சென்னை ஓமந்தூரார் அரசு பன்னோக்கு மருத்துவமனையில் சிகிச்சை பெற்று வரும் குத்துச்சண்டை வீரர் பாலாஜியை நேரில் சந்தித்து, உடல் நலம் குறித்து  அமைச்சர் மா.சுப்பிரமணியன் விசாரித்தார்.

 தொடர்ந்து செய்தியாளர்களை சந்தித்த அவர், குத்துச்சண்டை வீரர் பாலாஜிக்கு பயிற்சியின் போது விபத்து ஏற்பட்டதன் காரணமாக சிகிச்சை பெற்று  வருவதாக  தெரிவித்தார். 

மேலும் தேசிய நலவாழ்வு குழுமத்தில் பணியாற்றும் ஊழியர்களுக்கு 30 சதவீத ஊதிய உயர்வு வழங்கப்பட உள்ளதாகவும்,  அதேபோல் இரண்டாயிரத்து 448 முன்களப் பணியாளர்களுக்கும் ஊதிய உயர்வு வழங்கப்படும் என அமைச்சர் உறுதியளித்தார்.

வெப்பச்சலனம் காரணமாக தமிழகம் மற்றும் புதுச்சேரியின் பல்வேறு பகுதிகளில் இடி மின்னலுடன் கூடிய  மிதமான மழை பெய்து வருகிறது.

இதுகுறித்து சென்னை வானிலை ஆய்வு மையம் வெளியிட்டுள்ள அறிக்கையில்,  தமிழகம், புதுச்சேரி மற்றும் காரைக்கால் பகுதிகளில் இன்றும் நாளையும் பரவலாக மழை பெய்யக் கூடும் என தெரிவிக்கப்பட்டுள்ளது.

அடுத்த ஐந்து நாட்களுக்கு தமிழகத்தின் பல்வேறு பகுதிகளிலும், புதுச்சேரியிலும் இடி மின்னலுடன் கூடிய மிதமான மழை பெய்ய வாய்ப்புள்ளதாக தெரிவித்துள்ள வானிலை மையம்,

சென்னையை பொறுத்தவரை அடுத்த 48 மணி நேரத்திற்கு வானம் ஓரளவு மேகமூட்டத்துடன் காணப்படும் என்றும், நகரின் சில இடங்களில் இடி மின்னலுடன் கூடிய மிதமான மழை பெய்யக்கூடும் என்றும் குறிப்பிட்டுள்ளது. 

மத்திய கிழக்கு வங்கக்கடல் மற்றும் அதனை ஒட்டிய வடக்கு அந்தமான் கடல் பகுதிகளில் சூறாவளிக்காற்று மணிக்கு 40 முதல் 50 கிலோ மீட்டர் வேகத்தில்  வீசக்கூடும் என்பதால், அடுத்த 5 நாட்களுக்கு மீனவர்கள் எச்சரிக்கையுடன் இருக்குமாறு அறிவுறுத்தப்பட்டுள்ளது.

செம்மேடு கிராமத்தில் பெட்ரோல் பங்க் திறப்பு விழா நிகழ்ச்சியில் கலந்து கொண்ட ஓ பன்னீர் செல்வம், மேடையில் ஒரு சிலருக்கு மட்டும் நலத்திட்ட உதவிகளை வழங்கி விட்டு கிளம்பிச் சென்றார்.

இதைத்தொடர்ந்து அங்கு வைக்கப்பட்டிருந்த மரக்கன்றுகளை கண்ணிமைக்கும் நேரத்தில் பொதுமக்கள் அள்ளிச்சென்றனர்.

நலத்திட்ட உதவிகள் அளிக்கும் நோக்கில் அரிசி மூட்டைகள் இருந்த இடத்தில் கூடியோர், மக்கள் வெள்ளத்தில் தத்தளித்த போதும் மூட்டைகளை பெற்றுச் சென்றனர்.

இந்நிலையில் கல்யாண சீர்வரிசைக்காக வைக்கப்பட்டிருந்த பீரோவை ஒருவர் அலேக்காக தூக்க முயற்சித்து தட்டுத் தடுமாறி அதனை எடுத்துச் சென்றார்.  ஒருவர் பீரோவை தலையில் தூக்கிக்கொண்டு கரும்பு தோட்டத்திற்குள் மறைந்த நிகழ்வும் நடைபெற்றது.

இதற்கெல்லாம் ஒரு படி மேலே சென்று துண்டிலும், கட்டைப்பையிலும், வாளியிலும் மக்கள் பிரியாணியை எடுத்துச் சென்ற நிகழ்வும் அரங்கேறியது.

