அம்பத்தூர் காவல் நிலையம் முன்பு பட்டப்பகலில் மர்ம நபர்களால் இளைஞர் ஒருவர் சரமாரியாக வெட்டிப் படுகொலை செய்யப்பட்ட நிகழ்வு அந்த பகுதியில் பெரும் பரபரப்பை ஏற்படுத்தி உள்ளது.

கஞ்சா விற்பனையில் தகராறு:

அம்பத்தூர் பகுதியை சேர்ந்தவர் கார்த்திக். 19 வயதான கார்த்திக் நண்பர்களுக்கும், இதே பகுதியை சேர்ந்த மற்றொரு கும்பலுக்கும் இடையே கஞ்சா விற்பனை செய்வதில் தகராறு இருந்து வந்ததாக கூறப்படுகிறது.

கொலை செய்ய சதிதிட்டம்:

இரு தரப்பினருக்கும் இடையே தகராறு இருந்து வந்ததையடுத்து, கார்த்திக்கை கொலை செய்ய சதித்திட்டம் தீட்டிய அந்த கும்பல், தொலைபேசியில் தொடர்பு கொண்டு கார்த்திக்கை அழைத்துள்ளது. இதனை நம்பி அவர்கள் அழைத்த இடத்திற்கு வந்த கார்த்திக், எதிர் தரப்பினர் பயங்கர ஆயுதங்கள் வைத்திருப்பதை பார்த்து சுதாரித்துக் கொண்டு, உயிரை காப்பாற்றிக் கொள்வதற்காக அம்பத்தூர் காவல் நிலையம் நோக்கி வேகமாக ஓடியுள்ளார். 

காவல் நிலையம் முன் வெட்டிக்கொலை:

உயிரை காப்பாற்றிக் கொள்ள ஓடிய கார்த்திக் மீது  கொலை வெறியில் இருந்த 4 பேர் கொண்ட அந்த கும்பல், அம்பத்தூர் காவல் நிலையம் உள்ளே செல்ல முயன்ற கார்த்திக்கை தடுத்து நிறுத்தி சரமாரியாக வெட்டி சாய்த்தனர்.  பின்னர் அங்கிருந்து தப்பித்துச் சென்றதாக கூறப்படுகிறது. இந்த தாக்குதலில் ரத்த வெள்ளத்தில் துடிதுடித்த கார்த்திக் சம்பவ இடத்திலேயே பரிதாபமாக உயிரிழந்தார். 

குற்றவாளிகளை தேடும் போலீசார்:

பின்னர் வழக்கம்போல் விரைந்து வந்த காவல்துறையினர், கார்த்திக் உடலை கைப்பற்றி உடற்கூறு ஆய்வுக்காக அரசு மருத்துவமனைக்கு அனுப்பி வைத்ததுடன், படுகொலையில் ஈடுபட்ட மர்ம நபர்களை தேடி வருகின்றனர். 

இந்நிலையில் அனைவருக்கும் பாதுகாப்பு கொடுக்கும் காவல் நிலையம் முன்பு அதுவும், பட்டப்பகலில், மக்கள் நடமாட்டம் அதிகம் உள்ள இடத்தில் அரங்கேறிய இந்த கொடூர கொலை சம்பவம் அந்த பகுதி மக்களிடையே பெரிய அச்சத்தை  ஏற்படுத்தி உள்ளது.

பேருந்து நிலையத்தில் காத்திருந்த மாணவி: கிருஷ்ணகிரி மாவட்டம் ராயக்கோட்டை அருகே கெலமங்கலம் அரசு பாலிடெக்னிக் கல்லூரி மாணவி ஒருவர், கல்லூரிக்கு செல்ல பேருந்து நிலையத்தில் காத்திருந்தார். 

லிஃப்ட் கொடுக்க நினைத்த இளைஞர்: அப்போது இளைஞர் ஒருவர், அந்த மாணவியிடம் வழி கேட்பது போல நடித்து, கல்லூரியில் இறக்கிவிடுவதாக அழைத்துள்ளார். கல்லூரிக்கு செல்ல தாமதமானதால் மாணவியும் அவரோடு சென்றுள்ளார். 

