முதல் இரண்டு நாட்களில் வசூல் வேட்டை நடத்தியுள்ள விருமன் திரைப்படம் வார இறுதிநாட்களில் மேலும் வசூலை அள்ளும் என படக்குழுவினர் எதிர்பார்த்து காத்திருக்கின்றனர். 

விருமன்: முத்தையா இயக்கத்தில் கார்த்தி, அதிதி சங்கர் ஆகியோரது நடிப்பில் கடந்த 12-ம் தேதி வெளியான திரைப்படம் விருமன். சூர்யாவின் 2டி நிறுவனம் தயாரித்துள்ள இப்படம், ஆக்‌ஷன், காமெடி, ரொமான்ஸ் என ஒரு குடும்பத்திற்கான படமாக வெளியாகி மக்களிடம் கலவையான விமர்சனங்களை பெற்று வருகிறது. 

ப்ரோமோஷன்: இப்படத்திற்காக படக்குழுவினர் கொடுத்த ப்ரோமோஷன் பணிகள், ரசிகர்களுக்கு இப்படம் பார்க்க ஆர்வத்தை தூண்டியது எனலாம். கார்த்தியும், அதிதி சங்கரும் வளைத்து, வளைத்து ப்ரோமோஷன் பணிகளில் மும்முரமாக ஈடுபட்டனர். அதிதி சங்கருக்கு இது முதல் படம் என்பதால், இப்படத்தில் அவர் எப்படி நடித்திருக்கிறார் என்ற எதிர்பார்ப்பையும் ஏற்படுத்தியது. 

விமர்சனம்: முத்தையா படம் என்றாலே கிராமத்தில் நடக்கும் விஷயங்களை அப்படியே வெளிச்சம் போட்டு காட்டும் வகையில் இருக்கும். அப்படி தான் விருமன் படமும் முற்றிலும் கிராமத்து கதைகளத்திலேயே உருவாகியிருந்தது. இருப்பினும், இதற்கு முந்தைய படங்களின் காட்சிகளே இப்படத்திலும் நிரம்பி இருப்பதாகவும், புதிதாக எதுவும் இல்லை என எதிர்மறையான விமர்சனங்களும், குடும்பத்துடன் பார்த்து ரசிக்கக் கூடிய படமாக உள்ளது என்ற நேர்மறையான விமர்சனங்களும் விருமன் படத்திற்கு கிடைத்துள்ளது. 

வசூல்: 25கோடி ரூபாய்க்கும் குறைவான பட்ஜெட்டில் உருவாகியிருந்த விருமன் திரைப்படம் வெளியான முதல் நாளிலையே 8 கோடி ரூபாய் வரை வசூல் புரிந்ததாக தகவல் வெளியானது. இந்த நிலையில் முதல் இரண்டு நாளில் விருமன் திரைப்படம் 17 கோடி ரூபாயை வசூல் செய்திருப்பதாகவும், இதனால் படக்குழு மகிழ்ச்சியடைந்திருப்பதாகவும் கோலிவுட் வட்டாரங்கள் தெரிவிக்கின்றன. விருமனோடு போட்டியாக வெளியான ஆமிர்கானின் லால் சிங் சத்தா படு தோல்வியை சந்தித்ததால், வார இறுதி நாட்களில் விருமன் படத்திற்கு கூடுதல் தியேட்டர்கள் ஒதுக்கப்பட்டுள்ளது. ஆகையால் வசூல் இன்னும் அதிகமாகும் என எதிர்பார்க்கப்படுகிறது. 

ஹிப் ஹாப் தினம் :

ஹிப்-ஹாப் தினம், ஒவ்வொரு ஆண்டும் ஆகஸ்ட் 11ம் தேதி அமெரிக்காவில் கொண்டாடப்படுகிறது. ஹிப்-ஹாப் என்பது ஒரு தெரு முனையிலிருந்து, உலகின் மிக முக்கியமான இசை வகைகள் மற்றும் கலாச்சார தாக்கங்களில் ஒன்றாக முன்னேறியுள்ளது. ஹிப்-ஹாப், மற்ற இசை பாணிகளைப் போலவே, பிற வடிவங்களில் அதன் வேர்களைக் கொண்டுள்ளது, மேலும் அதன் வளர்ச்சி பல்வேறு கலைஞர்களால் வடிவமைக்கப்பட்டது. 

