தென்காசி: தென்காசியில், ஒரு வீட்டின் கழிவுநீர் தேக்கத்தொட்டியில், இளைஞரின் எலும்பு கூடு கண்டெடுக்கப்பட்டுள்ளது.

தென்காசி மாவட்டம், இலத்தூர் கிராமத்தை சேர்ந்தவர் கல்லூரி மாணவர் மாடசாமி என்கிற மது. இவர் கடந்த 7 மாதங்களுக்கு முன்பு காணாமல் போனதாக கூறப்படுகிறது. அது தொடர்பான வழக்கு இலத்தூர் காவல் நிலையத்தில் நிலுவையில் உள்ளது.

இந்நிலையில், கடந்த ஞாயிற்று கிழமையில், அதே பகுதியை சேர்ந்த நாராயணன் என்பவரது வீட்டின் கழிவுநீர் தேக்கத்தொட்டியில் எலும்பு கூடு ஒன்று கண்டெடுக்கப்பட்டதும், தகவலிருந்த காவல்துறையினர், சம்பவ இடத்திற்கு சென்று ஆய்வு செய்தனர். அதன் பிறகு  நடத்திய டிஎன்ஏ சோதனையில், அது 7 மாதங்கள் முன்பு காணாமல் போன மது உடல் என்பது தெரிய வந்தது.

மது காணாமல் போன நாள் முதல், வேறு யாரும் அப்பகுதியை விட்டு வெளியேறினார்களா என போலீசார் விசாரித்த நிலையில், அங்கு வசித்த 3 பேர் குடும்பத்துடன் கோவைக்கு வேலைக்கு சென்றது தெரிய வந்தது.  ஒரு வேளை இவர்களுக்கும் மதுவின் கொலைக்கும் சம்பந்தம் இருக்கலாம் என சந்தேகப்பட்ட போலீசார் அவர்களிடம் விசாரணையை தொடங்கினர். 

மாரியம்மாள், பேச்சியம்மாள் மற்றும் அவரது சகோதரர் உள்ளிட்ட மூவரிடமும் விசாரணை செய்ததில் பல திடுக்கிடும் செய்திகள் வெளியாகியது. கல்லூரி மாணவரான  மதுவுக்கும், அவரது வீட்டின் எதிரே உள்ள திருமணமான பேச்சியம்மாள் என்வருக்கும் இடையே காதல் மலர்ந்த நிலையில், இருவரும் அவ்வப்போது தனிமையில் இருந்ததாக கூறப்படுகிறது. அதனை  மது தனது செல்போனில் வீடியோவாக எடுத்து வைத்து கொண்டு பேச்சியம்மாளை மிரட்டியுள்ளதும் தெரியவந்துள்ளது.

ஒரு கட்டத்தில், மதுவின் தொந்தரவு அதிகரித்த நிலையில், பேச்சியம்மாள் தனது வாழ்கை பாழாகிவிடுமோ என எண்ணி, தனது தயார் மரியம்மாளிடம் கூறியுள்ளார்.பின்னர், இருவரும் சேர்ந்து மதுவை வீட்டிற்கு வர வைத்து, கைகளை கட்டி, முகத்தில் தலையணையை வைத்து அழுத்தி கொலை செய்துள்ளனர். பின்னர் பேச்சியம்மாள், தனது தாயார் மாரியம்மாள் மற்றும் அவரது சகோதரர் மூவரும் சேர்ந்து, மதுவின் சடலத்தை, கழிவுநீர் தேக்கத்தொட்டியில் போட்டுவிட்டு, கோவைக்கு தப்பியது தெரிய வந்துள்ளது. 

விசாரணைக்குப் பின்னர், மூவரையும் கைது செய்த போலீசார், செங்கோட்டை குற்றவியல் நீதிமன்றத்தில் ஆஜர் செய்து சிறையில் அடைத்தனர்.

செங்கல்பட்டு: பல்லாவரம் பகுதியில் ஹெராயின் போதை பொருள் விற்பனை செய்து வந்த ஒரு சிறுவன் உட்பட ஐந்து பேரை கைது செய்து சிறையில் அடைத்த காவல் துறையினர் 

சென்னை பல்லாவரம் அடுத்த பம்மல், நாகல்கேணியில் தங்கி வேலை செய்யும்,வட மாநில தொழிலாளர்கள் ஹெராயின் போதை பொருள் விற்பனை செய்வதாக, சங்கர் நகர் போலீசாருக்கு ரகசிய தகவல் கிடைத்தது.

இதையடுத்து, சங்கர் நகர் போலீசார் பம்மல், நாகல் கேணியில் தங்கி,கட்டிட வேலை செய்து வந்த மேற்கு வங்கத்தை சேர்ந்த ஆஸ்மத் (24) என்பவரை பிடித்து விசாரித்தனர். அப்போது, அவரிடம் ஒரு கிராம் ஹெராயின் இருந்தது தெரியவந்தது. மேலும் அவரிடம் விசாரணை நடத்தப்பட்டதில், சில தகவல்கள் பெறப்பட்டது. 