மாணவியை கடத்த முயற்சி: அந்த இளைஞர் கல்லூரியில் இறக்கிவிடாமல் மாணவியை வேறு வழியாக கடத்திச் செல்ல முயல, இதனால் அச்சமடைந்த மாணவி இருசக்கர வாகனத்தில் இருந்து குதித்து தப்பினார். 

போக்சோ சட்டத்தின் கீழ் கைது: பிறகு, இதுகுறித்து தனது பெற்றோர்களுக்கு தகவல் தெரிவித்து கெலமங்கலம் காவல்நிலையத்தில் புகார் அளித்தார். புகாரின் பேரில் அமைக்கப்பட்ட இரண்டு தனிப்படை போலீசார் சிசிடிவி காட்சிகளை ஆய்வு செய்து மாணவியைக் கடத்த முயன்ற கொல்லப்பள்ளி கிராமத்தைச் சேர்ந்த கிருஷ்ணமூர்த்தியை போக்சோ சட்டத்தின் கீழ் கைது செய்தனர்.

ரோந்து சென்ற காவல்துறை: புதுச்சேரி வடக்கு பகுதியில் சந்தேகத்திற்கு இடமாக சிலர் அமர்ந்து மது அருந்திக் கொண்டிருந்ததாக வந்த தகவலை அடுத்து அப்பகுதிக்கு  காவல்துறையினர் ரோந்து சென்றனர். அப்போது அங்கிருந்த 11 பேரில், காவலர்களைக் கண்டதும் 4 பேர் தப்பி ஓடினர். 

இறந்த ரவுடியின் ஆதரவாளர்கள்: மீதம் இருந்த 7 பேரை சுற்றி வளைத்துப் பிடித்த காவலர்கள், அவர்களிடம் விசாரணை நடத்தினர். அதில், 7 பேரும் அண்மையில் வெடிகுண்டு வீசி கொல்லப்பட்ட  பிரபல ரவுடி பன்னீர்செல்வத்தின் ஆதரவாளர்கள் என்பது தெரியவந்தது. 

கொலைக்கு ஸ்கெட்ச் போட்டது அம்பலம்: மேலும், பன்னீர்செல்வத்தைக் கொலை செய்ய உதவிய பிரசாந்த் என்பவரை, தங்கள் நண்பரின் மரணத்திற்காக பழிதீர்க்க அவர்கள் திட்டமிட்டுக் கொண்டிருந்ததும் தெரியவந்தது. 

4 பேருக்கு வலைவீச்சு: இதையடுத்து 7 பேரை கைது செய்த காவல்துறையினர், அவர்களிடமிருந்து 2 நாட்டு வெடிகுண்டுகள் உள்ளிட்ட ஆயுதங்களைப் பறிமுதல் செய்தனர். மேலும் தப்பி ஓடிய 4 பேரை காவல்துறையினர் தேடி வருகின்றனர்.

சுமார் 8 ஆயிரம் கோடி ரூபாய் வரையில் மோசடியில் ஈடுபட்ட ஐ.எஃப்.எஸ். நிறுவன தலைவர் லட்சுமி நாராயணனை பிடிக்க எஸ்.பி. ஜெயச்சந்திரன் தலைமையில் 5 தனி படைகள் அமைக்கப்பட்டுள்ளது. மேலும் லஷ்மி நாராயணன் வெளிநாடு தப்பிச் செல்லாமல் இருக்க லுக் அவுட் நோட்டீஸ் பிறப்பிக்கப்பட்டுள்ளது.

