குடும்ப தலைவிகளுக்கு ஆயிரம் ரூபாய் வழங்கும் திட்டத்திற்கு முன்பாக முன்னோட்டமாக ஒரு ஆயிரம் ரூபாய் வங்கிக்கணக்கில் ஏற்றப்பட இருப்பதாக தகவல் வெளியாகியுள்ளது.

முக்கியமான வாக்குறுதி:

திமுக தேர்தல் வாக்குறுதியில் முக்கியமானதாக அனைவராலும் பார்க்கப்பட்ட ஒன்று குடும்பத் தலைவிகளுக்கு மாதம் தோறும் ஆயிரம் வழங்கப்படும் திட்டம்  என்பது தான். ஆனால், அந்த திட்டம் இந்நாள் வரை அமலுக்கு வரவில்லை. 

உறுதியளித்த முதலமைச்சர்:

இதனிடையே, இந்த திட்டம் நிறைவேற்றபடாதது குறித்து முதலமைச்சர் மு.க.ஸ்டாலின் பேசிய போது, மாநிலத்தின் நிதிநிலைமை சரியில்லாததால் சற்று காலதாமதமாகும் என்று தெரிவித்தார். நிதிநிலைமை சரியானதும் நிச்சயம் ஆயிரம் ரூபாய் வழங்கும் திட்டம் நிறைவேற்றப்படும் என்று உறுதியளித்திருந்தார்.

கேள்வி எழுப்பிய எதிர்க்கட்சிகள்:

ஆனால், இல்லத்தரசிகளுக்கு மாதந்தோறும் 1000 ரூபாய் வழங்கும் திட்டம் எப்பொழுது தொடங்கப்படும் மகளிர் மத்தியில் மட்டுமல்லாமல், எதிர்கட்சிகள் சார்பிலும் கேள்வி எழுப்பப்பட்டு வந்தது. 

இதையும் படிக்க: சென்னையில் அம்மா உணவகங்கள் மூடப்படுமா? மேயர் பிரியா சொன்ன பதில் என்ன?

மார்ச் 8 தொடங்கப்படுமா?:

சமீபத்தில் உலக மகளிர் தினமான மார்ச் 8 ஆம் தேதி குடும்ப தலைவிகளுக்கு மாதந்தோறும் ஆயிரம் வழங்கும் திட்டத்தை தொடங்கி வைப்பது குறித்து தமிழக அரசு தீவிர ஆலோசனை மேற்கொண்டது. இந்த ஆலோசனை கூட்டத்தையடுத்து, மார்ச் 8 ஆம் தேதி இல்லத்தரசிகளுக்கு மாதந்தோறும் 1000 ரூபாய் என்ற திட்டம் அமலுக்கு வருமா? வராதா? என்ற கேள்விகள் அரசியல் அரங்கில் வட்டமடித்து வந்தது.

முன்னோட்டம் ரெடியா?

இந்நிலையில் பெண்களுக்கு மாதந்தோறும் 1000 ரூபாய் திட்டம், முதலமைச்சர் ஸ்டாலின் பிறந்தநாளான மார்ச் 1 ஆம் தேதியோ அல்லது முன்னாள் முதலமைச்சர் கருணாநிதியின் பிறந்தநாளான ஜூன் 3 ஆம் தேதியோ தொடங்கி வைக்கப்படவுள்ளதாக தகவல் கூறப்படுகிறது. அதற்கு முன்னதாக பொங்கல் பரிசுத் தொகையாக 1000 ரூபாயை ரேஷன் கார்டுதாரர்களின் வங்கிக் கணக்கில் செலுத்த தமிழக அரசு முடிவு செய்துள்ளது. எனவே, பொங்கல் பண்டிகைக்கு ரேஷன் அட்டைத்தாரர்களுக்கு 1000ரூபாய் அவர்களது வங்கிக்கணக்கில் ஏற்றி விடப்படும்.

மார்ச் மாதமா? ஜுன் மாதமா?

இது குடும்பத் தலைவிகளுக்கு மாதம் ரூ 1000 உரிமைத் தொகைக்கான முன்னோட்டமாக பார்க்கப்படுகிறது. அதாவது பொங்கல் பண்டிகை முடிந்தவுடன் மாதாந்திர தொகை திட்டத்தை தொடங்க அரசு முடிவு செய்துள்ளதால், மாதந்தோறும் 1000 வழங்கு திட்டம் மார்ச் 1 ஆம் தேதியோ? அல்லது ஜூன் 3 ஆம் தேதியோ? வழங்கப்படும் என கூறப்படுகிறது. 