ஹிப் ஹாப்பின் வரலாறு : 

ஹிப்-ஹாப் தினமானது ஜமைக்காவின், டி.ஜே, கூல் ஹெர்க்கிடம் இருந்து தொடங்கப்பட்டது. அவர் தான் ஹிப்-ஹாப் தினத்தை நிறுவிய பெருமைக்குரியவர். ஹிப்-ஹாப்பில் கூல் ஹெர்க்கின் தாக்கம் மிகவும் ஆழமானது. அதாவது 1973 ம் ஆண்டு, அண்ணன்-சகோதரி டி.ஜே. கூல் ஹெர்க் மற்றும் சிண்டி கேம்ப்பெல் தான் இந்த வகை தோன்ற காரணமானவர்கள். 

ஹிப் ஹாப் என்றால் என்ன ?

ஹிப்-ஹாப், 1980கள் மற்றும் 90களில் பரவலான கலாச்சார இயக்கம். மேலும், ராப்பிற்கான பின்னணி இசை, தாள அல்லது ரைமிங் பேச்சை உள்ளடக்கிய இசை பாணியானது, இயக்கத்தின் மிகவும் நீடித்த மற்றும் செல்வாக்குமிக்க கலை வடிவமாக மாறியது, இந்த ஹிப் ஹாப். 

தமிழ் ஹிப் ஹாப் :

தமிழ் ஹிப் ஹாப் பாடகர்களாக யோகி.பி, லேடி கஷ், என பலர் இருந்தாலும் சமீப காலங்களாக பரீட்சையமானவர் ஹிப் ஹாப் ஆதி தான். பல ஹிப் ஹாப் பாடல்களை பாடி வரும் இவர், திரை துறையிலும் இறங்கி கலக்கி வருகிறார். ஆல்பம் பாடல்களில் ஹிப் ஹாப் பாடலிகளை கொடுத்து வந்தவர், சினிமாவிலும் அதனை வைக்க தொடங்கினார். முன்னதாக அவர் ஹிப் ஹாப் தமிழா என்ற இசை குழுவில் இருந்தார். முதலில் ' சென்னை சிட்டி கேங்ஸ்டர் ' என்ற பெயரில், வணக்கம் சென்னை படத்தில் பாடியுள்ளார். அதன் பின்னர் ஆம்பள திரைப்படத்தில் இசையமைப்பாளராகவும் அறிமுகமானார். சினிமா துறைக்கு வருவதற்கு முன்பிருந்தே அவரின் இசைக்கென்று தனி ரசிகர் பட்டாளமே உள்ளது. 

ஜெய்பீம் பட விவகாரத்தில் நடிகர் சூர்யா, இயக்குனர் ஞானவேலுக்கு எதிராக தொடரப்பட்ட வழக்கை சென்னை உயர்நீதிமன்றம் ரத்து செய்தது.

புண்படுத்தும் வகையில் படம் இருந்ததாக புகார்

நடிகர் சூர்யா நடித்து, ஞானவேல் இயக்கிய ஜெய்பீம் படத்தில், ஒரு சமூக மக்களின் மனதை புண்படுத்தும் வகையில், காட்சிகள் அமைக்கப்பட்டதாக கூறி தயாரிப்பாளர்கள் சூர்யா, ஜோதிகா, இயக்குனர் ஞானவேல் உள்ளிட்டோர் மீது குற்ற நடவடிக்கை எடுக்க கோரி சந்தோஷ் என்பவர் சைதாப்பேட்டை நீதிமன்றத்தில் மனு தாக்கல் செய்தார்.

நடிகர் சூர்யா உள்ளிட்டோருக்கு எதிராக வழக்குப்பதிவு

மனுவை விசாரித்த சைதாப்பேட்டை நீதிமன்றம், கடந்த 2021 டிசம்பர் 8ல் மனுதாரர் அளித்த புகார் மீது வழக்குப்பதிவு செய்ய உத்தரவிட்டது. அதன் அடிப்படையில் வேளச்சேரி போலீசார், நடிகர் சூர்யா உள்ளிட்டோருக்கு எதிராக வழக்குப்பதிவு செய்தனர்.

உயர் நீதிமன்றத்தில் மனுதாக்கல்

இந்த வழக்கை ரத்து செய்யவும், விசாரணைக்கு தடை விதிக்கவும் கோரி ஜெய்பீம் பட இயக்குனர் ஞானவேல் மற்றும் நடிகர் சூர்யா ஆகியோர் சென்னை உயர் நீதிமன்றத்தில் மனுதாக்கல் செய்தனர்.  அதில், இந்த புகாரை தாக்கல் செய்யும் முன்பே படத்தில் காலண்டர் இடம்பெற்றுள்ள சர்ச்சை காட்சி நீக்கப்பட்டதை சுட்டிக்காட்டிகாட்டினர்.

