கோவை கவுண்டம்பாளையத்தைச் சேர்ந்த பாஸ்கரன் ஐஸ்வர்யா தம்பதியினருக்கு கடந்த மூன்று மாதங்களுக்கு முன்பு இரட்டைக் குழந்தை பிறந்தது.   ஐஸ்வர்யாவின் தாயார் சாந்தி இவர்களுடன் தங்கி   கடந்த 2 மாதங்களாக குழந்தைகளை கவனித்து வந்ததாக தெரிகிறது.. இந்த நிலையில்  ஐஸ்வர்யா தனது குழந்தைகளுக்கு மருந்து வாங்குவதற்காக அருகில் இருக்கும் கடைக்கு சென்றுவிட்டு வீடு திரும்பிய போது, குழந்தைகளை யாரோ எடுத்து சென்று விட்டதாக சாந்தி கூறியுள்ளார். 

இதனைக் கேட்டு அதிர்ந்து போன ஐஸ்வர்யா உள்ளே சென்று  பார்த்த போது படுக்கை அறையில்  பிறப்புறுப்பு அறுக்கப்பட்டு  ஆண் குழந்தை ரத்த வெள்ளத்தில் கிடந்துள்ளது.  இதனை கண்டு கதறி துடித்த ஐஸ்வர்யா, பெண் குழந்தையை தேடிய போது துணியால் சுற்றப்பட்டு கழிப்பறையில் மயக்க நிலையில் கிடந்தது தெரிய வந்தது. 

இதுகுறித்து தகவலறிந்து வந்த காவல்துறையினர் உயிரிழந்த ஆண் குழந்தையை பிரேத பரிசோதனைக்கு அனுப்பி வைத்தும், மயக்க நிலையில் இருந்த பெண் குழந்தையை மீட்டு சிகிச்சைக்காக மருத்துவமனையில் அனுமதித்தனர்.இந்த சம்பவம் குறித்து துடியலூர் காவல்துறையினர் வழக்குப்பதிவு செய்து நடத்திய முதற்கட்ட விசாரணையில் சாந்தி 15 ஆண்டுகளுக்கும் மேலாக மனநலம் பாதிக்கப்பட்டு இருப்பதாக தெரியவந்தது.எனினும் குழந்தைகளை ஈவு இரக்கமின்றி கொன்றுவிட்டு தலைமறைவான  சாந்தியை  காவல்துறையினர் தீவிரமாக வலைவீசி தேடி வருகின்றனர்.

திருவண்ணாமலை மாவட்டம் ஆரணி அருகே உள்ள விளைசித்தேரி கிராமத்தை சேர்ந்த வெள்ளை என்பவரின் மகன்கள்  ரமேஷ், புருஷோத்தமன், ராஜசேகர். இதில், ரமேஷ், ராஜசேகர் சென்னையில் வேலை செய்து வரும் நிலையில், புருஷோத்தமன் அரணியிலேயே நெசவு தொழில் செய்து வந்தார். இந்நிலையில், புருஷோத்தமனுக்கும், ராஜசேகருக்கு குடும்ப சொத்தை பிரிப்பதில் தகராறு இருந்து வந்ததாக கூறப்படுகிறது.

வழக்கம் போல் புதன்கிழமை இருவருக்கும் இடையே  வாக்குவாதம்  ஏற்பட்ட நிலையில் ஆத்திரமடைந்த தம்பி, மாடியில் தூங்கிக்கொண்டிருந்த அண்ணன் புருஷோத்தமன் மீது பெட்ரோல் ஊற்றி தீ வைத்ததாக கூறப்படுகிறது. இதில் அலறி துடித்த புருஷோத்தமன் தீயில்  எரிந்தபடி  மாடியில் இருந்து  கீழே குதித்ததாக தெரிகிறது.. இதனைக் கண்டு அதிர்ச்சியடைந்த அக்கம்பக்கத்தினர், உடனடியாக அவரை மீட்டு மருத்துவமனையில் அனுமதித்த நிலையில், இன்று காலை புருஷோத்தமன் சிகிச்சை பலனின்றி உயிரிழந்தார். இச்சம்பவம் குறித்து வழக்குப்பதிவு செய்த ஆரணி காவல்துறையினர் அண்ணனை கொடூரமாக கொலை செய்த தம்பி ராஜசேகரை கைது செய்து போளூர் சிறையில் அடைத்தனர்.

