காட்டுமன்னார்கோவில் அருகே சுற்றுச் சூழல் பாதுகாப்பு குறித்த விழிப்புணர்வு பேரணி நடைபெற்றது. கடலூர் மாவட்டம் காட்டுமன்னார்கோவில் பகுதியில் நடைபெற்ற இப்பேரணியில், கல்லூரி மாணவ, மாணவியர், ரோட்டரி சங்கத்தினர் என 500க்கும் மேற்பட்டோர் கலந்து கொண்டனர். 

வீராணம் ஏரி ரோட்டரி சங்கம் மற்றும் எம்.ஆர்.கே.கலை மற்றும் அறிவியல் கல்லூரி சார்பில் நடைபெற்ற இப்போரணியில், சுற்றுச்சூழலை பாதுகாக்கும் முறை குறித்தும், மரம் வளர்ப்பு, மழை நீர் சேகரிப்பு உள்ளிட்டவைகள் குறித்து பொதுமக்களிடையே விழிப்புணர்வு ஏற்படுத்தப்பட்டது. 

ராசிபுரம் அருகே அரசு பள்ளியில் தேங்கி  நிற்கும் மழைநீரில் மாணவர்கள் நடந்து செல்லும் அவல நிலை உள்ளதாக குற்றச்சாட்டு எழுந்துள்ளது.

ஜவ்வரிசி ஆலைகளின் கழிவு நீர்

நாமக்கல் மாவட்டம் வெண்ணந்தூர் ஊராட்சி  ஒன்றியம் கொமாரபாளையம் ஊராட்சிக்கு உட்பட்ட பகுதியில் அரசு உயர்நிலைப் பள்ளி செயல்பட்டு வருகிறது. இங்கு 500க்கும் மேற்பட்ட மாணவர்கள்  படித்து வருகின்றனர். இந்தப் பள்ளி அருகே  ஜவ்வரிசி ஆலைகள் செயல்பட்டு வருகிறது. இங்கிருந்து வெளியேறும் கழிவு நீர், பைப்பு வழியாக அருகே உள்ள குட்டைக்கு திறந்து விடப்படுகிறது.

மழை காலங்களில் இந்த குட்டை பகுதியில் இருந்து வெளியேறும்  ஆலை கழிவு நீரானது அருகே உள்ள அரசு உயர்நிலைப்பள்ளி பகுதியில் பல நாட்களாக துர்நாற்றத்துடன் தேங்கி நிற்கிறது.  இதனால் ஆண்டு முழுவதும் பள்ளி வளாகம் பகுதியில் கழிவுகள் தேங்கி வருவதாக குற்றச்சாட்டு எழுந்துள்ளது.

மக்கள் கோரிக்கை

தற்போது அண்மையில் பெய்த மழையால் பள்ளி வளாகம் முழுவதும் பல நாட்களாக நீர் தேங்கிய வண்ணண் உள்ளது. மழை நீருடன் கழிவு நீரும் கலந்து பள்ளி வளாகத்தின் முன்பு குட்டை போல் தேங்கி வருகிறது. இதனால் கடும் துர்நாற்றம் வீசுவதுடன் மாணவ,  மாணவியர்,களுக்கு தொற்றுநோய் பரவும் அபாயம் இருப்பதாக அப்பகுதி பொதுமக்கள் மற்றும் பெற்றோர் தெரிவிக்கின்றனர். பல நாட்களாக இதே நிலை நீடித்து வரும் இந்நிலையில் நீரை அப்புறப்படுத்திட மாவட்ட நிர்வாகம், கல்வித்துறையும் உடனடி நடவடிக்கை எடுக்க வேண்டும் என அப்பகுதி பொதுமக்கள் கோரிக்கை விடுத்தனர்.

கள்ளர் கல்விக் கழகத்திற்கு சொந்தமான இடத்தில் வணிக வளாகம் கட்டுவதற்கு எதிர்ப்பு தெரிவித்து ஆர்ப்பாட்டம் நடைபெற்றது. 

மதுரை மாவட்டம் உசிலம்பட்டி பேரையூர் சாலையில் உள்ள கள்ளர் கல்விக் கழகத்திற்கு சொந்தமான இடத்தில், கள்ளர் கல்விக் கழகத் தலைவர் அனுமதியுடன் வாணிகம் வளாகம் கட்டி வருகின்றனர்.வணிக வளாகம் கட்டுவதற்கு பல்வேறு தரப்பினர் எதிர்ப்பு தெரிவித்து வந்தனர். 

