விழுப்புரத்தில் காமராஜர் வீதியில் உள்ள பெரியார் சிலை மீது கண்டெய்னர் லாரி மோதியதில் பெரியார் சிலை முற்றிலுமாக சேதமடைந்த நிலையில் இதுதொடர்பான சிசிடிவி காட்சிகள் வெளியாகியுள்ளது.

புதுச்சேரியில் இருந்து பூனேவிற்கு டயர் ஏற்றிச்சென்ற கண்டெய்னர் லாரி ஒன்று நேற்று இரவு விழுப்புரம் நோக்கி வந்துள்ளது. மகாராஷ்டிராவை சேர்ந்த ஓட்டுனர் மகேந்திர சவலி என்பவர் லாரியை ஓட்டி வந்த நிலையில், வழி தெரியாததால் கூகுள் மேப்பை பார்த்து இயக்கியுள்ளார்.

அப்போது தவறுதலாக குறுகலான பாதையில் சென்றதால் வாகனத்தை திருப்பிய போது காமராஜர் வீதியில் இருந்த பெரியார் சிலை மீது லாரி வேகமாக மோதியது. இதில் பெரியார் சிலை சரிந்து விழுந்து முற்றிலுமாக சேதமடைந்தது. இது தொடர்பான சிசிடிவி காட்சிகள் வெளியாகியுள்ளது. 

பெரியார் சிலை சேதமடைந்தது குறித்து பரவிய தகவலை அடுத்து அங்கு ஏராளமானோர் திரண்டனர். அப்போது, பெரியார் சிலை சேதம் அடைந்ததற்கு பாஜக தான் காரணம் எனக்கூறி, சேதமடைந்த பெரியார் சிலை முன்பு திமுகவினர் ஆர்ப்பாட்டத்தில் ஈடுபட்டனர். போலீசார் நடத்திய பேச்சுவார்த்தையை அடுத்து அவர்கள் போராட்டத்தை கைவிட்டனர்.

ராமேஸ்வரம் மீன்பிடித் துறைமுகத்தில் இருந்து 500க்கும் மேற்பட்ட விசைப்படகுகள் மூலம் மீனவர்கள் மீன்பிடிக்க சென்றுள்ளனர்.

இந்நிலையில் கச்சத்தீவு பகுதியில் மீனவர்கள் மீன்பிடித்துக் கொண்டிருந்த போது ராமேஸ்வரம் தங்கச்சிமடம் பகுதியைச் சேர்ந்த வஸ்தியான் என்பவருக்கு சொந்தமான விசைப்படகு மீது  இலங்கை கடற்படையின் கப்பல் மோதியதாக கூறப்படுகிறது..

இதனால் படகில் இருந்த 7 மீனவர்கள் கடலில் மூழ்கி தத்தளித்தனர்.  இவர்களை சக மீனவர்கள் மீட்டு கரைக்கு அழைத்து வந்துள்ளனர். இந்நிலையில், இலங்கை கடற்படையினர் மோதி கடலில் மூழ்கிய விசைப்படகை மீட்டுத்தருமாறு மீன்வளத்துறை அதிகாரிகளிடம் படகு உரிமையாளர் மனு அளித்துள்ளார்.

மேலும், வாழ்வாதாரத்திற்காக கடலுக்கு செல்லும் மீனவர்களிடம் தொடர்ந்து அத்துமீறலில் ஈடுபடும் இலங்கை கடற்படையினரின் செயலை தடுத்து நிறுத்த மத்திய அரசு உரிய நடவடிக்கை எடுக்க வேண்டும் என கோரிக்கை வைக்கப்பட்டுள்ளது.

நகா்ப்புற உள்ளாட்சித் தோ்தலுக்கான இரண்டாம் கட்ட வேட்பாளா் பட்டியலை மக்கள் நீதி மய்யம் கட்சியின் தலைவா் கமல்ஹாசன் வெளியிட்டுள்ளார்.

தமிழகத்தில் நகர்ப்புற உள்ளாட்சித் தேர்தலுக்கான தேதி விரைவில் அறிவிக்கப்படவுள்ளது. இதனிடையே கடந்த வாரம்  மக்கள் நீதி மய்யம் சார்பில் போட்டியிடும் கோவை மாநகராட்சியின் 47 வாா்டுகளுக்கான வேட்பாளா்கள் பட்டியல் வெளியிடப்பட்டது. 

இந்நிலையில், தற்போது, இரண்டாம் கட்டமாக சென்னை, ஆவடி, மதுரை மாநகராட்சிகளுக்கான 51 வேட்பாளர்கள் அடங்கிய பட்டியலை கமல்ஹாசன் வெளியிட்டுள்ளார்.

தமிழகத்தில் கடந்த 2016ஆம் ஆண்டு நடைபெற வேண்டிய உள்ளாட்சித் தேர்தல் மூன்றாண்டுகளாக நடத்தப்படாமல் இருந்தது. இந்த நிலையில், உச்சநீதிமன்ற உத்தரவையடுத்து, 2019ஆம் ஆண்டில் நடைபெற்றது.

