அரசு விரைவுப் பேருந்துகள்

அரசு விரைவு போக்குவரத்துக் கழகம் சார்பில் 300 கி.மீ-க்கு அதிகமான தொலைவில் பேருந்துகள் இயக்கப்படுகின்றன. இந்த பேருந்துகளின் பக்கவாட்டில் உள்ள சுமைப் பெட்டிகளை மாதம் மற்றும் நாள் அடிப்படையில் வாடகைக்கு விடுவதற்கான அறிவிப்பை போக்குவரத்துத்துறை அமைச்சர் சட்டப்பேரவையில் வெளியிட்டார்.

இதையடுத்து ஆகஸ்ட் 3-ம் தேதி முதல் இத்திட்டம் அமல்படுத்தப்பட்டது. இது வணிகர்கள் மற்றும் பொதுமக்களிடையே பெரும் வரவேற்பையும் பெற்றது.குறிப்பாக திட்டம் தொடங்கிய முதல் நாளில் மட்டும் பல்வேறு இடங்களுக்கு 18 பார்சல்கள் அனுப்பி வைக்கப்பட்டன.

பார்சல் அனுப்பும் வசதி

இவ்வாறு சிறு, குறு வியாபாரிகள், பொதுமக்கள் என பல தரப்பினரும் தங்களது பார்சல்களை அனுப்ப அரசு விரைவு பேருந்துகளில் உள்ள சுமைப் பெட்டிகளைப் பயன்படுத்தி வருகின்றனர். இதற்கு அந்தப் பகுதியில் உள்ள விரைவு போக்குவரத்துக் கழக அலுவலகத்தில் உள்ள கிளை மேலாளர்களை அணுகி, பார்சல்களை முன்பதிவு செய்து அனுப்பி வருகின்றனர். இந்நிலையில் திட்டத்தை மேலும் எளிமையாக்கும் வகையில், டிஎன்எஸ்டிசி செயலியில் பார்சல்களை முன்பதிவு செய்வதற்கான வசதி விரைவில் அறிமுகப்படுத்தப்படவுள்ளது.

முன்பதிவு

இதுகுறித்து விரைவு போக்குவரத்துக் கழக உயரதிகாரி ஒருவர் கூறியதாவது, அரசு விரைவு பேருந்துகள் மூலம் நாள் ஒன்றுக்கு சராசரியாக 25 முதல் 35 பார்சல்கள் அனுப்பப்படுகின்றன. இதன் மூலம் சராசரியாக ரூ.9 முதல் ரூ.11 ஆயிரம் வரை வருவாய் கிடைக்கிறது.  குறிப்பாக தூத்துக்குடி, ஓசூர், சேலம், திருப்பூர், கோவை உள்ளிட்ட நகரங்களில் அதிகளவு வாடிக்கையாளர்கள் உள்ளனர்.

அவர்கள் பன்னீர், பூ, இயந்திர உதிரி பாகங்கள், பனியன் துணிகள் போன்றவற்றை அதிகளவு அனுப்பி வருகின்றனர்.முதலில் பார்சல்களை அனுப்புவதற்கு பணிமனைகளில் முன்பதிவு செய்யுமாறு கூறியிருந்தோம்.பின்னர் பயணச்சீட்டு முன்பதிவு மையங்களில் முன்பதிவு செய்வதற்கான ஏற்பாடுகளைச் செய்தோம். இதில் சில சிக்கல்கள் உள்ளன. இதனால் முன்பதிவு நடைமுறையை எளிமைப்படுத்தும் வகையில், அரசு விரைவு பேருந்துகளின் இருக்கையை முன்பதிவு செய்ய பயன்படும் டிஎன்எஸ்டிசி செயலியிலேயே பார்சல்களை அனுப்ப முன்பதிவு செய்யும் வகையில் ஏற்பாடு செய்யப்படுகிறது.

10 நாட்களில்...