இதற்கு எதிர்ப்பு தெரிவித்து இன்று அகில இந்திய பார்வர்டு பிளாக் கட்சியினர் மற்றும் வழக்கறிஞர்கள் வணிக வளாகம் கட்டுவதற்கு எதிர்ப்பு தெரிவித்து ஆர்ப்பாட்டத்தில் ஈடுபட்டனர்.இந்த ஆர்ப்பாட்டத்தில் வழக்குரைஞர் சுரேந்திரன் தலைமையில் வழக்குரைஞர்களும் எல். எஸ்.இளங்கோவன் தலைமையில் அகில இந்திய ஃபார்வர்டு பிளாக் கட்சியினரும் கலந்து கொண்டனர். 

உலகப் பிரசித்தி பெற்ற பனிமய மாதா 440 ஆவது ஆண்டு திருவிழா பக்தர்களுடன் தொடக்கம் - மறைமாவட்ட ஆயர் ஸ்டீபன் ஆண்டகை ஆலய கொடியை ஏற்றி வைத்தார். கடந்த இரண்டுகள் ஆண்டு, கொரோனா கட்டுப்பாடுகள் காரணமாக பக்தர்கள் பங்கேற்பின்றி திருவிழா நடைபெற்றது.

இந்த ஆண்டு பக்தர்கள் அனுமதிக்கபட்டு பனிமய மாதா ஆலய திருவிழா இன்று காலை கொடியேற்றத்துடன் கோலாகலமாக தொடங்கியது. தூத்துக்குடி பனிமயமாதா ஆலய திருவிழாவில், உள்ளூர் மக்கள் மட்டுமல்லாமல் தமிழகத்தின் பல மாவட்டங்களில் இருந்தும், பல மாநிலங்கள் மற்றும் வெளிநாடுகளில் இருந்தும் மாதாவை தரிசிக்க தூத்துக்குடிக்கு பக்தர்கள் வருவார்கள்.

காலை, கூட்டுத்திருப்பலிக்குப் பிறகு ஆலயத்தின் முன்உள்ள கொடிக்கம்பத்தில் மறைமாவட்ட ஆயர் ஸ்டீபன் ஆண்டகை தலைமையில் பங்கு தந்தை குமார் ராஜா மற்றும் முக்கிய பங்கு நிர்வாகிகள் முன்னிலையில் பனிமய அன்னை திருவிழா  கொடியேற்றப்பட்டது. அப்போது விண்ணுயர பனிமய அன்னை வேண்டி குரல் எழுப்பியும், சமாதான புறாக்களை பறக்கவிட்டும் விழா தொடங்கப்பட்டது.

இந்தத் திருவிழா நாட்களில் உலக நன்மை, உலக சமாதானம், மாணவ மாணவிகள் கல்விமேன்மை, வியாபாரிகள், மீனவர்கள், பனைத்தொழிலாளர்கள், உப்பளத் தொழிலாளர்கள் என அனைத்துத் தரப்பினருக்குமான விசேஷ திருப்பலிகள் மற்றும்  நற்கருணை பவனி நடைபெறும். திருவிழாவின் 10-ம் நாள் விழாவில் நகர வீதிகளில் பனிமய அன்னையின் திருவுருவ தேர்ப்பவனி நடைபெறும். இங்கு கிறிஸ்துவர்களுக்கு அடுத்தபடியாக இந்துக்களும், முஸ்லீம் மக்களும் பிராத்தனைக் கூட்டங்களில் கலந்துகொண்டு, தங்கள் பிராத்தனை நிறைவேற மெழுகுவத்தி ஏந்திஅன்னையை வழிபடுவது  கூடுதல் சிறப்பாகும். இந்நிகழ்ச்சிகள் உள்ளூர் தொலைக்காட்சிகள், சமூக வலைதளங்களில் நேரலை ஒளிபரப்பு செய்யப்பட்டது.

தூத்துக்குடி மாவட்ட காவல் கண்காணிப்பாளர் பாலாஜி சரவணன் தலைமையில் ஆயிரம் போலீசார் பாதுகாப்பு பணியில் ஈடுபட்டு வருகின்றனர்.