அரசு ஸ்டான்லி மருத்துவமனையில் பல்வேறு திட்டங்கள் தொடக்க விழாவிற்கு வருகை தந்த மருத்துவம் மற்றும் மக்கள் நல்வாழ்வுத்துறை அமைச்சர் மா சுப்பிரமணியன் லிப்டில் மாட்டிக்கொண்ட சம்பவம் அதிர்ச்சியை ஏற்படுத்தியது.

சென்னை அரசு ஸ்டான்லி மருத்துவமனையில்  பல்வேறு நிகழ்ச்சிகளில் கலந்து கொள்ள சுகாதாரத்துறை அமைச்சர் மா சுப்பிரமணியன் கைசிறப்பு மற்றும் அறுவை சிகிச்சை துறை கட்டிடத்திற்கு வருகை தந்தார்.

ஒவ்வொறு நிகழ்ச்சியாக துவக்கி வைத்து விட்டு கை அறுவை சிகிச்சை சிறப்பு பிரிவை பார்வையிட்டு விட்டு மூன்றாவது தளத்திலிருந்து தரைத்தளத்திற்கு வருகை தந்த அவர் லிப்டில் பயணம் செய்யும்போது எதிர்பாராத விதமாக லிப்டின் இயக்கம் தடைப்பட்டது.இந்த நிலையில் மருத்துவமனையில் உள்ள கை அறுவை சிகிச்சை பிரிவில் உள்ள லிப்டில் அமைச்சர் மா சுப்பிரமணியன் சட்டமன்ற உறுப்பினர் ஐட்ரீம்ஸ் மூர்த்தி, கலாநிதி வீராசாமி, மருத்துவமனையின் முதல்வர் பாலாஜி ஆகியோர் லிப்ட் கோளாறு காரணமாக சில நேரம் சிக்கிக்கொண்டனர்.

செய்வதறியாது திகைத்து நின்ற அமைச்சர் மற்றும் அதிகாரிகள் பின்னர் லிப்ட் ஆப்பரேட்டர் உதவியுடன் லிப்டின் ஆபத்துக் கால கதவின் வழியே வெளியேறினர்.  இதனால் அங்கு சிறிது நேரம் பரபரப்பும் அதிர்ச்சியும் ஏற்பட்டது.

தமிழ் மொழியை இரண்டாவது மொழியாக வடகிழக்கு மாநிலங்களில் அறிமுகப்படுத்த அம்மாநில முதலமைச்சர்களோடு பேசி வருவதாக தமிழ்நாடு ஆளுநர் ஆர்.என்.ரவி தெரிவித்துள்ளார்.

பட்டமளிப்பு விழா:

தமிழ்நாடு கல்வியியல் பல்கலைக்கழக பட்டமளிப்பு விழா இன்று சென்னையில் நடைபெற்றது.  இதில் தமிழ்நாடு ஆளுநர் சிறப்பு விருந்தினராக கலந்து கொண்டு மாணவர்களுக்கு பட்டங்களை வழங்கினார். இந்நிகழ்சியில் ஆளுநர் ஆர்.என்.ரவி பேசுகையில்:

மாற்றம் தேவை:

புத்தக அறிவு மட்டும் மாணவர்களுக்கு போதாது என்றும் திறன் கொண்ட கல்வியே மாணவர்களை முழுமையாக்கும் எனவும் அத்தகைய மாணவர்களை ஆசிரியர்கள் உருவாக்க வேண்டும் எனவும் கூறினார்.  மேலும், கல்வி கற்பிக்கும் முறை மாறி வருகிறது எனவும் பழமையான கல்வி கற்பிக்கும் முறை போதுமானதாக இல்லை எனவும் தெரிவித்தார். 

மாணவர்கள் என்பவர்கள் ஆலமர விதை போன்றவர்கள் எனவும் அதை கண்டறிந்து பெரிய மரமாக வளர ஆசிரியர்கள் உதவிட வேண்டும் எனவும் பேசினார்.

தாய்மொழி அறிவு:

தாய்மொழியில்தான் அறிவை வளர்க்க முடியும் என்று குறிப்பிட்ட ஆளுநர் திருக்குறள் அனைத்து மாநிலங்களிலும் பாடத்திட்டத்தில்  வைக்கப்பட  வேண்டும் என்றும் தெரிவித்தார். 

தமிழ்நாட்டின் பெருமை:

நாட்டின் வளர்சியில் தமிழ்நாட்டின் பங்கு இன்றியமையாததது எனக்கூறிய ஆளுநர் தமிழ்நாட்டின் கல்வி வளர்ச்சியை நாடு நீண்ட காலமாக அறிந்துள்ளதாக குறிப்பிட்டார்.  இந்தியாவின் உருவாக்கத்திற்கு அடித்தளம் இட்ட பெருமை தமிழகத்தை பெரிதும் சாரும் என தெரிவித்தார். 

