சென்னை கோயம்பேடு பகுதியில் நேற்று இரவு போக்குவரத்து காவல்துறையினர் வாகன சோதனையில் ஈடுபட்டு வந்தார்கள். அப்பொழுது காளியம்மன் கோவில் தெருவாக வந்த நபர் ஒருவர் போலீசாரை பார்த்ததும் இருசக்கர வாகனத்தை நிறுத்திவிட்டு தப்பி ஓடியுள்ளார்.

உடனடியாக போக்குவரத்து போலீசார் இரு சக்கர வாகனத்தை சோதனை செய்தார்கள் சோதனையில் இருசக்கர வாகனத்தில் கஞ்சா இருப்பதை இதை கண்டு அதிர்ச்சி அடைந்தார்கள். இது குறித்து உடனடியாக கோயம்பேடு போலீசாருக்கு தகவல் தெரிவிக்கப்பட்டது. 

அதன் பிறகு அருகில் உள்ள டாஸ்மாக் கடையில் இருந்து வந்த ஒரு வாலிபர் போலீசாரை பார்த்ததும் ஓட முயற்சித்தபோது, அங்கு நின்றிருந்த போலீசார் வாகனத்தை விட்டுவிட்டு ஓடிய நபர் இவர் தான் என சத்தமிட, அங்கிருந்த காவலர்கள் ஓட முயற்சித்த நபரை மடக்கி பிடித்தனர்.

மேலும் அவரிடம் விசாரணை செய்ததில்,  வடபழநி பகுதியை சேர்ந்த இளங்கோ என்பதும் தினமும் வில்லிவாக்கம் சத்யா நகர் ரயில்வே பகுதியிலிருந்து கஞ்சா வாங்கிக் கொண்டு இரு சக்கர வாகனத்தில் கோயம்பேடு, நெற்குன்றம், வடபழனி, ஆகிய பகுதிகளில் தனக்கு வேண்டப்பட்ட நபர்களிடம் மட்டும் கஞ்சா விற்று வந்தது தெரியவந்தது.மேலும் இதுதொடர்பாக போலீசார் வழக்குப்பதிவு செய்து விசாரணை நடத்தி வருகின்றனர்.

திண்டுக்கல் மாவட்டம் வேடசந்தூர் அருகே உள்ள குன்னம் பட்டியை சேர்ந்தவர் மீனம்மாள். இவர் அப்பகுதியில் கூலிவேலை செய்து வருகிறார். நேற்று மாலை கொரோனா தடுப்பூசி போட்டுக் கொள்வதற்காக குன்னம் பட்டியிலிருந்து வேடசந்தூர் செல்லும் சாலைக்கு நடந்து வந்துள்ளார். அங்கிருந்த பேருந்து நிறுத்தத்தில் பேருந்திற்காக காத்திருந்தார். அப்போது அந்த வழியாக இருசக்கர வாகனத்தில் கணவனும், மனைவியும் தம்பதியர்களாக வந்துள்ளனர். பேருந்து நிறுத்தத்தில் ஒரு மூதாட்டி காதில் அரை பவுன் தோடு மற்றும் தங்கத்தால் செய்யப்பட்ட மூக்குத்தி அணிந்திருந்ததை கண்டுள்ளனர்.

இதைக்கண்ட திருட்டு தம்பதியினர் அந்த மூதாட்டியிடம் லாவகமாக பேச்சு கொடுத்துள்ளனர். இதனை அறியாத அந்த மூதாட்டி நான் கொரோனா தடுப்பூசி போட செல்வதாக கூறியுள்ளார். உடனே அந்த தம்பதியினர், நாங்களும் அதற்காக தான் செல்கிறோம், எங்களுடன் வாருங்கள் என்று அவர்களது இருசக்கர வாகனத்தில் அழைத்துக் கொண்டு, வேடசந்தூரில் இருந்து 4 கிலோமீட்டர் தொலைவிலுள்ள தனியார் நூற்பாலை அருகே சென்றுள்ளனர்.

