பஞ்சாப் முன்னாள் முதலமைச்சர் பிரகாஷ் சிங் பாதலுக்கு கொரோனா தொற்று உறுதி செய்யப்பட்டுள்ளது. இதனை தொடர்ந்து அவர் மருத்துவமனையில் அனுமதிக்கப்பட்டு சிகிச்சை பெற்று வருகிறார்.

இந்த செய்தியை அவரது மகன் சுக்பீர் சிங் பாதல் உறுதிப்படுத்தியுள்ளார்.  இந்தநிலையில் பஞ்சாப் முன்னாள் முதலமைச்சர் பிரகாஷ் சிங் பாதலுடன் தொலைபேசி வாயிலாக தொடர்பு கொண்டு பேசிய பிரதமர் மோடி அவரது உடல் நலன் குறித்து விசாரித்துள்ளார்.

பிரகாஷ் சிங் பாதலுக்கு லேசான அறிகுறிகளே தென்படுவதாகவும், அவர் நலமுடன் இருப்பதாகவும் கூறப்படுகிறது.

அருணாச்சல பிரதேசத்தில் சீன ராணுவத்தால் கடத்திச் செலப்பட்ட சிறுவனை மீண்டும் ஒப்படைக்கும் படி இந்திய ராணுவம் சீன ராணுவத்தை வலியுறுத்தியுள்ளது.

அருணாச்சல பிரதேசத்தின் அப்பர் சியாங் மாவட்டத்துக்கு உட்பட்ட ஜிடோ கிராமத்தைச் சேர்ந்த இருவர் துதிங் பகுதிக்கு வேட்டையாட சென்ற நிலையில் அவர்களை சீன ராணுவம் சிறைபிடித்துள்ளது.

இதில் ஜாணி யாயிங் என்ற இளைஞர் மட்டும் அங்கிருந்து தப்பி வர, மிரம் தரோன் என்ற சிறுவனை சீன ராணுவம் கடத்திச் சென்றதாக தெரிகிறது. 

இது குறித்து இந்திய ராணுவம் உடனடியாக சீன ராணுவத்தை தொடர்பு கொண்டு பேசியதாகவும், இந்திய சிறுவனை நெறிமுறையின் படி திரும்பப் ஒப்படைக்க வலியுறுத்தியுள்ளதாகவும் ராணுவம் தரப்பில் தெரிவிக்கப்பட்டுள்ளது. 

மண்டல மற்றும் மகர விளக்கு சீசனில் 147 கோடி ரூபாய் வருமானம் கிடைத்துள்ளதாக சபரிமலை கோவில் நிர்வாகம் தெரிவித்துள்ளது.

சபரிமலை ஐயப்பன் கோவிலில் கடந்த 14 ஆம் தேதி மகரவிளக்கு பூஜையும், மகர ஜோதி தரிசனமும் நடைபெற்றது.

ஒரு லட்சத்திற்கும் மேற்பட்ட பக்தர்கள் மகர ஜோதியை தரிசனம் செய்தனர். மகரவிளக்கு பூஜை முடிந்த பின்னரும் சபரிமலையில் பக்தர்கள் குவிந்து வருகின்றனர்.

மகரவிளக்கு காலம் முடிவடைந்ததையடுத்து, இன்று காலை 6.  30 மணியளவில் கோவில் நடை சாத்தப்பட்டது.

இதை தொடர்ந்து மீண்டும் மாசி மாத பூஜைகளுக்காக பிப்ரவரி மாதம் 12 ஆம் தேதி கோவில் நடை திறக்கப்பட உள்ளது.  இந்த நிலையில் நடப்பாண்டில் மண்டல மற்றும் மகரவிளக்கு பூஜை காலத்தில் இதுவரை 147 கோடி ரூபாய் கிடைத்துள்ளதாக சபரிமலை கோவில் நிர்வாகம் தெரிவித்துள்ளது.

