நாடு முழுவதும் திருமணத்திற்கு வரதட்சணை பெறுவதும் வரதட்சணை கேட்டு கொடுமைப்படுத்துவதும் தீர்க்கமுடியாத பிரச்சனையாகவே இருந்து வருகிறது.

இந்நிலையில் பாட்னாவில் புதிதாக கட்டப்பட்டுள்ள பெண்கள் விடுதியை திறந்து வைத்து பேசிய முதல்வர் நிதீஷ் குமார், பெண்ணை திருமணம் செய்து கொள்வதற்கு வரதட்சணை வாங்குவது அர்த்தமற்ற வீண் செயல் என சாடினார். 

மேலும் பெண்ணை திருமணம் செய்தால் மட்டுமே குழந்தை பிறக்கும், தலைமுறை விருத்தியடையும் என தெரிவித்த அவர், ஒரு ஆணை மற்றொரு ஆண் திருமணம் செய்தால் குழந்தை பிறக்காது எனவும் கூறினார். 

புதுச்சேரி மத்திய சிறையில் கஞ்சா புழக்கம், செல்போன் பயன்பாடு அதிகரித்து வருவதாக செய்திகள் வந்தவண்ணம் இருந்தன. இவற்றுக்கு முற்றுப்புள்ளி வைக்கும் வகையில் கைதிகளின் மனநிலையை மாற்ற சிறைத்துறை நிர்வாகம் கைதிகளை விவசாய பணிகளில் களமிறக்கியது.

இதற்கென சிறை வளாகத்தில் உள்ள இரண்டரை ஏக்கர் நிலத்தில் கத்திரிக்காய், தக்காளி, வெண்டைக்காய் போன்றவற்றை சிறைக்கைதிகள் விவசாயம் செய்யவும், ஆடு, மாடு, கோழி, முயல் போன்றவற்றை வளர்க்கவும் அனுமதிக்கப்பட்டனர்.

இந்தநிலையில், அங்கு சென்ற தமிழிசை சவுந்தரராஜன், கைதிகளின் பசுமை பண்ணையை கண்டு வியந்து பாராட்டியதோடு, அவர்களுக்கு பேருதவியாக இருந்த சிறை அதிகாரிகளையும் பாராட்டினார். 

ஜப்பான் தலைநகர் டோக்கியோவில் நடைபெற்ற குவாட் உச்சி மாநாட்டில் கலந்து கொண்ட பிறகு பிரதமர் மற்றும் அமெரிக்க அதிபர் ஜோ பைடனுடன் இருதரப்பு பேச்சுவார்த்தை நடைபெற்றது. இந்த பேச்சுவார்த்தையில் இரு நாடுகளுக்கும் இடையேயன உறவுகள் மற்றும் ஒத்துழைப்புகள் மட்டுமின்றி  சர்வதேச அளவிலாக பல்வேறு முக்கிய விவகாரங்கள் குறித்து பேச்சுவார்த்தை நடத்தப்பட்டதாக தகவல் வெளியாகியுள்ளது. குறிப்பாக இந்தோ-பசிபிக் பிராந்திய நாடுகளின் பொருளாதாரம், பாதுகாப்பு, உள்கட்டமைப்பை வலுப்படுத்துதல், அச்சுறுத்தல்களை சீர் செய்வது உள்ளிட்டவை குறித்து விரிவாக விவாதிக்கப்பட்டுள்ளது. 

இவை தவிர உக்ரைன்- ரஷ்யா இடையிலான போர் குறித்தும், இந்திய அண்டை நாடான இலங்கையில் ஏற்பட்டுள்ள பொருளாதார நெருக்கடி சூழல் குறித்தும் ஆலோசிக்கப்பட்டதாக தெரிகிறது.  மேலும் சர்வதேச பிரச்சனைகளில் ஒத்துழைப்புடன் இணைந்து செயல்படுவது என இந்திய - அமெரிக்க இடையே உறுதியளிக்கப்பட்டதாகவும் கூறப்படுகிறது. இந்தியாவில் முதலீடு செய்வது தொடர்பாகவும் இக்கூட்டத்தில் விவாதிக்கப்பட்டுள்ளது. 

அசாம் மாநிலத்தில் பெய்த கனமழையால் சுமார் 8 லட்சம் மக்கள் பாதிக்கப்பட்டுள்ளனர். சுமார்  29 மாவட்டங்களைச் சேர்ந்த 2,585 கிராமங்கள்  வெள்ளப் பேரிடரில் சிக்கியுள்ள நிலையில், நகவோன் மாவட்டம் மிக மோசமான பாதிப்பைச் சந்தித்துள்ளது.

மீட்பு பணிகளுக்காக களமிறங்கியுள்ள ராணுவம், துணை ராணுவப் படையினர், தேசிய மற்றும் மாநில பேரிடர் மீட்பு படையினர் இதுவரை 21,884 பேரை மீட்டு பாதுகாப்பான இடங்களில்  தங்க வைத்துள்ளனர். மேலும் ஹெலிகாப்டர்களும் மீட்பு பணியில் ஈடுபடுத்தப்பட்டுள்ளன. இதில் கனமழையில் சிக்கி 25 பேர் உயிரிழந்திருப்பதாகவும் தகவல் வெளியாகியுள்ளது. 

இதனிடையே வெள்ளம் வடியாத வீடுகளால் அவதிக்குள்ளாகி வரும் மக்கள், ரயில் நிலையங்களில் தஞ்சமடைந்து வருகின்றனர்.

இந்தநிலையில் நகவோன் மாவட்டத்தின் திப்ஃபாலு கிராமத்தை சேர்ந்த மக்கள், மார்பு அளவு வெள்ளத்தில் நின்றபடி,  நீரில் மூழ்கிய பயிர்களை அறுவடை செய்து வருகின்றனர். மேலும் சாகுபடி செய்த பயிர்களில் பெரும்பாலானவை சேதமடைந்து விட்டதாகவும், மீதமுள்ளதை குடும்ப தேவைக்காக பாதுகாக்க முயற்சிப்பதாகவும் விவசாயிகள் கண்ணீர் மல்க தெரிவிக்கின்றனர்.

கர்நாடகாவில் சகோதரத்துவத்தை ஊக்குவிக்கும் விதமாக எம்.எல்.ஏ ஒருவர் செய்த காரியம் அனைவரையும் ஆச்சரியத்தில் ஆழ்த்தியது. பெங்களூரு  எம்.எல்ஏ சமீர் அகமது கான் என்பவர், நேற்று அங்கு  நடைபெற்ற அம்பேத்கர் ஜெயந்தி நிகழ்ச்சியில் கலந்து கொண்டார்.

அப்போது பேசிய அவர், மர்ம நபர்கள் சிலர் சமூகத்தினர் இடையே பிரிவினைவாதத்தை ஏற்படுத்த முயற்சிப்பதாக குற்றஞ்சாட்டினார்.  தொடர்ந்து அருகிலிருந்த தலித் தலைவர் சாப்பிட்ட இனிப்பை வாங்கி சாப்பிட்டுள்ளார். இதனை கண்டு ஆச்சரியமடைந்த அங்கிருந்த  பொதுமக்கள் எம்.எல்.ஏவின் செயலை கைதட்டி வரவேற்றுள்ளனர்.