திருச்சி மாவட்ட ஆட்சியர் அலுவலகத்தில் இன்று மாவட்ட ஆட்சியர் பிரதீப் குமார் தலைமையில் விவசாயிகள் குறைதீர் கூட்டம் நடைபெற்றது. பல்வேறு விவசாய சங்க பிரதிநிதிகள் மற்றும் விவசாயிகள், வேளாண்மை மற்றும் தோட்டக்கலை துறை அதிகாரிகள் பங்கேற்ற இந்த கூட்டத்தில் ஆட்சியரிடம் தங்களது கோரிக்கை மனுக்களை விவசாயிகள் அளித்தனர்.

அதேசமயம் திருச்சி மாவட்டத்தில் வேளாண் விற்பனை மையங்களில் யூரியா, பொட்டாசியம் மற்றும் உரங்கள் தட்டுப்பாடு நிலவுவதாகவும் விவசாயிகளுக்கு தேவையான உரங்கள் கிடைக்காததாலும், காவிரி மற்றும் கொள்ளிடம் ஆற்றில் ஏற்பட்ட வெள்ளத்தால் பாதிக்கப்பட்ட பயிர்களுக்கு இதுவரையிலும் இழப்பீடு வழங்கப்படாததை கண்டித்தும் இன்று தமிழக ஏரி மற்றும் ஆற்று பாசன விவசாயிகள் சங்கம் சார்பில் விவசாயிகள் உரசாக்குகளை கையில் ஏந்தியபடியும், அழுகிய வாழை மரங்களை கையில் வைத்துக் கொண்டு மாவட்ட நிர்வாகத்தை கண்டித்து கோஷம் எழுப்பினர்.

மேலும் ஒரு ஏக்கர் நெல்லுக்கு  ரூ.30,000, வாழைக்கு 1 லட்ச ரூபாய் இழப்பீடு வழங்க வேண்டும், கரும்பு டன்னுக்கு ரூ.4000 வழங்க வேண்டும் என்றும் 17 சதவீதம் ஈரப்பதம் இருந்தால் மட்டுமே நெல் கொள்முதல் செய்யப்படும் என்ற உணவுத்துறை அமைச்சரின் அறிவிப்பு அதிர்ச்சி அளிப்பதாகவும் இதனை மாற்றி 20 சதவீதம் வரை ஈரப்பதம் உள்ள நெல்லை கொள்முதல் செய்ய அனுமதி அளிக்க வேண்டும் எனவும் விவசாய சங்க மாநிலச் செயலாளர் கேட்டுக் கொண்டார்.

தூத்துக்குடி வ.உ.சிதம்பரனார் துறைமுகத்தில் 100 கோடியில் பொருளாதார மேம்பாட்டு மண்டலம் அமைப்பது உட்பட ரூ.228 கோடி மதிப்பில் பல்வேறு புதிய  திட்டங்களை மத்திய கப்பல், நீர்வழிப் போக்குவரத்து மற்றும் ஆயுஷ் துறை அமைச்சர் சர்பானந்தா சோனாவால் அடிக்கல் நாட்டி தொடங்கி வைத்தார்.

தூத்துக்குடி துறைமுகத்தில்  மேம்படுத்தப்பட்ட நிலக்கரி கிடங்கு சாலை, 100 சதவீதம் எல்இடி ஆக மாற்றும் திட்டம், புதிய 6 மின்சார கார் சேவைகள், தகவல் தொழில்நுட்ப இணைப்பு மேம்பாடு, மின் போக்குவரத்து திட்ட மேம்பாடு, 140 கிலோ வாட் மேற்கூரை சூரிய மின் திட்டம், 140 மெட்ரிக் டன் மின்னணு எடை மேடை, கப்பல் போக்குவரத்து மென்பொருள், ஆக்சிஜன் ஆலை ஒருங்கிணைந்த மருத்துவம் மற்றும் ஆயுஷ் பிரிவு ஆகிய முடிவுற்ற திட்டங்களையும் தொடங்கி வைத்தார்.

அதனை தொடர்ந்து, 1 மணி நேரத்தில் 100 சரக்கு பெட்டக வாகனங்களை சோதனை செய்யும் ஸ்கேனர் உள்ளிட்ட திட்டங்களையும் அவர் தொடங்கி வைத்தார்.

விருதுநகர் மாவட்டம் வத்திராயிருப்பு அருகே மேற்கு தொடர்ச்சி மலை அடிவாரப் பகுதியான பட்டுபூச்சி ஜெயந்தி நகர் பகுதியில் சுமார் 20க்கும் மேற்பட்ட மலைவாழ் குடும்பங்கள் வசித்து வருகின்றன. இவர்கள் 15 வகையான பொருட்களை எடுத்து விற்பனை செய்ய அரசு இவர்களுக்கு அனுமதி வழங்கி உள்ளது. இதனையே தங்களது வாழ்வாதாரமாக கொண்டுள்ள மலைவாழ் மக்களுக்கு தற்போது வனத்துறை பல்வேறு கட்டுப்பாடுகளை விதிப்பதாகவும், தொந்தரவு செய்வதாகும் மலைவாழ் மக்கள் குற்றம் சாட்டுகின்றனர். இன்னம் பட்டை 2 கிலோ மட்டுமே எடுத்துச் செல்ல வேண்டும் என வனத்துறையினர் கெடுபிடி காட்டுவதாக  வேதனை தெரிவிக்கின்றனர். அது மட்டுமல்லாது தேன் எடுத்து அதை வெளியில் கொண்டு விற்பனை செய்ய விடாமல் நீங்களே குடித்துக் கொள்ளுமாறும் தங்களை அலட்சியபடுத்துவதாகவும் குற்றம் சாட்டு எழுந்துள்ளது.