வழக்கை ரத்து செய்து உத்தரவு

வன்னிய சமுதாயத்தினரை இழிவுபடுத்தும் வகையில் காட்சிகள் அமைக்கப்பட்டதாக கூற எந்த ஆதாரங்களும் இல்லை என்றும் மனுவில் தெரிவிக்கப்பட்டிருந்தது. இந்த மனு நீதிபதி சதிஷ் குமார் அமர்வில் விசாரணைக்கு வந்த போது, இருதரப்பு சார்பிலும் வாதங்கள் முன்வைக்கப்பட்டது. இந்த வாதங்களை ஏற்றுக்கொண்ட நீதிபதி சதிஷ் குமார், நடிகர் சூர்யா மற்றும் ஞானவேலுக்கு எதிரான இந்த வழக்கை ரத்து செய்து உத்தரவிட்டார்.

சுமார் 25 வருடங்களுக்கும் மேலாக, அரசியலுக்கு வர மாட்டேன் என சொல்லிக் கொண்டிருந்த தென்னிந்திய திரையுலக சூப்பர் ஸ்டார் ரஜினிகாந்த, தற்போது அரசியலில் குதித்து விட்டார். அது வரை அவர் பேசியது அனைத்தும் தனிப்பட்ட கருத்துகளாகவே பார்க்கப்பட, தற்போது அவர் நின்றாலும், அசைந்தாலும், நடந்தாலும், அதற்கான அரசியல் பின்னணி என்ன என்ற கேள்வி தான் மக்களிடையே நிலைநின்றுள்ளது.

ஆளுநரிடம் ஆலோசனை:

இந்த வரிசையில், சமீபத்தில், நமது தமிழ்நாட்டு ஆளுநர் ஆர்.என்.ரவியை நேரில் சந்தித்து அரசியல் பேசியதை அடுத்து, பாஜக பக்கம் சாய்கிறாரா ரஜினி என்றும், ஆளுநரிடம் நடக்க போகும் தேர்தல் குறித்து பேசினாரா என்றெல்லாம் பல வகையான கேள்விகள் கிளம்ப துவங்கின. மேலும், தனது அரசியல் பிரவேசத்திற்கான அஜெண்டாவே ஆன்மீக அரசியல் தான் என்று கூறியதாலோ என்னவோ, அவர் முழு நேர ஆர்.எஸ்.எஸ் ஆதரவாளராகவே சிலரால் விமர்சிக்கப்படும் நிலைக்கு தள்ளப்பட்டார்.

தேசிய கொடி டிபி:

இந்த நிலையில், தற்போது, 75வது சுதந்திர ஆண்டை கொண்டாடும் இந்தியாவின் 75 வது சுதந்திர தினத்தை பிரம்மாண்டமாகக் கொண்டாட, இந்திய பிரதமர் நரேந்திர மோடி, ஒரு சில கோரிக்கைகளை மக்கள் முன்னிலையில் வைத்தார். அதில் ஒன்று தான் பொது மக்கள் தங்கலது சோசியல் மீடியா கணக்குகளில் தங்களது விவரப் படங்கள் அதாவது டிஸ்ப்ளே பிக்சரை, இந்தியக் கொடியாக மாற்ற வேண்டும் என்பது. பல பிரபலங்கள் தொடங்கி, பொது மக்கள் வரை, ஏன் பிரபல மீம் பக்கங்கள் கூட தங்களது டிபி-யை மூவர்ண கொடியாக மாற்றி, தங்களது தேசப்பற்றை வெளிப்படுத்தியும், தேசியக் கொடி மீதான தங்களது மரியாதை காட்டும் நிமித்தமாகவும் வெளிப்படுத்தி வருகின்றனர்.

டிபி மாற்றிய சூப்பர் ஸ்டார்:

அதே போல சூப்பர் ஸ்டார் ரஜினிகாந்தும், தனது டிபி யை மூவர்ண கொடியாக மாற்றி, தனது மரியாதையை வெளிப்படுத்தியுள்ளார். ரசிகர்களுக்கு முன்னொடியாக விளங்குவதாக பலரால் ரஜினி போற்றப்பட்டாலும், ஒரு சிலர் அவரை கேளி செய்து வருகின்றனர். இவர் டிபி மாற்றியதை ஊடகவியாளர்களும், பத்திரிக்கையாளர்களும் செய்திகளாக வெளியிட்டனர். அதற்கு கமெண்ட் செய்த நெட்டிசன்கள், ரஜினியை சங்கி என்றும், வலதுசாரி என்று பங்கமாக கலய்த்து வருகின்றனர். மேலும், பிரபல நடிகை மற்றும் டாக்டரான ஷர்மிளா, தனது ட்விட்டர் பக்கத்தில், “ரொம்ப முக்கியம்!” என, இது தொடர்பான செய்தியைப் பகிர்ந்து கேளியாக பதிவு செய்துள்ளார்.