அப்போது, புதிதாக உருவாக்கப்பட்ட 9 மாவட்டங்களுக்கு உள்ளாட்சி தேர்தல் நடத்தப்படவில்லை. இதையடுத்து மீண்டும் உச்ச நீதிமன்றத்தின் உத்தரவைத் தொடர்ந்து, விடுபட்ட 9 மாவட்ட ஊராட்சிகளுக்கு கடந்த ஆண்டு அக்டோபர் மாதம் 2 கட்டங்களாக தேர்தல் நடைபெற்றது.

இதில், பெரும்பான்மையான இடங்களை திமுக கைப்பற்றியது. ஆனால், 21 மாநகராட்சிகள், 138 நகராட்சிகள், 490 பேரூராட்சிகளுக்கு தேர்தல் நடத்தப்படவில்லை. உள்ளாட்சித் தேர்தல் தொடர்பான வழக்கில், வரும் 31ஆம் தேதிக்குள் தமிழகத்தில் நகர்ப்புற உள்ளாட்சித் தேர்தலை நடத்தி முடிக்க வேண்டும் என உச்ச நீதிமன்றம் உத்தரவிட்டது.  இது தொடர்பான வழக்கு வரும் 24ஆம் தேதியன்று உச்சநீதிமன்றத்தில் மீண்டும் விசாரணைக்கு வரவுள்ளது.

இதனிடையே, தமிழகத்தில் உள்ள 21 மாநகராட்சிகள், 138 நகராட்சிகள் மற்றும் 490 பேரூராட்சிகள் என அனைத்து நகர்ப்புற உள்ளாட்சி அமைப்புகளுக்கும் தேர்தல் நடத்தும் பணியை மாநில தேர்தல் ஆணையம் முடுக்கிவிட்டுள்ளது.

இந்த நிலையில், நகர்ப்புற உள்ளாட்சி தேர்தல்களை சுமுகமாக நடத்துவது குறித்து அங்கீகரிக்கப்பட்ட அரசியல் கட்சிகளுடன் மாநில தேர்தல் ஆணையம், சென்னை அரும்பாக்கத்தில் உள்ள அலுவலகத்தில் ஆலோசனை மேற்கொண்டது.

இதில், மாநில தேர்தல் ஆணையர் பழனிகுமார், தேர்தல் ஆணைய செயலாளர் சுந்தரவல்லி மற்றும் உயர் அதிகாரிகள் கலந்துகொண்டு அரசியல் கட்சிகளின் கருத்துகளை கேட்டறிந்தனர்.

அப்போது, நகர்ப்புற உள்ளாட்சி தேர்தலை ஒரே கட்டமாக நடத்த வேண்டும் என அனைத்து கட்சிகளும் மாநில தேர்தல் ஆணையத்திடம் வலியுறுத்தியுள்ளது. முன்னதாக, தேர்தலை நடத்துவதற்கான அறிவிப்பு இன்று அல்லது வரும் 24ஆம் தேதியன்று தேர்தல் தேதி அறிவிக்கப்பட வாய்ப்புள்ளதாக தகவல்கள் வெளியாகியுள்ளன. 

அதிமுக முன்னாள் உயர் கல்வித்துறை அமைச்சர் கே.பி.அன்பழகனுக்கு தொடர்புடைய 57 இடங்களில் லஞ்ச ஒழிப்புத்துறை சோதனை நடைபெற்று வருகிறது. 

தமிழகத்தில் அடுத்தடுத்து அதிமுகவை சேர்ந்த முன்னாள் அமைச்சர்களின் வீடுகளில் லஞ்ச ஒழிப்புத்துறையினர் அதிரடி சோதனை மேற்கொண்டனர். அண்மையில், முன்னாள் அமைச்சர் தங்கமணிக்கு சொந்தமான இடங்களில் சோதனை நடைபெற்றது. இதே போன்று முன்னாள் அதிமுக அமைச்சர்கள் விஜயபாஸ்கர், எம்.ஆர்.விஜய பாஸ்கர், எஸ்.பி வேலுமணி, கே.  சி வீரமணி உள்ளிட்டோருக்கு சொந்தமான இடங்களில் லஞ்ச ஒழிப்புத்துறையினர் சோதனை நடத்தினர். 

இந்தநிலையில், இன்று காலை முதல் முன்னாள் அமைச்சர் கே.பி.அன்பழகனுக்கு  சொந்தமான 57 இடங்களில் லஞ்ச ஒழிப்புத்துறையினர் சோதனை நடத்தி வருகின்றனர். இதனால் அவரது வீட்டின் முன்பு போலீசார் குவிக்கப்பட்டுள்ளனர். இதற்கிடையே, கே.பி.அன்பழகனின் மனைவி மல்லிகா, மகன்கள் சசிமோகன், சந்திரமோகன், மருமகள் வைஷ்ணவி ஆகியோர் மீதும் லஞ்ச ஒழிப்புத்துறை வழக்குப்பதிவு செய்துள்ளதாக தகவல் வெளியாகியுள்ளது.