மேலும் வீடுகள் சேதம் அடைந்து காணப்படுவதால் பாம்பு உள்ளிட்ட விஷ ஜந்துக்கள் வீட்டிற்குள் வருவதாக மலைவாழ் மக்கள் அச்சம் தெரிவிக்கின்றனர். அதோடு தங்கள் பகுதியில் நியாய விலை கடை இல்லாததால்  4 கிலோமீட்டர் வரை நடந்து சென்று தமிழக அரசால் வழங்கக்கூடிய இலவச அரிசியை பெரும் நிலை உள்ளதாகவும் குற்றம் சாட்டும் அவர்கள் தங்கள் பகுதியிலேயே அரிசியை வழங்க ஏற்பாடு செய்ய வேண்டும் எனவும் கோரிக்கை விடுக்கின்றனர். அது மட்டுமல்லாது பெண்களுக்கு சுகாதார வளாகம்  இல்லாததால் மிகுந்த சிரமத்திற்கு உள்ளாகி வருவதால், சுகாதார வளாகம் கட்டித் தர நடவடிக்கை எடுக்க வேண்டும் எனவும் கோரிக்கை விடுத்துள்ளனர்.

இதுபோன்ற பல்வேறு கோரிக்கைகள் குறித்து அதிகாரிகளிடம் தெரிவித்தும் எந்தவித நடவடிக்கையும் எடுக்காததால் தாங்கள் வசிக்கும் பகுதியிலிருந்து வெளியேறி கோயிலாவ அணைப்பகுதியில் உள்ள காட்டுப் பகுதியில் தங்களது பிள்ளைகளுடன் குடியேறும் போராட்டத்தில் ஈடுபட்டு அங்கேயே சமைத்து வாழ்ந்து வருகின்றனர். மேலும் பள்ளிக்குச் செல்லும் மலைவாழ் குழந்தைகள் இந்த பகுதியிலிருந்து மிகுந்த சிரமத்துடனயே சென்று வரும் நிலை உள்ளது. அதனால் அதிகாரிகள் தங்களது கோரிக்கைகளை நிறைவேற்றவில்லை என்றால் தாங்கள் இங்கேயே இருக்கப் போவதாகும் தங்கள் பகுதிக்கு வரப்போவது இல்லை எனவும் மலைவாழ் மக்கள் தெரிவித்துள்ளனர்.

சேலம் அருகே ஆச்சசாங்குட்டப்பட்டி பகுதியைச் சேர்ந்தவர் கோகுல்(17). இவர் கோரிமேடு பகுதியில் இயங்கி வரும் அரசு தொழிற்பயிற்சி நிலையத்தில் இரண்டாம் ஆண்டு தொழிற்கல்வி பயின்று வருகிறார். இந்த நிலையில் ஆயுத பூஜை பண்டிகைக்காக சக மாணவர்களுடன் கோகுல் ஆய்வுக்கூடத்தின் மேற்கூரையில் ஏறி சுத்தம் செய்துள்ளார். அப்போது திடீரென 20 அடி உயரத்தில் இருந்து தவறி விழுந்ததில் கோகுல் படுகாயம் அடைந்தார். 

அவரை சக மாணவர்கள் மற்றும் பேராசிரியர்கள் மீட்டு சேலம் அரசு மருத்துவமனையில் சிகிச்சைக்காக அனுமதித்தனர். அங்கு அவருக்கு தீவிர சிகிச்சை அளிக்கப்பட்டு வருகிறது. இச்சம்பவம் குறித்து தகவல் அறிந்த கன்னங்குறிச்சி காவல் நிலைய போலீசார் சம்பவ இடத்திற்கு விரைந்து சென்று விசாரணை மேற்கொண்டு வருகின்றனர்.

புதுக்கோட்டை மாவட்டம் விராலிமலை அருகே உள்ள கொடும்பாளூரில் 10க்கும் மேற்பட்ட இளைஞர்கள் ஆர்வமாக கலந்து கொண்டு பனை  விதைகளை நட்டனர். புதுக்கோட்டை மாவட்டத்தில் மிகப்பெரிய குளத்தில் இரண்டாவதாக கொடும்ப குளம் அமைந்துள்ளது. இந்த குளத்தின் கரையை சுற்றி ஆயிரம் பனை விதைகள் மற்றும் விராலிமலை, விராலூர் உள்ளிட்ட பல்வேறு பகுதிகளில் உள்ள குளங்களில் 10,000 க்கும் அதிகமான பனை விதைகள் நடப்பட்டு  உள்ளது. 

இதனால் இந்த பகுதிகளை சுற்றியுள்ள கிராம மக்கள் அந்த இளைஞர்களுக்கு பாராட்டுக்களை தெரிவித்து வருகின்றனர். பனை விதைகள் நடப்படுவதால் குளத்தின் கரைகள் அரிக்கப்படாமல் பாதுகாப்பாக இருப்பதற்காக பனை மரங்கள் வளர்க்கப்படுவது குறிப்பிடத்தக்கது.