உத்தரப்பிரதேசத்தில் எம்பிக்களாக இருந்த அகிலேஷ் யாதவும், ஆசம் கானும், சமீபத்தில் நடைபெற்ற சட்டப்பேரவைத் தேர்தலில் போட்டியிட்டு வெற்றி பெற்றதை அடுத்து, எம்எல்ஏ பதவியை தக்க வைத்துக்கொள்ள முடிவெடுத்தனர். இதனால், அந்த இரு மக்களவைத் தொகுதிக்கும் இடைத் தேர்தல் நடைபெற்றது.இந்த 2 தொகுதிகளிலும், பாஜக வெற்றி பெற்றுள்ளது.

அகிலேஷ் யாதவின் தொகுதியாக இருந்த ஆசம்காரில் பாஜகவின் தினேஷ் லால் யாதவ் வெற்றி பெற்றுள்ளார். ராம்பூரில் பாஜகவின் கான்ஷியாம் லோதி வெற்றி பெற்றுள்ளார்.

இதேபோல், பஞ்சாபின் சங்ருர் தொகுதி எம்பியாக இருந்த பகவந்த் மான், சமீபத்தில் நடைபெற்ற சட்டப்பேரவைத் தேர்தலில் போட்டியிட்டு வெற்றி பெற்று முதலமைச்சரானதை அடுத்து அந்த தொகுதிக்கு இடைத் தேர்தல் நடைபெற்றது.  இதில், ஷிரோமணி அகாலி தள் வேட்பாளர் சிம்ரன்ஜித் சிங் மான் வெற்றி பெற்றுள்ளார். இந்த 3 மக்களவைத் தொகுதிகள் இல்லாமல், ஆந்திரப்பிரதேசம், டெல்லி, ஜார்கண்ட் ஆகிய 3 மாநிலங்களில் தலா ஒரு சட்டப்பேரவைத் தொகுதிக்கும், திரிபுராவில் 4 தொகுதிகளுக்கும் இடைத் தேர்தல் நடைபெற்றது.

இதில், ஆந்திரப்பிரதேசத்தில் ஆத்மகுர் தொகுதிக்கு நடைபெற்ற தேர்தலில், ஆளும் ஒய்எஸ்ஆர் காங்கிரஸ் வேட்பாளர் விக்ரம் ரெட்டியும், டெல்லியில் ராஜிந்தர் நகர் தொகுதியில் போட்டியிட்ட ஆளும் ஆம் ஆத்மி வேட்பாளர் துர்கேஷ் பதக்கும், ஜார்க்கண்ட்டில் மாந்தர் தொகுதியில் போட்டியிட்ட ஆளும் கூட்டணியைச் சேர்ந்த காங்கிரஸ் வேட்பாளர் ஷில்பி நேஹா திர்க்கியும் வெற்றி பெற்றனர்.

 திரிபுராவில், முதலமைச்சர் மாணிக் சகா தான் போட்டியிட்ட போர்டோவாலி தொகுதியில் வெற்றி பெற்றார். இதேபோல், பாஜகவின் மலினா தேப்நாத் ஜூபராஜ்நகர் தொகுதியிலும், ஸ்வப்னா தாஸ் பால் சுர்னா தொகுதியிலும் வெற்றி பெற்றுள்ளனர்.

அமெரிக்கா, பிரிட்டன், பிரான்ஸ், கனடா, ஜெர்மனி, இத்தாலி, ஜப்பான் ஆகிய நாடுகள் அங்கம் வகிக்கும் ஜி 7 மாநாடு, இன்றும், நாளையும் நடைபெறுகிறது. இந்த மாநாட்டில், பிரதமர் மோடி சிறப்பு அழைப்பாளராக பங்கேற்கிறார்.

காலநிலை, எரிசக்தி, உணவு பாதுகாப்பு, சுகாதாரம், பாலின சமத்துவம் குறித்து இந்த மாநாட்டில் விவாதிக்கப்படுகிறது. இதற்காக ஜெர்மனியில் முனிச் நகருக்கு சென்றடைந்த பிரதமருக்கு, உற்சாக வரவேற்பு அளிக்கப்பட்டது. 

ஜி 7 மாநாட்டில் பங்கேற்கும் மோடி, கனடா பிரதமர் ஜஸ்டின் ட்ரூடோ மற்றும் தென்னாப்பிரிக்கா அதிபர் சிரில் ராமபோசாவுடன் பேச்சுவார்த்தை நடத்துகிறார். இதன் தொடர்ச்சியாக  புலம்பெயர்ந்த இந்திய சமூகத்தினரிடமும் பிரதமர் மோடி உரை நிகழ்த்த ஏற்பாடு செய்யப்பட்டுள்ளது.

வடகிழக்கு மாநிலமான அசாமில் கடந்த ஒரு வாரமாக கன மழை பெய்தது. இதனால் பிரம்மபுத்ரா மற்றும் உப நதிகளில் வெள்ளம் பெருக்கெடுத்து ஓடியது.

நேற்று மழை சற்று குறைந்ததை அடுத்து, பல இடங்களில் வெள்ளம் வடியத் துவங்கி உள்ளது. மாநிலத்தின் 30 மாவட்டங்களில், 45 லட்சத்திற்கும் அதிகமானோர் மழை வெள்ளத்தில் பாதிக்கப்பட்டிருந்தனர். கச்சார் மாவட்டத்தின் சில்சார் நகரம் ஒரு வாரமாக வெள்ளத்தில் மூழ்கியுள்ளது. அங்குள்ளோரை படகுகளில் மீட்டு பாதுகாப்பான இடங்களில் தங்க வைக்கும் பணி தீவிரமாக நடைபெற்று வருகிறது. 