அங்கு ஒரு டீக்கடையில் அந்த மூதாட்டிக்கு டீ மற்றும் பன் வாங்கி கொடுத்துள்ளனர்.  பன்னில் மயக்க மருந்து கலந்து அந்த மூதாட்டிக்கு கொடுத்துள்ளனர். அதனை அறியாத மூதாட்டி பன்னை சாப்பிட்டுள்ளார். மயக்க மருந்து கலந்த பன்னை சாப்பிட்ட மூதாட்டி சிறிது நேரத்தில் மயக்கம் அடைந்துள்ளார்.

பின்பு மூதாட்டி அணிந்திருந்த அரை பவுன் தங்க கம்மலையும், கால் பவுன் தங்க மூக்குத்தியையும் அபகரித்துக் கொண்டு தப்பியுள்ளனர். அப்போது அவ்வழியாக சென்றவர்கள், சாலையோரத்தில் மயங்கிக் கிடந்த மூதாட்டியை வேடசந்தூர் அரசு மருத்துவமனைக்கு கொண்டு வந்து சேர்த்தனர். பின்பு அங்கு அவருக்கு தீவிர சிகிச்சை அளிக்கப்பட்டு வருகிறது.  மூதாட்டியிடமிருந்து நகையை பறித்து கொண்டு சென்றது யார் என்பது குறித்து, அப்பகுதியில் உள்ள சிசிடிவி காட்சிகளை கொண்டு வேடசந்தூர் காவல்துறையினர் தீவிர விசாரணையில் ஈடுபட்டு வருகின்றனர்.

பட்டப்பகலில் நடந்த இச்சம்பவம் அப்பகுதியில் பரபரப்பை ஏற்படுத்தியுள்ளது.

திருவனந்தபுரத்தில் செவிலியராக பணி புரிந்து வந்த 31வயதான இளம்பெண் மேக்கோடு பகுதியை சேர்ந்த இளைஞர் ஒருவர் தன்னை திருமணம் செய்துகொள்வதாக கூறி காதலித்து பணத்தை பறித்துள்ளதாக பளுகல் காவல்நிலையத்தில் புகார் அளிக்க சென்றுள்ளார். அப்போழுது  பணியில் இருந்த உதவி ஆய்வாளர் சுந்தரலிங்கம் புகாரை பெற்று கொண்டு நர்ஸிடம் நடந்த விவரங்கள் எல்லாம் கேட்டறிந்துள்ளார். அப்போதுதான், இளம்பெண் தனியாக வசித்து வருவதை அறிந்து கொண்ட உதவி ஆய்வாளர் சுந்தரலிங்கம் தான் குடியிருக்கும் பகுதியில் ஒரு வீட்டை வாடகைக்கு ஏற்பாடு செய்து தந்து செவிலியரை குடியமர்த்தியுள்ளார். 

 இதனையடுத்து பிறகு ஆறுதல் சொல்வது போல அடிக்கடி அந்த வீட்டுக்கு சென்றவர், நாளடைவில் நர்ஸை பலாத்காரமும் செய்துவிட்டதாக கூறப்படுகிறது. இதில் நர்ஸ் கர்ப்பமாகிய இதை சுந்தரலிங்கத்திடம் சொல்லி உள்ளார். ஆனால் சுந்தரலிங்கமோ அவரை அபார்ஷன் செய்துவிடும்படி சொல்லவும் அதற்கு நர்ஸ் மறுக்கவும் கட்டாயப்படுத்தி குலசேகரம் அருகே தனியார் ஆஸ்பத்திரிக்கு அழைத்துச் சென்று அபார்ஷன் செய்ய வைத்துள்ளார். 

இந்த நிலையில் தனக்கு நடந்த கொடுமை பற்றி அந்த செவிலியர் பலமுறை போலீசில் புகார் தந்துள்ளார். ஆனால் உரிய நடவடிக்கை எடுக்காததால், ஒருமுறை ஆட்சியர் அலுவலகத்திற்கு சென்று  புகார் தந்ததுடன், உள்ளிருப்பு போராட்டத்திலும் ஈடுபட்டார். மேலும் அந்த செவிலியர் ஜோஸ்பினுக்கு ஆதரவாக மாதர் சங்கத்தினரும் இறங்கி போராட்டங்களும் நடத்தினர். ஆனாலும் நடவடிக்கை எடுக்கப்படவில்லை என கூறப்படுகிறது ஒருகட்டத்தில் பொறுமை இழந்த செவிலியர் அளவுக்கு அதிகமாக தூக்க மாத்திரைகளை சாப்பிட்டு மயங்கி விழுந்துள்ளார். 