இந்தச் செயலியில் முன்பதிவுக்கான கட்டணத்தையும் செலுத்திக் கொள்ள முடியும். இந்த வசதி 10 நாள்களுக்குள் பயன்பாட்டுக்கு வரும். இதன் மூலம் நடத்துநருக்கும் பார்சலை எங்கு இறக்க வேண்டும் என தெளிவு கிடைக்கும். பேருந்து புறப்படும் வரை பார்சல் முன்பதிவு செய்தவர் வராமல் இருந்தாலும், நடத்துனரே செயலி மூலம் வாடிக்கையாளரைத் தொடர்பு கொண்டு, பார்சலை எடுத்து வர அறிவுறுத்த முடியும். இதன் மூலம் காகித பயன்பாடு குறைவதோடு, டிஜிட்டல் முறையில் பரிவர்த்தனையைக் கையாள முடியும் என கூறினார்.

தனித்துவ குரலுக்கு சொந்தக்காரரான பிரபல செய்தி வாசிப்பாளர் சரோஜ் நாராயண ஸ்வாமி மும்பையில் காலமானார். அவருக்கு வயது 87.

தனித்துவ குரல்

வானொலியில் ஒரு காலத்தில் அதிகாலையில் ஒலித்த ஆகாசவாணி செய்திகள் வாசிப்பது சரோஜ் நாராயண ஸ்வாமி என்ற தனித்துவமான குரலுக்கு சொந்தக்காரரான இவர், மும்பையில் குடும்பத்தினருடன் வசித்து வந்தார்.

முதல் தமிழ் செய்தி வாசிப்பாளர்

இந்திய வானொலியின் முதல் தமிழ் செய்தி வாசிப்பாளர் என்ற பெருமையை பெற்ற இவர்தான், முன்னாள் பிரதமர் இந்திராகாந்தியின் இறப்புச் செய்தியையும் வானொலியில் தெரியப்படுத்தினார். அப்போது, பிரதமர் என்பதற்கு பதிலாக அன்னை இந்திரா காந்தி என்று மாற்றி செய்தி வாசித்து அனைவரது பாராட்டையும் பெற்றார்.   

கலைமாமணி விருது

அகில இந்திய வானொலியில் 35 ஆண்டுகள் பணியாற்றி விடைபெற்ற சரோஜ் நாராயண ஸ்வாமி, பின்னர், தமிழ் படங்கள், ஆவணப் படங்கள் உள்ளிட்டவற்றிக்கு பின்னணி குரல் கொடுத்து வந்தார். ஒலிபரப்புத்துறையில் பெண்களுக்கு முன்னோடியாக திகழ்ந்த அவருக்கு, தமிழக அரசு கலைமாமணி விருது வழங்கி பெருமைப்படுத்தியது. தனது தனித்துவமான குரலால் லட்சக்கணக்கான தமிழர்களை வசீகரித்த சரோஜ் நாராயண ஸ்வாமியின் மறைவு வானொலி நேயர்களுக்கு அதிர்ச்சியை ஏற்படுத்தியுள்ளது. அவரது மறைவுக்கு பல்வேறு தரப்பினரும் இரங்கல் தெரிவித்து வருகின்றனர்.

நிதியமைச்சர் பிடிஆர் பழனிவேல் தியாகராஜன் வாகனம் மீது பாஜகவினர் காலணி வீசியதற்கு கண்டனம் தெரிவித்துள்ள திமுக, கட்சி தொண்டர்கள் அமைதி காக்க வேண்டும் என்று கேட்டுக்கொண்டுள்ளது.

இதுதொடர்பாக திமுக பொதுச் செயலாளர் துரைமுருகன் வெளியிட்டுள்ள அறிக்கையில், பாஜகவினரின் அருவருக்கத்தக்க, அரசியல் பண்பாடற்ற செயலுக்கு கடும் கண்டனத்தை தெரிவித்துக்கொள்வதாக குறிப்பிட்டுள்ளார்.   

ஊரெல்லாம் தேசியக் கொடி ஏற்ற வேண்டிய நேரத்தில், தேசியக் கொடி பறந்த காரில் செருப்பு வீசியதன் மூலமாக பா.ஜ.க.வின் கீழ்த்தர அரசியலைத் தமிழ்நாட்டு மக்கள் நன்கு உணர்ந்துள்ளார்கள் என்று அவர் கூறியுள்ளார்.