விமான படை ஹெலிகாப்டர்கள் வாயிலாக உணவு, குடிநீர் மற்றும் அத்தியாவசியப் பொருட்கள் போடப்படுகின்றன.  ரிலையன்ஸ் அதிபர் முகேஷ் அம்பானியும், அவர் மகன் ஆனந்த் அம்பானியும் அசாம் முதலமைச்சர் நிவாரண நிதியத்திற்கு, 25 கோடி ரூபாய் நன்கொடை வழங்கியுள்ளனர். ரிலையன்ஸ் அறக்கட்டளை சார்பில் அசாமில் நிவாரண பொருட்கள் வழங்கப்படுகின்றன. 

தற்போது அசாமில் மழை சற்று குறைந்துள்ளதை அடுத்து, பல இடங்களில் வெள்ளம் வடிந்து வருகிறது. இந்நிலையில் அசாமில் வெள்ளம் பாதித்த பகுதிகளை ரப்பர் படகில் சென்று பார்வையிட்ட முதலமைச்சர் ஹிமந்த பிஸ்வ சர்மாவுக்கு குடியிருப்பு வாசி ஒருவர் துணிச்சலுடன் வெள்ளத்தில் இறங்கிச் சென்று பொன்னாடை வழங்கி வாழ்த்துத் தெரிவித்துள்ளார். தொடர்ந்து சில்ச்சாரில் தேசியப் பேரிடர் மீட்புப் படையினருடன் ரப்பர் படகில் முதலமைச்சர் சென்று வெள்ளப் பாதிப்பைப் பார்வையிட்டார்.

ஜூலை 28-ம் முதல் ஆகஸ்ட் 10-ம் தேதி வரை 44-வது செஸ் ஒலிம்பியாட் போட்டி மாமல்லபுரத்தில் நடைபெறுகிறது.

இதனை முன்னிட்டு ஒலிம்பிக் பாரம்பரியம் போன்று தொடர் ஜோதி ஓட்டத்தை டெல்லியில் கடந்த 19-ம் தேதி பிரதமர் மோடி தொடங்கி வைத்தார். இந்த தொடர் ஜோதி ஓட்டமானது இந்தியாவில் உள்ள 75 நகரங்களில் வலம் வருகிறது.

அதன்படி, செஸ் ஒலிம்பியாட் ஜோதி தற்போது உத்தரபிரதேசம் மாநிலம் மீராட் பகுதியை வந்தடைந்துள்ளது.  இந்த ஜோதியை செஸ் கிராண்ட்மாஸ்டர் தேஜஸ் பக்ரேவிடமிருந்து அம்மாநில் அமைச்சர் சோமேந்திர தோமர் பெற்றுக்கொண்டார். இந்த ஒலிம்பியாட் ஜோதி  ஜூலை 27-ம்  தேதி மாமல்லபுரத்தை வந்தடையும் என தகவல் வெளியாகியுள்ளது.

உத்தரப்பிரதேசத்தில் அசாம்கர் தொகுதி எம்பி அகிலேஷ் யாதவ் மற்றும் ராம்பூர் எம்பியான சமாஜ்வாதியின் மூத்த தலைவர் அசாம்கானும்  சட்டமன்றத்திற்கு தேர்வானதால் எம்பி பதவிகளை ராஜினாமா செய்தனர். இதேபோல் பஞ்சாப் முதல்வரானதால் சங்ரூர் தொகுதியில் பகவந்த் மான் ராஜினாமா செய்தார். இதனால் இந்த 3 மக்களவைத் தொகுதிகளுக்கும் பல்வேறு காரணங்களால் காலியாக இருந்த டெல்லி ராஜிந்தர்நகர்,  ஜார்கண்டின் மந்தர், ஆந்திராவின் அத்மாகூர் மற்றும் திரிபுராவின் அகர்தலா, போர்டோவாலி, சுர், ஜூபராஜ் நகர் ஆகிய சட்டமன்ற தொகுதிகளுக்கும் கடந்த 23-ம் தேதி இடைத்தேர்தல் நடைபெற்றது. 

இந்தநிலையில் வாக்குகளை எண்ணும் பணி இன்று காலை 8 மணிக்குத் தொடங்கியது. இதில் போர்டோவாலி தொகுதியில் போட்டியிட்ட திரிபுரா முதல்வர் மாணிக் சாஹா வெற்றி பெற்றார். எஞ்சிய 3 தொகுதிகளில் அகர்தலாவில் மட்டுமே காங்கிரஸ் முன்னிலையில் உள்ளது. மக்களவைத் தொகுதிகளைப் பொறுத்தவரை  அசாம்கர் மற்றும் ராம்பூரில்  குறைவான வாக்கு வித்தியாசத்தில் பாஜக முன்னிலை வகிக்கிறது. சங்ரூர் தொகுதியில் சிரோமணி அகாலிதளம் முன்னிலையில் உள்ளது. டெல்லி ராஜிந்தர் நகரில் ஆம் ஆத்மியும், ஆந்திராவின் அத்மாகூரில் ஒய்எஸ்ஆர் காங்கிரசும் ஜார்கண்டின் மந்தரில் காங்கிரசும் முன்னிலையில் உள்ளன.