இதற்கு பிறகு மாதர் சங்கத்தினர்தான் விரைந்து சென்று மருத்துவமனையில் அனுமதித்து காப்பாற்றியுள்ளனர். இதனையடுத்து இந்த வழக்கு நீதிமன்றத்திற்கு சென்றது. அதில் அந்த செவிலியர் தாக்கல் செய்துள்ள மனுவில் எனக்கு திருமணமாகி ஏற்கனவே விவாகரத்து ஆகி உள்ளது. 9 வயதில் ஒரு மகள் உள்ளதாகவும் அவர் தங்கி படிப்பதாக குறிப்பிட்டுள்ளார்.

இந்த நிலையில் என்னை திருமணம் செய்து கொள்வதாக கூறி,எனது உடமைகளை பறித்து அஜிஸ் என்பவர் ஏமாற்றி விட்டார். இது தொடர்பாக நான் புகார் அளிப்பதற்காக பளுகல் காவல் நிலையத்துக்கு சென்றேன். அப்போது அங்கு சப் இன்ஸ்பெக்டராக இருந்த சுந்தரலிங்கம் பிரச்னையை தீர்த்து வைப்பதாக கூறி வீட்டுக்கு வந்து என்னை பலாத்காரம் செய்தார். இதில் நான் கர்ப்பம் அடைந்தேன். வலுக்கட்டாயமாக அழைத்து சென்று கருவை கலைத்தார். இந்த பிரச்னை தொடர்பாக காவல் நிலையத்தில் புகார் அளித்தும் நடவடிக்கையும் இல்லை. என்னை பலாத்காரம் செய்த எஸ்.ஐ. மற்றும் அவருக்கு துணை நின்று எனது கருவை சட்ட விரோதமாக கலைத்ததுடன், உயிருக்கு ஆபத்து ஏற்படும் வகையில் மிரட்டல் விடுத்தவர்கள் மீது உரிய நடவடிக்கை எடுக்க வேண்டும் என அந்த மனுவில் குறிப்பிட்டுள்ளார்.

இந்த புகார் மனுவின் அடிப்படையில் மார்த்தாண்டம் அனைத்து மகளிர் போலீசார் வழக்கு பதிவு செய்து விசாரணை நடத்த வேண்டும் என நீதிமன்றம் உத்தரவிட்டது. இதனிடையே, பாதிக்கப்பட்ட பெண் அனைத்து மகளிர் காவல் நிலையம் சென்று நேற்று முன்தினம் போராட்டமும் நடத்தியதை தொடர்ந்து வழக்கு பதிவு செய்யப்பட்டுள்ளது.

இந்த நிலையில்  எஸ்.ஐ. சுந்தரலிங்கம், பளுகல் காவல் நிலையத்தில் ஏட்டாக இருந்த கணேஷ்குமார், தச்சன்விளாகத்தை சேர்ந்த விஜின், அபிஷேக் , மூவோட்டுக்கோணம் உமேஷ் 45, தனியார் கிளினிக் டாக்டர் கார்மல் ராணி, மருத்துவமனை நிர்வாக இயக்குனர் தேவராஜ், அனில்குமார் ஆகிய 8 பேர் மீது இந்திய தண்டனை சட்டப்பிரிவு 323, 354 (ஏ),376, 313 ஆகிய பிரிவுகளின் கீழ் வழக்கு பதிவு செய்துள்ளனர். மேலும் இவ்வளவு குற்றச்சாட்டுக்கும் காரணமான உதவி ஆய்வாளராக இருந்த  சுந்தரலிங்கம், தற்போது பதவி உயர்வு பெற்று ஆய்வாளராக தேனி மாவட்டத்தில் பணியாற்றி வருவது குறிப்பிடதக்கது.