திமுக ஜனநாயகத்தில் நம்பிக்கையுள்ள இயக்கம் - சட்டத்தின் ஆட்சியை கடைப்பிடிக்கும் இயக்கம் என்று குறிப்பிட்டுள்ள பொதுச் செயலாளர் துரைமுருகன், அமைச்சரின் கார்மீது காலணி வீசியவர்கள் - தூண்டி விட்டவர்கள் – துணைபோனவர்கள் ஆகியோர் மீது காவல்துறை உரிய நடவடிக்கையை எடுத்துக் கொண்டிருப்பதால் திமுக தொண்டர்கள் அமைதி காக்க வேண்டும் என வேண்டுகோள் விடுத்துள்ளார்.

நிதியமைச்சர் பிடிஆர் பழனிவேல் தியாகராஜன் வாகனம் மீது காலணி வீசிய பாஜகவினரின் அராஜக செயலைக் கண்டித்து, தமிழகத்தின் பல்வேறு பகுதிகளில் திமுகவினர் போராட்டத்தில் ஈடுபட்டனர்.

கிருஷ்ணகிரி மாவட்டம் ஒசூரில் மாநகர பேருந்து நிலையம் முன்பாக திரண்ட திமுகவினர், திடீரென சாலை மறியலில் ஈடுபட்டனர். அப்போது, பாஜகவினரின் அராஜகத்தைக் கண்டித்தும், மாநில தலைவர் அண்ணாமலைக்கு எதிராகவும் அவர் கோஷங்கள் எழுப்பினர். மேலும், அண்ணாமலையின் உருவ பொம்மையை செருப்பால் அடித்து தங்களது எதிர்ப்பைக் காட்டினர்.

தேனி பங்களாமேடு அருகே திரண்ட தேனி வடக்கு மாவட்ட திமுக தகவல் தொழில்நுட்ப அணியினர், பாஜகவினருக்கு எதிராக கோஷங்களை எழுப்பினர். தொடர்ந்து, பாஜக மாநில தலைவர் அண்ணாமலையின் உருவ பொம்மையை தீயிட்டு கொளுத்தினர். இதேபோல், மதுரை உள்ளிட்ட பல்வேறு பகுதிகளிலும் திமுகவினர் போராட்டத்தில் இறங்கியுள்ளதால் தமிழகம் முழுவதும் பரபரப்பு ஏற்பட்டுள்ளது.

பாஜகவில் இருந்து விலகுவதாக மதுரை மாநகர்  மாவட்ட தலைவர் டாக்டர் சரவணன் அதிரடியாக அறிவித்துள்ளார். தாக்குதல் சம்பவத்துக்காக நிதியமைச்சர் பழனிவேல் தியாராஜனை நேரில் சந்தித்து மன்னிப்பு கேட்டதாகவும் கூறியுள்ளார்.

நிதியமைச்சர் பழனிவேல் தியாகராஜன் வாகனம் மீது பாஜகவினர் காலணியை வீசிய சம்பவம், தமிழகத்தில் பரபரப்பை ஏற்படுத்தியுள்ளது. இந்நிலையில், மதுரை மாநகர் மாவட்ட பாஜக தலைவர் டாக்டர் சரவணன், நிதியமைச்சர் பிடிஆர் பழனிவேல் தியாகராஜன் வீட்டிற்கு நள்ளிரவில் நேரில் சந்தித்து மன்னிப்பு கோரினார். பின்னர் செய்தியாளர்களை சந்தித்த அவர், தனக்கு வெறுப்பு அரசியல், மத அரசியல் ஒத்துவரவில்லை என்றும் இன்று காலை தனது ராஜினாமா கடிதத்தை அளிக்கவுள்ளதாகவும் தெரிவித்தார். 

திமுகவை சேர்ந்த டாக்டர் சரவணன், கடந்த ஆண்டு தான் அக்கட்சியில் இருந்து விலகி பாஜகவில் இணைந்தார். மதுரை மாநகர் மாவட்ட பாஜக தலைவராக செயல்பட்டு வந்த அவர், தற்போது பாஜகவில் இருந்து விலகுவதாக அறிவித்துள்ள நிலையில், மீண்டும் திமுகவில் இணையலாம் என எதிர்பார்க்கப்படுகிறது.