ஆறுமுகசாமி ஆணையத்தின் விசாரணை நிறைவு : அறிக்கை தாக்கல் செய்ய கால அவகாசம் நீட்டிப்பு !!

ஆறுமுகசாமி விசாரணை ஆணையம் விசாரணையை முடித்துள்ள நிலையில் அறிக்கை தாக்கல் செய்வதற்கு ஒரு மாதம் 9 நாட்கள் கால அவகாசம் வழங்கி ஆகஸ்ட் 3 ம் தேதி இறுதி அறிக்கை தாக்கல் செய்ய அரசு உத்தரவிட்டுள்ளது. 

ஆறுமுகசாமி ஆணையத்தின் விசாரணை நிறைவு : அறிக்கை தாக்கல் செய்ய கால அவகாசம் நீட்டிப்பு !!

மறைந்த முன்னாள் முதலமைச்சர் ஜெயலலிதா மரணம் தொடர்பாக நியமிக்கப்பட்ட ஆறுமுகசாமி விசாரணை ஆணையம் 159 பேரிடம் விசாரணை மேற்கொண்டு, அதற்கான அறிக்கை தயாரிக்கும் பணியை தீவிரமாக மேற்கொண்டு வந்தது. நீதிபதி விசாரணை முடிந்த பின்பு அறிக்கை தயாரிக்கும் பணிக்காக கடந்த 12 நாட்களாக ஆணையத்தில் இருந்து பணியை மேற்கொண்டார்.

மேலும், இறுதியாக ஆணையம் விசாரணை மேற்கொண்ட போது, எய்ம்ஸ் மருத்துவ குழுவினர் காணொலி காட்சி மூலமாக பங்கேற்றனர். அவர்கள் தாயாரித்த அறிக்கையும் இன்னும் ஆணையத்திடம் வழங்கப்படவில்லை. இந்த நிலையில் தான் 12வது முறை ஆணையத்திற்கு கொடுக்கப்பட்ட கால அவகாசம் ஜூன் 24ம் தேதியுடன் முடிவடைந்ததால், அறிக்கை இறுதி செய்து அரசிடம் சமர்பிக்க, மேலும் 1 மாதம்  கால அவகாசம் கேட்டு ஆணையம் அரசுக்கு கடிதம் எழுதியது.

இதை அரசு பரிசீலித்து ஒரு மாதம் 9 நாட்கள் கால அவகாசம் கொடுத்து, 13வது முறையாக காலநீட்டிப்பு செய்துள்ளது. இந்த காலத்திற்குள் அறிக்கையை இறுதி செய்து ஆகஸ்ட் 3ம் தேதி வழங்குவதற்கு அரசு உத்தரவு பிறப்பித்தள்ளது.

மறைந்த முன்னாள் முதலமைச்சர் ஜெயலலிதா மரணம் தொடர்பாக நியமிக்கப்பட்ட ஆறுமுகசாமி விசாரணை ஆணையம் 2017 செப்டம்பர் மாதம் தனது விசாரணையைத் தொடங்கியது. விசாரணை தீவிரமாக நடைபெற்று வந்த நிலையில், மருத்துவர்களை விசாரிக்கும்போது மருத்துவ குழு வல்லுனர்கள் முன்னிலையில் விசாரிக்க வேண்டும் என்று ஆணையத்திடம் அப்பல்லோ நிர்வாகம் வலியுறுத்தியதை ஆணையம் ஏற்றுக்கொள்ளவில்லை.

இதை தொடர்ந்து அப்போலோ மருத்துவமனை நிர்வாகம் சார்பாக உச்ச நீதிமன்றத்தில் தொடரப்பட்ட வழக்கில் விசாரணைக்கு இடைக்கால தடை விதித்ததால்  இரண்டு ஆண்டுகளாக விசாரணை நடைபெறாமல் காலநீட்டிப்பு செய்யப்பட்டது.

இதன் பின்பு, எய்ம்ஸ் இயக்குனர் பரிந்துரையின் படி 6 பேர் மருத்துவக்குழு அமைத்து விசாரணை நடத்த உச்ச நீதிமன்றம் தீர்ப்பு அளித்ததை தொடர்ந்து,  கடந்த மார்ச் மாதம் 7 ம் தேதி இரண்டு ஆண்டுகளுக்கு பின்பு விசாரணையை மீண்டும் ஆணையம் தொடங்கியது. இதில் அப்பல்லோ மருத்துவர்கள் உள்பட அதிமுக ஒருங்கிணைப்பாளர் ஓ.பன்னீர்செல்வத்திடம் விசாரணை மேற்கோண்டு, இறுதி விசாரணையும் ஆறுமுகசாமி ஆணையம் ஏப்ரல் 26 ம் தேதி நிறைவு செய்தது.