நாகப்பட்டினம்  மாவட்டம் முழுவதும் கஞ்சா, குட்கா உள்ளிட்ட போதைப் பொருட்கள்  கடத்தலை தடுக்க மாவட்ட காவல் கண்காணிப்பாளர் ஜவகர்  தீவிர வாகன சோதனைக்கு உத்தரவிட்டார். இந்த நிலையில் நாகையை அடுத்த பாப்பாகோவில் ஏறுஞ்சாலை பகுதியில் நாகப்பட்டினம் நகர காவல் ஆய்வாளர் பெரியசாமி தலைமையிலான போலீசார் தீவிர வாகன சோதனையில் ஈடுபட்டிருந்தனர். அப்போது  மூன்று பேர் இருசக்கர வாகனத்தில் ஒரு மூட்டையுடன் வந்துள்ளனர். அவர்களை மடக்கி பிடித்த போலீசார் அவர்கள் கொண்டுவந்த மூட்டையை சோதனையிட்டனர்.

மூட்டையில் 21 கிலோ கஞ்சா இருப்பது கண்டு போலீசார் அதிர்ச்சி அடைந்தனர்.  இதனையடுத்து மூவரிடம் விசாரணை மேற்கொண்டதில் வேதாரண்யத்தை அடுத்த நாலுவேதபதி சேர்ந்த ரெங்கநாதன்,  கருப்பம்புலம் பகுதியை சேர்ந்த ராஜேந்திரன் மற்றும் தோப்புத்துறை சேர்ந்த ஹலித் என்பது தெரியவந்தது.

இவர்கள் வேதாரண்யத்தில் இருந்து நாகையில் கஞ்சாவை விற்பனைக்கு கொண்டு வந்ததும் தெரியவந்துள்ளது. இதனையடுத்து 3 பேரையும் கைது செய்த போலீசார் அவர்களிடமிருந்த கஞ்சாவையும், கடத்தலுக்கு பயன்படுத்திய இரு சக்கர வாகனத்தையும் பறிமுதல் செய்து நீதிமன்றத்தில் ஆஜர்படுத்தி சிறையில் அடைத்தனர்.

பரபரப்பு மிகுந்த தஞ்சாவூர் அரசு மருத்துவக் கல்லூரி மருத்துவமனைக்கு தினந்தோறும் ஏராளமான நோயாளிகள் வந்து செல்கின்றனர். நோயாளிகள், வெளிநபர்கள் பயன்படுத்தும் கழிவறைகளில் ஒன்றினை கடந்த சனிக்கிழமை தூய்மை பணியாளர் சுத்தம் செய்துள்ளார். அப்போது அங்கு அழுகிய நிலையில் பெண் சிசுவின் சடலம் கிடந்துள்ளது. இதனை கண்டு அதிர்ந்த அவர்,  மருத்துவ நிர்வாகத்திற்கு தகவல் தெரிவித்தார். 

தகவலறிந்து வந்த போலீசார், சடலத்தை உடற்கூராய்வுக்கு அனுப்பி வைத்து விசாரணையை முடுக்கி விட்டனர். மேலும், தீவிர சிகிச்சைப் பிரிவில் உள்ள சிசிடிவி கேமராவில் பதிவான காட்சிகளையும் ஆய்வு செய்தனர்.  இந்நிலையில், பெண் சிசுவை கொலை செய்தது பூதலூரை சேர்ந்த பிரியதர்சினி என தற்போது தெரிய வந்துள்ளது. 

தகாத உறவால் கருவுற்ற அவர் மருத்துவமனைக்கு வந்தபோது, பிரசவ வலி ஏற்பட்டுள்ளது. இதையடுத்து கழிவறையிலேயே குழந்தையை பெற்றெடுத்த அவர்,  சிசுவை கொன்று  அங்கு போட்டுவிட்டு சென்றுள்ளார். சிசிடிவி காட்சி மூலம் இதனை உறுதி செய்த போலீசார், அவரை கைது செய்து விசாரித்து வருகின்றனர்.