கொடியேற்றத்திற்கு வந்த பக்தர்களில் ஒருவரான ரோஸ்லின் கூறுகையில், தூத்துக்குடி பணிமய மாதா 440 ஆவது திருவிழா கொடியேற்றம் வெகு விமர்சியாக நடைபெற்றது.  கடந்த இரண்டு ஆண்டு கொரோனா கட்டுப்பாடுகளால் மக்கள் அனுமதிக்கப்படவில்லை. ஆனால் இன்று பேரலாயத்தில், மக்கள் பக்தியோடு ஏராளமான மக்கள் வந்துள்ளனர்.மேலும், நாட்டு படகு மீனவர்கள், விசைப் படகு மீனவர்கள் தங்களின் நேர்த்திக் கடனை செலுத்தும் வண்ணம் பழம், பால், லட்டு கொடுத்து வருகின்றனர். வருடம் தோறும் மக்கள் கூட்டம் அதிகமாக கூடிக்கொண்டே உள்ளதாகவும் மாதாவின் ஆசி அனைத்து மக்களுக்கும் கிடைக்கும் எனவும் கூறினார்.

ஆயர் ஸ்டீபன் அண்டனி கூறுகையில், இன்றைய நாள் மிகவும் மகிழ்ச்சியான நாள், கொடியேறும் போது மக்கள் அனைவரும் ஒன்று சேர்ந்து மரியே வாழ்க, மரியே வாழ்க என கோஷமிட்டனர். தூத்துக்குடி நகரமே இங்கே தான் உள்ளது. நேற்றைய தினம் நல்ல மழை பெய்தது. மாதாவின் ஆசி அனைவருக்கும் இருப்பதாக கூறிய அவர், கோவில் நிர்வாகிகள் நல்ல முறையில் திட்டம் தீட்டி அதிக பொறுப்புடன் மக்கள் அனைவரும் கொடியேற்றத்தை கண்டு களிக்க ஏற்பாடு செய்தனர். இதற்காக அனைவருக்கும் பாராட்டுகள், நோய், வறுமை நீங்கி மகிழ்ச்சி அனைத்து மக்களும் மகிழ்ச்சியாக இருக்க பணிமய அன்னை துணை இருப்பதாக கூறினார்.

அருகில், சமூக நலத்துறை அமைச்சர் கீதா ஜீவன், மாவட்ட ஆட்சியர் செந்தில்ராஜ், மாவட்ட காவல் கண்காணிப்பாளர் பாலாஜி சரவணன், மாநகராட்சி மேயர் ஜெகன் பெரியசாமி, துணை மேயர் ஜெனிட்டா செல்வராஜ்,   ஆகியோர் உடனிருந்தனர்.

வந்தவாசி அருகே நியாய விலை கடை அமைக்க கோரி கிராம மக்கள் சாலை மறியலில் ஈடுபட்டனர்.

திருவண்ணாமலை மாவட்டம் வந்தவாசி அடுத்த பெலகாம்பூண்டி கிராமத்தில் நியாய விலை அமைக்க கோரி கிராம மக்கள் சாலை மறியலில் ஈடுபட்டதால் ஒரு மணி நேரம் போக்குவரத்து பாதிக்கப்பட்டது. வந்தவாசி அடுத்த பெலகாம்பூண்டி  கிராமத்தில் 200க்கும் மேற்பட்ட குடும்பங்கள் வசித்து வருகின்றனர். அப்பகுதிபில் உள்ள கிராம மக்கள் ரேஷன் பொருட்களை வாங்குவதற்கு 3 கிலோமீட்டர் தொலைவில் உள்ள தேசூருக்கு செல்ல வேண்டிய சூழல் நிலவுகிறது. இதனால் நாள்தோறும் பொதுமக்கள் பெரும் சிரமப்பட்டு வருகின்றனர்.

 பெலகாம்பூண்டி கிராமத்திற்கு தனி நியாய விலை கடை அமைக்க வேண்டும் என்று பலமுறை வட்ட வழங்கல் அலுவலருக்கு மனு அளித்தும் எந்த விதமான நடவடிக்கையும் எடுக்கவில்லை.  இதனால் ஆத்திரமடைந்த நூற்றுக்கும் மேற்பட்ட கிராம மக்கள் தெள்ளார் - தேசூர் சாலையில் சாலை மறியலில் ஈடுபட்டனர். இதனால் அப்பகுதியில் ஒரு மணி நேரம் போக்குவரத்து பாதிக்கப்பட்டது.

 தகவல் அறிந்த தேசூர் போலீசார் சம்பவ இடத்திற்கு சென்று பொது மக்களிடம் பேச்சுவார்த்தை நடத்திய பிறகு சாலை மறியலில் ஈடுபட்ட பொதுமக்கள் சாலை மறியலில் கைவிட்டு கலைந்து சென்றனர். இதனால் அப்பகுதியில் ஒரு மணி நேரம் போக்குவரத்து பாதிக்கப்பட்டது.