வடகிழக்கு மாநிலங்களில் தமிழ்மொழியை 2-வது மொழியாக கொண்டு வர அம்மாநில  முதலமைச்சர்களிடம் பேசியுள்ளதாகவும், அதே போல் காசி தமிழ் சங்கமம் நிகழ்ச்சியில் பிரதமர் நரேந்திர மோடி தமிழில் இருந்து மொழி மாற்றம் செய்யப்பட்டு 13 இந்திய மொழியில் திருக்குறளை வெளியிட்டார் எனவும் தெரிவித்தார்.

விமர்சனம்:

திடீரென ஆளுநருக்கு ஏன் தமிழ்நாட்டின் மீதும் தமிழ் மீதும் இத்தனை பாசம் எனவும் இவ்வளவு நாளாக இது எதுவும் அவருக்கு தெரியவில்லையா என அரசியல் விமர்சகர்கள் கேள்வியெழுப்பியுள்ளனர்.

-நப்பசலையார்

இதையும் படிக்க:   ஷ்ரத்தா வழக்கு குற்றவாளி மீது கொலை தாக்குதல்... பின்னணி என்ன?!!!

சென்னையில் அம்மா உணவகங்கள் எப்போதும் போல் செயல்படும் என்று மாநகராட்சி மேயர் பிரியா ராஜன் தெரிவித்துள்ளார்...

பல்வேறு குற்றச்சாட்டுகள்:

தமிழகத்தில் அதிமுக ஆட்சிக்காலத்தில் மலிவு விலையில் பொதுமக்களுக்கு உணவு வழங்கும் வகையில் அம்மா உணவகம் திட்டம் எல்லா மாவட்டங்களிலும் செயல்படுத்தப்பட்டது. இந்த திட்டமானது சென்னையை பொறுத்தமட்டில் வார்டு வாரியாக 400க்கும் அதிகமான அம்மா உணவகங்கள் உள்ளன. இந்நிலையில் கடந்த 2021 ஆம் ஆண்டு தமிழகத்தில் ஆட்சி மாற்றம் ஏற்பட்டு திமுக ஆளும் கட்சியாக மாறியது. இதையடுத்து, திமுக ஆட்சிக்கு வந்ததும் அதிமுக ஆட்சியில் உருவான அம்மா உணவக திட்டத்தை மூடும் நோக்கத்தில் செயல்பட்டு வருவதாக ஆளும் அரசு மீது பல்வேறு குற்றச்சாட்டுகள் எழுந்தது வருகிறது.

மாதாந்திர மாமன்ற கூட்டம்:

இந்நிலையில் சென்னை மாநகராட்சியின் மாதாந்திர மாமன்ற கூட்டம் மேயர் பிரியா ராஜன் தலைமையில் நடைபெற்று வருகிறது.  அதன்படி, இரண்டாவது நாளாக இன்று நடைபெற்ற கூட்டத்தில், வள்ளுவர் கோட்டம் மேம்பாலம் திட்டத்திற்காக நிலம் கையப்படுத்தும் பணி, பள்ளிகளை புதுப்பிக்கும் பணி, எரிவாயு தகன மேடை கட்டும் பணி உள்ளிட்டவை தொடர்பான பல்வேறு தீர்மானங்கள் நிறைவேற்றப்பட்டன. 

இதையும் படிக்க: ஆதார் இணைப்பு: லஞ்சம் வாங்கினால்...அதிகாரிகளை எச்சரித்த மின்வாரியம்...!

எப்போதும் போல் செயல்படும்:

பின்னர் மாமன்ற உறுப்பினர்களின் கேள்விகளுக்கு மேயர் பிரியா ராஜன் பதிலளித்தார். இதில், வருமானம் குறைவாக உள்ள அம்மா உணவகங்கள் மூடப்படுமா என்ற கேள்விக்கு பதிலளித்த மேயர் பிரியா, அம்மா உணவகங்கள் எப்போதும் போல் செயல்படும் என்று  கூறினார். ஏதேனும் குறிப்பிட்ட உணவகங்களில் உள்ள பிரச்சனைகள், வருமானம் குறைவு பற்றி ஆய்வு செய்யப்படும். இந்த ஆய்வை தொடர்ந்து பரிசீலனை செய்து அடுத்தக்கட்ட நடவடிக்கைகள் எடுக்கப்படும்'' என்றார். இதன்மூலம் சென்னையில் உள்ள அம்மா உணவகங்கள் மூடப்படாது என்பது உறுதியானது. 