சரியான நிகழ்ச்சி நிரலில் நிகழ்வு ஏற்பாடு செய்யப்படாததாலும், போதுமான போலீசார் பாதுகாப்புப் பணியில் ஈடுபடுத்தப்படாததாலும் கட்டுப்படுத்த ஆளின்றி நடைபெற்ற இந்நிகழ்வுகள் தற்போது பேசு பொருளாகியுள்ளது.

தென்னகத்தின் ஸ்பா என்று அழைக்கப்படும் குற்றாலம் தென்காசி மாவட்டத்தில் அமைந்துள்ளது.

ஆண்டுதோறும் ஜூன் மாதத்தில் குற்றால சீசன் தொடங்கும் நிலையில் இந்தாண்டு முன்கூட்டியே தொடங்கியுள்ளது. இதனால் அங்கு குளிர்ந்த காற்றுடன் மெல்லிய சாரல்மழை பெய்து கொண்டே உள்ளது.

மேலும் அங்குள்ள மெயின் அருவி, ஐந்தருவி, பழைய குற்றாலம் அருவி, புலியருவி, சிற்றருவி, செண்பகாதேவி அருவி, தேனருவி உள்ளிட்ட அருவிகளில் தண்ணீர் ஆர்ப்பரித்து கொட்டுவருகிறது.

இந்நிலையில், அங்கு நிகழும் குளுகுளு சீசனை காணவும், அருவிகளில் ஆர்ப்பரித்து கொட்டும் தண்ணீரில் குளித்து மகிழவும் நாடு முழுவதும் உள்ள சுற்றுலாப் பயணிகள் திரண்டு வருகின்றனர். 

இதேபோல் திண்டுக்கல் மாவட்டத்தில் உள்ள கொடைக்கானலிலும் இந்தாண்டு முன்கூட்டியே கோடை சீசன் தொடங்கியுள்ளது. இதனால் வரும் 24ம் தேதி அங்கு, கோடை விழா மற்றும் மலர் கண்காட்சி தொடங்க உள்ளது.

இதனால்  சுற்றுலா பயணிகள் அதிகளவில் குவிந்து வருகின்றனர். இந்நிலையில், வார விடுமுறை காரணமாக அதிக அளவிலான சுற்றுலா பயணிகள் குவிந்ததால் கடும் போக்குவரத்து நெரிசல் ஏற்பட்டது.

திருச்சி மாவட்டம் மணச்சநல்லூர் அருகே எதுமலை கிராமத்தை சேர்ந்த செல்ல பாப்பா என்பவருக்கு ரமேஷ், ஜெகதீசன் என இரு மகன்கள் உள்ளனர்.

சென்னையில் உள்ள தனியார் நிறுவனத்தில் பணிபுரிந்த ஜெகதீசன், கோமதி என்ற பெண்ணை காதலித்து திருமணம் செய்துகொண்டார். இவர்கள் இருவரும் ஒரே சமுதாயத்தை சேர்ந்தவர்கள் என்றாலும் கூட ஊர் மக்கள் இந்த காதல் திருமணத்தை ஏற்றுக்கொள்ளவில்லை என கூறப்படுகிறது.

இந்த நிலையில்,  மாசி பெரியண்ணசாமி கோவில் திருவிழாவின்போது அவர்களிடம் தலைக்கட்டு வரி வசூல் செய்யாமல் தவிர்த்ததாகவும், கோவிலில் சாமி கும்பிட அனுமதி மறுக்கப்பட்டதாகவும் கூறப்படுகிறது.

இதனையடுத்து ரமேஷ் சிறுகனூர் காவல் நிலையத்தில் இச்சம்பவம் குறித்து கடந்த 15ஆம் தேதி புகார் அளித்தார்.  அதன் பேரில் டிஎஸ்பி தலைமையில் பேச்சுவார்த்தை நடத்தப்பட்டும் அவர்கள் தங்களது கருத்தில் விடாப்பிடியாக இருந்ததால் கூட்டம் தோல்வியில் முடிவடைந்தது.

இதைத்தொடர்ந்து, ரமேஷ் கொடுத்த புகாரின் பேரில் சின்னச்சாமி, மாயவன், சிவலிங்கம் உள்ளிட்ட 9 பேர் மீது குடிமையியல் உரிமை பாதுகாப்பு சட்டத்தின் கீழ் வழக்கு பதிவு செய்யப்பட்டுள்ளது.

இதுகுறித்து செய்தியாளர்களிடம் பேசிய ரமேஷ், 120 ஆண்டுகள் பழமையான இந்த கோயிலில் வழிபட எங்களுக்கு உரிமை இருந்தும், எனது சகோதரர் காதல் திருமணம் செய்துகொண்டதால் விழாவில் பங்கேற்க அனுமதிக்கவில்லை என கூறினார். இதனையடுத்து கோவிலில் வழிபாடு நடத்த அனுமதி பெற்றுத் தர வேண்டும் என கேட்டுகொண்டார்.