காஞ்சிரங்கால் ஊராட்சி ஒன்றிய நடுநிலைப்பள்ளியில் 2ம் வகுப்பு படித்த மாணவிக்கு பாலியல் தொல்லை கொடுத்ததாக கடந்த 2015ம் ஆண்டு அப்பள்ளி ஆசிரியர் ரங்கராஜன் மீது போக்சோ வழக்கு பதியப்பட்டது. அவர் மீதான வழக்கினை விசாரித்து வந்த போக்சோ சிறப்பு நீதிமன்றம்,  குற்றம் நிரூபிக்கப்பட்ட ரங்கராஜனுக்கு 10 ஆண்டு கடுங்காவல் தண்டனை, 10 ஆயிரம் ரூபாய் அபராதம் மற்றும் பாதிக்கப்பட்ட சிறுமிக்கு 6 லட்சம் ரூபாயை அரசு இழப்பீடாக வழங்க கூறி தீர்ப்பளித்துள்ளது.

இதேபோல் கடந்த 2017ம் ஆண்டு, பிரான்மலை மேல்நிலைப்பள்ளியில் 7ம் வகுப்பு படித்து வந்த மாணவிக்கு பாலியல் தொல்லை கொடுத்ததாக அப்பள்ளி ஆசிரியர் சரவணன் மீது வழக்கு பதியப்பட்டது.  இதுகுறித்து விசாரணை நடத்திய சிவகங்கையில் உள்ள சிறப்பு நீதிமன்றம்,  சரவணனுக்கு 5 ஆண்டு கடுங்காவல், 5 ஆயிரம் ரூபாய் அபராதம் விதித்து தீர்ப்பளித்துள்ளது. மேலும் பாதிக்கப்பட்ட சிறுமிக்கு அரசு 2 லட்சம் ரூபாயை நிவாரண தொகையாக வழங்கவும் உத்தரவிட்டார். 

பாணவரம் அடுத்த தப்பூர் ஒடைக்கால்வாய்  கரையில் கேட்பாரற்று மூடிய நிலையில் கிடந்த சூட்கேஸை அந்த வழியாக சென்ற மீனவர்கள் திறந்து பார்த்துள்ளனர். அதில் பிறந்து சில தினங்களேயான குழந்தை துணிகளுக்கு இடையே கிடத்தப்பட்டிருந்தது.

இதுகுறித்து உடனடியாக கிராம நிர்வாக அலுவலருக்கு தகவல் தெரிவிக்கப்பட்டது. அதன்பேரில் அங்கு விரைந்த வி.ஏ.  ஓ சுமன், குழந்தையை மீட்டு அங்குள்ள ஆரம்ப சுகாதார மையத்தில் முதலுதவி சிகிச்சைக்காக சேர்த்தார்.

அதைத்தொடர்ந்து குழந்தையின் கை மற்றும் கால் ரேகைகள் பதிவு செய்யப்பட்டு, குழந்தை மாவட்ட சைல்டு ஹல்ப்லைன் குழுவினரிடம் ஒப்படைக்கப்பட்டது. சம்பவம் தொடர்பாக வழக்கு பதிந்து, குழந்தை யாருடையது என போலீசார் விசாரணையை துவக்கியுள்ளனர்.

மறைந்த முதலமைச்சர் ஜெயலலிதாவின் கார் ஓட்டுனர் கனகராஜ் கடந்த 2017 ஆம் ஆண்டு ஆத்தூர் அருகே தேசிய நெடுஞ்சாலையில் இரு சக்கர வாகனத்தில் சென்ற போது கார் மோதி உயிரிழந்தார். இதுதொடர்பாக கனகராஜின் அண்ணன் தனபால் கொடுத்த புகாரின் அடிப்படையில் ஆத்தூர் காவல்நிலையத்தில்  வழக்குப்பதிவு செய்யப்பட்டது. 

ஆத்தூர் குற்றவியல் நடுவர் நீதிமன்றம் எண் 1 ல் வழக்கு விசாரணை நடைபெற்றது. கோடநாடு கொலை கொள்ளை சம்பவத்தை தொடர்ந்து கனகராஜ் மரணம், சயான் கார் விபத்து என சம்பவங்கள் நிகழ்ந்த காரணத்தால் கனகராஜ் மரணம் விபத்து கிடையாது என்றும், கொலை என்று சகோதரர் தனபால் புகார் தெரிவித்தார்.   

இந்த நிலையில் தற்போது நீதிமன்ற அனுமதி பெற்று கனகராஜ் மரணம் தொடர்பான வழக்கு விசாரணையை சேலம் காவல்துறையினர் மீண்டும் தொடங்கியுள்ளனர். எடப்பாடியில் வசித்து வரும் கனகராஜின் அண்ணன் தனபாலை இன்று காலை சேலம் மாவட்ட காவல்துறையினர் விசாரணைக்காக அழைத்துச் சென்றனர்.

இதனிடையே, ஆத்தூரில் உள்ள கனகராஜின் உறவினர் ரமேஷ் மற்றும் அவரது மனைவி சித்ரா ஆகியோரிடம் சேலம் டிஐஜி மகேஸ்வரி நேரில் விசாரணை நடத்தினார்.