 14 ஆயிரத்து 788 வரை உள்ளவர்கள் மட்டும், 30-ம் தேதி மாலை 5:00 மணி வரை கவுன்சிலிங் கட்டணம் செலுத்தலாம் என்று அறிவிக்கப்பட்டுள்ளது.

உத்தேச ஒதுக்கீடு இந்த மாணவர்களுக்கு, அக்டோபர்  1-ம் தேதி முதல் விருப்பமான கல்லுாரிகள் மற்றும் பாட பிரிவுகளுக்கான பதிவு துவங்கி, 2-ம் தேதி முடிகிறது. 3-ம் தேதி உத்தேச ஒதுக்கீடும், 5ம் தேதி இறுதி ஒதுக்கீடும் வழங்கப்படும்.இதையடுத்து, தரவரிசைபட்டியலில் இரண்டு, மூன்று, நான்காம் கட்டங்களில் உள்ள மாணவர்களுக்கு, படிப்படியாக கட்டணம் செலுத்தும் வசதி மற்றும் விருப்ப பதிவு நடந்து, இடங்கள் ஒதுக்கப்பட உள்ளன.