மத்திய பிரதேச மாநிலம் போபாலை தலைமையிடமாக கொண்டு செயல்படும் தைனிக் பாஸ்கர் குழுமம் கடந்த ஆறு ஆண்டுகளில் சுமார் 700 கோடி வரி ஏய்ப்பு செய்துள்ளதாக தகவல் வெளியாகியுள்ளது.

ஊடகம், ஜவுளி, மின்சாரம், நிலங்கள் விற்பனை உள்பட பல்வேறு வர்த்தகத் துறைகளில் ஈடுபட்டு வரும் தைனிக் குழுமம் வரி ஏய்ப்பில் ஈடுபட்டு வருவதாக வருமான வரித்துறைக்கு தகவல் கிடைத்துள்ளது. அதன் அடிப்படையில், பல்வேறு மாநிலங்களிலும் தைனிக் குழுமத்திற்கு சொந்தமான இடங்களில் வருமான வரித்துறையினர் சோதனை நடத்தினர்.  இதுகுறித்து வருமான வரித்துறை வெளியிட்டுள்ள அறிக்கையில், தங்களிடம் பணிபுரியும் ஊழியர்களுக்கு தெரியாமலேயே அவர்களின் பெயரில் புதிய நிறுவனங்களை தைனிக் குழுமம் தொடங்கியுள்ளதாகவும், அவர்களின் பெயர்களில் பல்வேறு பணப் பரிவர்த்தனைகளை மேற்கொண்டுள்ளதாகவும் கூறப்பட்டுள்ளது.

இமாச்சலப் பிரதேச மாநிலம் கின்னோர் மாவட்டத்தில் குன்று ஒன்றிலிருந்து, பாறைகள் உருண்டு விழுந்த விபத்தில் 9 பேர் உயிரிழந்துள்ளதாகத் தகவல்கள் வெளியாகியுள்ளன.

கின்னோர் மாவட்டத்தில் உள்ள பட்சேரி கிராமத்தில் குன்று ஒன்றில் திடீரென மண்சரிவு ஏற்பட்ட நிலையில், உச்சியிலிருந்த பாறைகள் உருண்டு கீழே விழுந்தன. பல மீட்டர் உயரத்திலிருந்து உருண்ட பாறைகள், வழியில் இருந்த பாறைகளில் மோதி பல மீட்டர் தூரம் அந்தரத்தில் பறந்தன. இந்தப் பாறைகள், அடிவாரத்தில் இருந்த வீடுகள் மற்றும் இரும்பு பாலத்தில் மோதியதில் இரும்பு பாலம் அப்படியே விழுந்து நொறுங்கியது.

மேலும் அடிவாரத்தில் நிறுத்தப்பட்டிருந்த கார் ஒன்றின் மீது விழுந்ததில் காரில் இருந்த 9 பேர் பரிதாபமாக உயிரிழந்தனர். படுகாயமடைந்த 3 பேர் மருத்துவமனையில் அனுமதிக்கப்பட்டுள்ளனர். இந்நிலையில் உயிரிழந்தவர்களின் குடும்பங்களுக்கு அம்மாநில முதலமைச்சர் ஜெய்ராம் தாக்கூர் ஆழ்ந்த இரங்கலைத் தெரிவித்துள்ளார். மேலும் மீட்பு பணிகளை தீவிரப்படுத்தவும் அவர் உத்தரவிட்டுள்ளார்

மத்திய பொதுத்துறை நிறுவனமான பார்த் பயோடெக் தயாரித்த கோவாக்சின் தடுப்பூசியை முதல்முறையாக 2 வயது முதல் 18 வயதுள்ள சிறார்களுக்கு செலுத்துவது குறித்து டெல்லி எய்ம்ஸ் மருத்துவமனையில் பரிசோதனை நடைபெற்று வருகிறது. 12 முதல் 18 வயதுடைய சிறார்கள், 2  முதல் 6 மற்றும் 6  முதல் 12 வயதுடைய குழந்தைகள் என 3 பிரிவுகளாக இந்த பரிசோதனை மேற்கொள்ளப்பட்டு வருகிறது.

இந்த ஆய்வானது நாடு முழுவதும் உள்ள உடல்வலிமைமிக்க 525 தன்னார்வலர்களை கொண்டு மேற்கொள்ளப்படுகிறது. அவர்களுக்கு முதல் டோஸ் தடுப்பூசி செலுத்தப்பட்டு 28 நாட்கள் கழித்து 2 ஆம் டோஸ் தடுப்பூசி செலுத்தி பரிசோதிக்கப்பட உள்ளது. அதன்படி 2 முதல் 6 வயதுக்கு உட்பட்ட குழந்தைகளுக்கு கோவாக்சின் தடுப்பூசியின் முதல் டோஸ் செலுத்தப்பட்டு பரிசோதிக்கப்பட்டுவிட்ட நிலையில் தற்போது  2 ஆம் டோஸ் தடுப்பூசி செலுத்தப்பட உள்ளது. இச்சோதனை அடுத்த வாரம் தொடங்க உள்ளதாகவும் தெரிவிக்கப்பட்டுள்ளது. 

இந்த நிலையில் இந்தியாவில் 18 வயதுக்கு கீழ் உள்ள குழந்தைகளுக்கு வரும் செப்டம்பர் மாதத்திற்குள்ளாக தடுப்பூசி செலுத்தும் பணி தொடங்கப்பட கூடும் என டெல்லி எய்ம்ஸ் மருத்துவமனை தலைவர் டாக்டர் ரன்தீப் குலேரியா தெரிவித்துள்ளார். கோவாக்சின், பைசர் மற்றும் சைடஸ் காடில்லா நிறுவனங்களின் தடுப்பூசிகள் தயார் நிலையில் இருப்பதாகவும் அவர் தெரிவித்தார்.

ஹைதராபாத் ஸ்ரீசைலம் அருகே காரும் காரும் நேருக்கு நேர் மோதிய விபத்தில் 8 பலியான சம்பவம் அதிர்ச்சியையும் சோகத்தையும் ஏற்படுத்தியுள்ளது.

ஹைதராபாத் ஸ்ரீசைலம் இடையே எட்டு வழி தேசிய நெடுஞ் சாலை உள்ளது. ஆனாலும் பொதுமக்கள் வழக்கமாக சாலை விதிகளை மீறி எதிர் திசையில் பயணிப்பது வழக்கமாக உள்ளது. இந்நிலையில் ஆந்திர மாநிலம் நாகர் கர்னூல் அருகே  தேசிய நெடுஞ்சாலையில் எதிரெதிர் திசையில் வேகமாக வந்து கொண்டிருந்த இரண்டு கார்கள் நேருக்கு நேருக்கு மோதி கொண்டது.

இந்த விபத்தில் இரண்டு கார்களிலும் பயணித்தவர்களில் 8 பேர் உடல் நசுங்கி பரிதாபமாக பலியாகினர்.  இரண்டு பேர் படுகாயமடைந்து தற்போது மருத்துவமனையில் சிகிச்சை பெறுகின்றனர். இதுபற்றி தகவல் அறிந்த நாகர்கர்னூல் போலீசார்  உயிரிழந்தவர்க ளின் உடல்களை மீட்கும் பணியில் ஈடுபட்டு வருகின்றனர்.மேலும் படுகாயம் அடைந்த 2 பேரையும் மீட்டு சிகிச்சைக்காக ஹைதராபாத் மருத்துவமனைக்கு அனுப்பி வைத்தனர்.