அசாமில் மழை ஓய்ந்தும், வெள்ளம் வடியாத நிலை காணப்படுவதால் கிராம மக்கள் கடும் இன்னலுக்கு ஆளாகியுள்ளனர். அம்மாநிலத்தில் கடந்த சில தினங்கள் கொட்டி தீர்த்த கனமழையால் 22 மாவட்டங்கள் வெள்ளத்தில் தத்தளிக்கின்றன.

இதில் சிக்கி 26 பேர் உயிரிழந்த நிலையில், பாதிக்கப்பட்டவர்களை மீட்கும் பணியில் ராணுவம், துணை ராணுப்படையினர் மீட்பு குழுவினர் ஈடுபட்டு வருகின்றனர்.

இந்தநிலையில் மிகுந்த பாதிப்புக்குள்ளான நகோவான் மாவட்டத்தின் ரோகா கிராமத்தில், வெள்ளத்தில் மிதக்கும் வீடுகளை விட்டு அத்தியாவசிய தேவைக்கு வெளியேறும் மக்கள் படகுகளை பயன்படுத்தி வருகின்றனர். 
 

கொரோனா காலத்தில் பாலியல் தொழிலாளர்கள் எதிர்கொண்ட பிரச்னைகள் தொடர்பான மனு, பி.ஆர்.கவாய், எல் நாகேஸ்வர ராவ், மற்றும் ஏ.எஸ்.போபண்ணா ஆகியோர் அடங்கிய அமர்வு முன் விசாரணைக்கு வந்தது.

அப்போது பாலியல் தொழிலாளர்களிடம் காவல்துறையின் அணுகுமுறை சில நேரங்களில் மிருகத்தனமாக உள்ளதாக சுட்டிக்காட்டிய நீதிபதிகள், அவர்கள் மீது வன்முறையை பிரயோகித்து பாலியல் தொழிலில் ஈடுபடுத்த கட்டாயப்படுத்தக்கூடாது எனவும் தெரிவித்தனர்.  கண்ணியத்துடன் நடத்துவதோடு துன்புறுத்தக்கூடாது எனக்கூறி காவல்துறைக்கு நீதிபதிகள் உத்தரவிட்டனர்.

பாலியல் துன்புறுத்தலுக்கு உள்ளான எந்தவொரு பாலியல் தொழிலாளிக்கும் உடனடியாக சட்டப்பூர்வ மற்றும் மருத்துவ உதவிகள் கிடைக்க வழிவகை செய்யப்பட வேண்டும் எனவும் குறிப்பிட்டனர்.

பாலியல் தொழிலாளிகள் குறிப்பிட்ட இடங்களில் இருந்து மீட்கப்படும் போது, அவர்தம் பெயர் மற்றும் அடையாளங்களை ஊடகத்தினர் வெளியிடாமல் இருக்க அறிவுறுத்துமாறு இந்திய பிரஸ் கவுன்சிலை நீதிமன்றம் வலியுறுத்தியது.

இந்திய அரசியலமைப்பு சட்டத்தின்படி பாலியல் தொழிலாளர்கள் பாதுகாப்புடன் வாழ அனைத்து தகுதியையும் பெற்றவர்கள் எனவும் கூறப்பட்டுள்ளது.

நாடு முழுவதும் திருமணத்திற்கு வரதட்சணை பெறுவதும் வரதட்சணை கேட்டு கொடுமைப்படுத்துவதும் தீர்க்கமுடியாத பிரச்சனையாகவே இருந்து வருகிறது.

இந்நிலையில் பாட்னாவில் புதிதாக கட்டப்பட்டுள்ள பெண்கள் விடுதியை திறந்து வைத்து பேசிய முதல்வர் நிதீஷ் குமார், பெண்ணை திருமணம் செய்து கொள்வதற்கு வரதட்சணை வாங்குவது அர்த்தமற்ற வீண் செயல் என சாடினார். 

மேலும் பெண்ணை திருமணம் செய்தால் மட்டுமே குழந்தை பிறக்கும், தலைமுறை விருத்தியடையும் என தெரிவித்த அவர், ஒரு ஆணை மற்றொரு ஆண் திருமணம் செய்தால் குழந்தை பிறக்காது எனவும் கூறினார். 

புதுச்சேரி மத்திய சிறையில் கஞ்சா புழக்கம், செல்போன் பயன்பாடு அதிகரித்து வருவதாக செய்திகள் வந்தவண்ணம் இருந்தன. இவற்றுக்கு முற்றுப்புள்ளி வைக்கும் வகையில் கைதிகளின் மனநிலையை மாற்ற சிறைத்துறை நிர்வாகம் கைதிகளை விவசாய பணிகளில் களமிறக்கியது.

இதற்கென சிறை வளாகத்தில் உள்ள இரண்டரை ஏக்கர் நிலத்தில் கத்திரிக்காய், தக்காளி, வெண்டைக்காய் போன்றவற்றை சிறைக்கைதிகள் விவசாயம் செய்யவும், ஆடு, மாடு, கோழி, முயல் போன்றவற்றை வளர்க்கவும் அனுமதிக்கப்பட்டனர்.

இந்தநிலையில், அங்கு சென்ற தமிழிசை சவுந்தரராஜன், கைதிகளின் பசுமை பண்ணையை கண்டு வியந்து பாராட்டியதோடு, அவர்களுக்கு பேருதவியாக இருந்த சிறை அதிகாரிகளையும் பாராட்டினார். 

ஜப்பான் தலைநகர் டோக்கியோவில் நடைபெற்ற குவாட் உச்சி மாநாட்டில் கலந்து கொண்ட பிறகு பிரதமர் மற்றும் அமெரிக்க அதிபர் ஜோ பைடனுடன் இருதரப்பு பேச்சுவார்த்தை நடைபெற்றது. இந்த பேச்சுவார்த்தையில் இரு நாடுகளுக்கும் இடையேயன உறவுகள் மற்றும் ஒத்துழைப்புகள் மட்டுமின்றி  சர்வதேச அளவிலாக பல்வேறு முக்கிய விவகாரங்கள் குறித்து பேச்சுவார்த்தை நடத்தப்பட்டதாக தகவல் வெளியாகியுள்ளது. குறிப்பாக இந்தோ-பசிபிக் பிராந்திய நாடுகளின் பொருளாதாரம், பாதுகாப்பு, உள்கட்டமைப்பை வலுப்படுத்துதல், அச்சுறுத்தல்களை சீர் செய்வது உள்ளிட்டவை குறித்து விரிவாக விவாதிக்கப்பட்டுள்ளது. 

இவை தவிர உக்ரைன்- ரஷ்யா இடையிலான போர் குறித்தும், இந்திய அண்டை நாடான இலங்கையில் ஏற்பட்டுள்ள பொருளாதார நெருக்கடி சூழல் குறித்தும் ஆலோசிக்கப்பட்டதாக தெரிகிறது.  மேலும் சர்வதேச பிரச்சனைகளில் ஒத்துழைப்புடன் இணைந்து செயல்படுவது என இந்திய - அமெரிக்க இடையே உறுதியளிக்கப்பட்டதாகவும் கூறப்படுகிறது. இந்தியாவில் முதலீடு செய்வது தொடர்பாகவும் இக்கூட்டத்தில் விவாதிக்கப்பட்டுள்ளது.