இது தொடர்பான செய்திகள் தற்போது இணைத்தில் படு வைரலாகி வருகிறது.

என்ன தான் ஹிந்தி படத்திற்கு உதயநிதி ஆதரவு அளித்திருந்தாலும் கூட மக்கள் ஆமிர்கான் படத்திற்கு ரசிகர்கள் யாரும் ஆதரவு அளிக்காமல் போனது ஏமாற்றத்தை ஏற்படுத்தியுள்ளது. 

லால் சிங் சத்தா: கொரோனா ஊரடங்கால் நீண்ட நாட்களாக பாலிவுட் நடிகர் ஆமிர் கான் தயாரிப்பிலும், நடிப்பிலும் உருவாகியிருந்த லால் சிங் சத்தா திரைப்படம் தியேட்டர்களில் வெளியாகாமல் இருந்து வந்தது. கொரோனா ஊரடங்கு மட்டுமில்லாது ஆமிர் கானின் சர்ச்சைப்பேச்சும் இப்படம் தள்ளிப்போனதற்கு காரணம். 

பிகே படத்தால் கிளம்பிய எதிர்ப்பு: தனது முன்னாள் மனைவி கிரணிடம் 2015-ம் ஆண்டு நாட்டில் சகிப்புத் தன்மை குறைந்து வருவதால், நாட்டை விட்டு வெளியேறி விடலாம் என கேட்டதாக கூறியது அப்போது சர்ச்சையை ஏற்படுத்தியது. அதுமட்டுமின்றி அவர் நடிப்பில் வெளியாகியிருந்த பிகே திரைப்படமும் இந்துக்கள் மத்தியில் பிரச்னையை ஏற்படுத்தியது. இந்து மதத்தை அவர் புண்படுத்தி விட்டதாக கூறி, அவரது படங்களை புறக்கணிக்க வேண்டும் என சமூக வலைதளங்களில் பேச ஆரம்பித்துவிட்டனர். 

என் படங்களை பாருங்கள்: இந்த கருத்துகளுக்கு பதிலளித்த ஆமிர்கான், இது போன்ற  பாய்காட் பாலிவுட்.. பாய்காட் அமீர்கான்.. பாய்காட் லால் சிங் சத்தா ஹேஷ்டேக்குகள் எனக்கு மிகவும் கவலையை அளிக்கிறது எனக் கூறியிருந்தார். ”தயவு செய்து எனது படத்தை புறக்கணிக்காதீர்கள் என்றும் தயவு செய்து என் படங்களை பாருங்கள்” என்றும் கூறியிருந்தார். 

டிக்கெட் புக்கிங் இல்லை: பல தடைகளுக்கு பிறகு வெளியான லால் சிங் சத்தா படத்தை தமிழில் உதயநிதியின் ரெட் ஜெயண்ட் வாங்கி வெளியிட்டது. இதற்கான செய்தியாளர் சந்திப்பின் போது பேசிய உதயநிதி, இந்தி மொழிக்கு நாங்கள் எதிரி அல்ல, இந்தியை திணித்தால் தான் எதிர்ப்பு தெரிவிப்போம் என கூறியிருந்தார். இன்று வெளியான இப்படத்தின் முதல் ஷோவிற்கு தமிழ்நாட்டில் பெருமளவில் டிக்கெட் புக்கிங் செய்யப்படவில்லை. 

ஏமாற்றத்தை அளித்த வரவேற்பு: சராசரி குழந்தைகளை விட ஐக்யூ லெவல் கொண்ட லால் சிங் சத்தா என்கிற மனிதனின் வாழ்க்கை, காதல் அதனால் ஏற்படும் ஏமாற்றங்கள் போன்றவற்றை விவரிக்கும் படம் தான் லால் சிங் சத்தா. ஹாலிவுட்டில் ஆஸ்கர் விருதுகளை அள்ளிய ஃபாரஸ்ட் கம்ப் படத்தின் ரீமெக்காக இப்படம் வெளியானது. ஆனால் பாலிவுட் ரசிகர்களே இப்படத்திற்கு வரவேற்பு அளிக்காதது பெரும் ஏமாற்றத்தை ஏற்படுத்தியுள்ளது.