நல்லிணக்கத்தை கெடுக்கும் வகையில் செயல்படும் இணையதளங்கள், யூ-டியூப் சேனல்களை முடக்க நடவடிக்கை எடுக்கப்படும் என மத்திய அரசு எச்சரித்துள்ளது.

டெல்லியில் நடைபெற்ற மத்திய அமைச்சரவை கூட்டத்திற்குப் பிறகு, தகவல் மற்றும் ஒளிபரப்புத்துறை அமைச்சர் அனுராக் தாக்கூர் செய்தியாளர்களை சந்தித்து பேசினார். அப்போது பேசிய அவர், பாகிஸ்தானில் இருந்து இயக்கப்படும் 20 இணையதள கணக்குகள் அடையாளம் காணப்பட்டு அவற்றை முடக்க நடவடிக்கை எடுக்கப்பட்டிருப்பதாக தெரிவித்தார்.   

இந்தியாவிற்கு எதிரான கருத்துகள், பொய்யான தகவல்களை பரப்பும், நல்லிணக்கத்தை கெடுக்கும் வகையில் செயல்படும் இணையதளங்கள், யூ-டியூப் சேனல்கள் உள்ளிட்டவை கண்காணிக்கப்பட்டு அவற்றை முடக்க நடவடிக்கை எடுக்கப்படும் எனவும் அமைச்சர் அனுராக் தாக்கூர் தெரிவித்துள்ளார்.  

இதனிடையே இந்திய இறையாண்மை மற்றும் ஒருமைப்பாட்டிற்கு எதிராக செயல்பட்டதாக எழுந்த புகாரின் அடிப்படையில், 19 யூ-டியூப் சேனல்கள் மற்றும் 2 இணையதளங்கள் ஏற்கனவே முடக்கப்பட்டது குறிப்பிடத்தக்கது. 

நடிகை வித்யாபாலனை ‘முதல்வரின் இருக்கை’ என குறிப்பிட்டு ஆம் ஆத்மி வெளியிட்ட வீடியோவிற்கு  காங்கிரஸ் கடும் கண்டனம் தெரிவித்துள்ளது.

கடந்த சட்டப்பேரவை தேர்தலில், காங்கிரஸுக்கு அடுத்தபடியான இடத்தை தக்க வைத்து கொண்ட ஆம் ஆத்மி, நடப்பு தேர்தலில் ஆட்சியை கைப்பற்ற தீவிரம் காட்டி வருகிறது. இதற்கென முதல்வர் வேட்பாளரை தேர்ந்தெடுக்கும் பொறுப்பை மக்களிடமே அக்கட்சியின் ஒருங்கிணைப்பாளர் கெஜ்ரிவால் வழங்கியிருந்தார்.

இதனிடையே நேற்று பகவந்த் மானை பஞ்சாப் முதல்வர் வேட்பாளராக அறிவித்த அவர், வீடியோ ஒன்றையும் வெளியிட்டிருந்தார். அதில் மாநிலத்தின் முதல்வர் பதவியை பிடிக்க இருவேறு கட்சி தலைவர்கள் மோதிக்கொள்வது போன்றும், நடிகை வித்யாபாலனை முதல்வர் இருக்கை ஆக சித்தரித்தும் காட்சி இடம்பெற்றிருந்தது.

இந்தநிலையில் வித்யாபாலனை பொருளாக குறிப்பிட்டுள்ளதற்கு கண்டனம் தெரிவித்துள்ள காங்கிரஸ், அக்கட்சியில் ஒரு பெண் தலைவர் கூட இல்லாததற்கான காரணம் தற்போது வெளிப்பட்டுள்ளதாக டுவிட்டரில் விமர்சித்துள்ளது. 

Punjab's next CM is in the house!#AAPdaCM pic.twitter.com/E2EIcxwVep

— AAP (@AamAadmiParty) January 18, 2022