மேலும், காலை சிற்றுண்டி குறித்த கேள்விக்கு பதிலளித்த மேயர் பிரியா, மாநகராட்சி நடுநிலைப் பள்ளிகளில் பயிலும் தொடக்க பள்ளி மாணவர்களுக்கும் படிப்படியாக காலை சிற்றுண்டி திட்டம் அமல்படுத்தப்படும் என தெரிவித்தார். 

மனித உரிமை மீறல் தொடர்பான வழக்கில் மாற்றுத் திறனாளி வழக்கறிஞருக்கு 5 லட்சம் ரூபாய் இழப்பீடு வழங்க உத்தரவிட்ட சென்னை உயர் நீதிமன்றம், மாற்றுத் திறனாளிகளை கையாள்வது குறித்து போலீசாருக்கு பயிற்சி வழங்க வேண்டும் என தமிழக டிஜிபி-க்கு உத்தரவிட்டுள்ளது

பொய் புகார்:

திருப்பூர் மாவட்டம், தாராபுரம் முத்துநகரைச் சேர்ந்த மாற்றுத் திறனாளி வழக்கறிஞர் முருகானந்தம் என்பவரை, அதே பகுதியைச் சேர்ந்த தண்டபாணி என்பவர் அளித்த பொய் புகாரில், தாராபுரம் காவல் நிலைய உதவி ஆய்வாளர் கார்த்திகேயன், கடந்த 2020ம் ஆண்டு பிப்ரவரி மாதம் கைது செய்துள்ளார். 

தான்  மாற்றுத் திறனாளி   எனக் கூறிய முருகானந்தத்தை தாக்கியதுடன் ஆபாசமாக திட்டியுள்ளார். பின்னர் கோவை சிறையில் அடைக்கப்பட்ட முருகானந்தம், 2020 மார்ச் 10ம் தேதி ஜாமீனில் விடுதலை செய்யப்பட்டார். 

மனித உரிமை மீறல்:

இதையடுத்து தனக்கு நேர்ந்த மனித உரிமை மீறல்கள் தொடர்பாக முருகானந்தம் தாக்கல் செய்த புகாரை விசாரித்த  தமிழ்நாடு மாநில மனித உரிமை ஆணையம்,  அவருக்கு ஒரு லட்சம் ரூபாயை இழப்பீடு வழங்கவும், உதவி ஆய்வாளருக்கு எதிராக ஒழுங்கு நடவடிக்கை எடுக்கவும்   உத்தரவிட்டது.

நிவாரணம்:

இந்த உத்தரவை எதிர்த்தும், தனக்கு 50 லட்சம் ரூபாய் இழப்பீடு வழங்கக் கோரியும், தமிழகம் முழுவதும் உள்ள சிறைகளில் மாற்றுத் திறனாளிகளுக்கு உரிய வசதிகளை செய்து கொடுக்கவும் தமிழக அரசுக்கு உத்தரவிடக் கோரியும் முதுகானந்தம் சென்னை உயர் நீதிமன்றத்தில் மனுத்தாக்கல் செய்திருந்தார்.

வழக்கு விசாரணை:

இந்த மனுவை விசாரித்த நீதிபதிகள் ஆர்.சுப்பிரமணியன் மற்றும் குமரேஷ்பாபு அமர்வு,  பாதிக்கப்பட்ட முருகானந்தத்துக்கு இழப்பீடாக 5 லட்சம் ரூபாய் வழங்க வேண்டும் என உத்தரவிட்டது. 

இத்தொகையில் 4 லட்சம் ரூபாயை மாநில அரசு வழங்க வேண்டும் என உத்தரவிட்ட நீதிபதிகள், மாற்றுத் திறனாளிகளை கையாள்வது தொடர்பாக கான்ஸ்டபிள் முதல் அனைத்து போலீஸ் அதிகாரிகளுக்கும் பயிற்சி வழங்க தமிழக டிஜிபி-க்கு உத்தரவிட்டனர்.

காவல் நிலையங்களுக்கு உத்தரவு:

மேலும், தமிழ்நாடு முழுவதும் காவல் நிலையங்களில் கண்காணிப்பு கேமராக்களை பராமரிப்பது தொடர்பாக மாவட்டந்தோறும் அதிகாரியை நியமிக்க வேண்டும் எனவும் டிஜிபி-க்கு உத்தரவிட்ட நீதிபதிகள், மனுதாரருக்கு வழக்குச் செலவாக 25 ஆயிரம் ரூபாயை வழங்கவும் உத்தரவிட்டுள்ளனர்.

-நப்பசலையார்

இதையும் படிக்க:   ராஜஸ்தானில் காஷ்மீரிகளின் கம்பளி கடைகளில் தீ விபத்து...விபத்திற்கான காரணம் என்ன?!!