வேலூரை தலைமை இடமாக கொண்டு செயல்படும் IFS என்ற இன்டர்நேஷனல் பைனான்ஸ் சர்விஸ் நிறுவனம் சார்பில், வேலூர், ராணிப்பேட்டை, காஞ்சிபுரம், சென்னை உள்ளிட்ட 10-க்கும் மேற்பட்ட இடங்களில் இதன் கிளை நிறுவனங்கள் செயல்பட்டு வருகின்றன. இங்கு ஒரு லட்சம் ரூபாய்க்கு 8 ஆயிரம் ரூபாய் வட்டி கொடுப்பதாக கவர்ச்சி விளம்பரம் செய்யப்பட்டு, அதன் மூலம் சுமார் 80 ஆயிரம் கோடி ரூபாய் வரை பொதுமக்களிடம் இருந்து முதலீடாக பணம் பெறப்பட்டுள்ளது. 

ஆனால், கடந்த 3 மாதங்களாக வட்டி மற்றும் அசல் தொகையையும் தராமல் இந்த நிறுவனம்  ஏமாற்றியதால், பாதிக்கப்பட்டவர்கள் பொருளாதார குற்றப்பிரிவு அலுவலகங்களில் புகார் அளித்தனர்.  தமிழகம் முழுவதும் சுமார் ஒரு லட்சம் மனுக்கள் பெறப்பட்ட நிலையில், காஞ்சிபுரம் பகுதியில் இயங்கிவரும் ஐஎஃப்எஸ் அலுவலக இயக்குனர் ஜெகநாதன். சென்னையை சேர்ந்த குப்புராஜ் உட்பட 3 இயக்குனர்கள் இதுவரை கைது செய்யப்பட்டுள்ளனர்.

இந்நிலையில், இந்த மோசடிக்கு மூளையாக செயல்பட்ட நிறுவனர் லட்சுமி நாராயணன் என்பவரை பிடிப்பதற்காக, எஸ்.பி,.ஜெயச்சந்திரன் தலைமையில், 5 குழுக்கள் அமைக்கப்பட்டு வேலூர், ராணிப்பேட்டை, கர்நாடகா, கேரளா உள்ளிட்ட பகுதிகளில் தீவிர தேடுதல் வேட்டை நடைபெற்று வருகிறது. 

இதனிடையே, ஐ.எஃப்.எஸ் நிறுவன இயக்குநர் லட்சுமி நாராயணன் வெளிநாடு தப்பி செல்லாமல் இருக்க லுக் அவுட் நோட்டீஸ் வழங்கப்பட்டுள்ளது குறிப்பிடத்தக்கது. 

கடலூர் மாவட்டம், பண்ருட்டி அடுத்த ஒறையூர் கிராமத்தைச் சேர்ந்த ரசிகா (வயது 15 ) என்பவர், பத்தாம் வகுப்பு படித்து வந்தார். இவர் அதே ஊரைச் சேர்ந்த ஆகாஷ் (வயது 19) என்ற பாலிடெக்னிக் மாணவரை காதலித்து வந்ததாக கூறப்படுகிறது. இந்த சம்பவம் மாணவி வீட்டுக்கு தெரிய வந்ததால் மாணவியின் பெற்றோர் கண்டித்துள்ளனர். இந்த நிலையில் கடந்த ஜூன் 14ம் தேதியன்று, மாணவி தூக்கிட்டு தற்கொலை செய்து கொண்டார். 

இதனைத் தொடர்ந்து, காதலன் ஆகாஷ் மனம் உடைந்து காணப்பட்டு வந்த நிலையில், அவரும் தூக்கிட்டு தற்கொலை செய்து கொண்டார். தகவல் அறிந்து புதுப்பேட்டை போலீசார் சம்பவ இடத்துக்கு விரைந்து சென்று, உடலை கைப்பற்றி, உடல்கூறு ஆய்வுக்கு பண்ருட்டி அரசு மருத்துவமனைக்கு அனுப்பி வைத்துள்ளனர். மேலும், மாணவர் உயிரிழந்த சம்பந்தமாக வழக்கு பதிவு செய்து விசாரணை மேற்கொண்டு வருகின்றனர்.