அதில், அதேபகுதியில் தங்கி கட்டட வேலை செய்து வந்த மேற்கு வங்கத்தை சேர்ந்த டோபி உசைன் (23), மனா (26), ரஸ்துல் இஸ்லாம் (29) மற்றும் 17 வயது சிறுவன் என நான்கு பேர் போதை பொருள் விற்பதாக தெரியவந்தது.  மேலும், விசாரணை மேற்கொண்டதில், டோபி உசைன் மற்றும் சிறுவன் இருவரும், கொல்கத்தாவில் இருந்து மாதம் ஒரு முறை, 50 கிராம் ஹெராயின் போதை பொருளை 40ஆயிரம் ரூபாய்க்கு வாங்கி வந்து 1 லட்சம் ரூபாய் வரை விற்றுவந்தது தெரியவந்துள்ளது.

நான்கு  பேரையும் கைது செய்து விசாரித்ததில், அவர்களிடம் 48 கிராம் ஹெராயின் இருப்பதும் தெரியவந்தது. அவற்றை பறிமுதல் செய்த போலீசார், சிறுவன் உட்பட 5 போரையும் கைது செய்து, நீதிமன்றத்தில் ஆஜர்படுத்தி, சிறையில் அடைத்தனர். 

கரூர்: குளித்தலையில் தென்னந்தோப்பு ஒன்றில் விவசாயி தீயில் எறிந்த நிலையில் சடலமாக மீட்பு.

கரூர் மாவட்டம் குளித்தலை அடுத்த மாயனூர் அருகே ராசாக்கவுண்டனுர் பகுதியையே சேர்ந்தவர்கள் கருப்பண்ணன் (72) மற்றும் காத்தவராயன் (68). அண்ணன் தம்பியான இவர்களுக்குள், நிலம் சம்பந்தமாகவும், பொதுக்கிணற்றில் இருந்து நீர் பாய்ச்சுவது தொடர்பாகவும் அடிக்கடி பிரச்சனைகள் ஏற்பட்டு வந்துள்ளதாக கூறப்படுகிறது. இது தொடர்பாக ஒரு ஆண்டுக்கு முன்னரே வழக்கு பதியப்பட்டு விசாரணை நடத்தப்பட்டதாக தெரிகிறது. 

இந்நிலையில், இன்று காலை தோட்டத்திற்கு தண்ணீர் பாய்ச்ச சென்று வருவதாக கூறிவிட்டு, கருப்பண்ணன் தோட்டத்திற்கு சென்றுள்ளார். நீண்ட நேரமாகியும் அவர் வீடு திரும்பாததால், குடும்பத்தினர் தோட்டத்திற்கு சென்று பார்த்துள்ளனர். அங்கு, கருப்பண்ணன் கால் கட்டப்பட்டு தீயில் எரிந்து இறந்து சடலமாக கிடந்துள்ளார்.  

சம்பவமறிந்து, சம்பவ இடத்திற்கு வந்த மாயனூர் காவல்துறையினர், விசாரணையை தொடங்கினர். இதுகுறித்து, கருப்பண்ணனின் குடும்பத்தினர், இச்செயலை செய்தது தம்பி காத்தவராயனாக தான் இருக்க கூடும் என்று குற்றம் சாட்டியுள்ளனர். 

கருப்பண்ணன் கால்கள் கட்டப்பட்டு,  எண்ணெய் ஊற்றி எரிக்கப்பட்டிருப்பது முதற்கட்ட விசாரணையில் தெரியவந்துள்ளது. பின்னர், சம்பவ இடத்திற்கு மோப்பநாய் மற்றும் தடவியல் நிபுணர்கள் வரவழைக்கப்பட்டனர்.  தடவியல் பரிசோதனைகள் முடிந்த பின், கருப்பண்ணனின் உடல் கரூர் அரசு மருத்துவமனைக்கு, பிரேத பரிசோதனைக்காக அனுப்பப்பட்டது. 

இச்சம்பவம் தொடர்பாக, மாயனூர் காவல்துறையினர், வழக்கு பதிவு செய்து விசாரணை செய்து வருகின்றனர். 

மும்பை: மகாராஷ்டிராவின், மும்பையில் லிவ்-இன்-பார்ட்னரை கொலைசெய்து துண்டு துண்டாக்கி வேகவைத்து தூக்கி வீசப்பட்ட கொடூரம் அரங்கேறியுள்ளது. 

மும்பையில் உள்ள மீரா சாலை பகுதியில் உள்ள ஆகாஷ்கங்கா என்னும் கட்டடத்தில், வாடகை வீட்டில், 56 வயதான மனோஜ் என்பவரும் 32 வயதான சரஸ்வதி என்பவரும் திருமணம் பண்ணிக்கொள்ளாமல், லிவ்-இன் முறையில் வாழ்ந்து வந்துள்ளனர். 

இவர்கள் குடியிருக்கும் பகுதியில் இருந்து சந்தேகிக்கும் வகையில் துர்நாற்றம் வீசுவதாக அக்கம்பக்கத்தில் குடியிருக்கும் மக்கள், நாயாநகர் காவல் நிலையத்திற்கு தகவல் தெரிவித்துள்ளனர். இதை தொடர்ந்து சம்பவ இடத்திற்கு சென்று பார்வையிட்ட போலீசாருக்கு பெரும் அதிர்ச்சி காத்திருந்தது.   

விசாரனையில், மனோஜ், சரஸ்வதியை கொடூரமாக கொலை செய்து, மரம் வெட்ட பயன்படும், இயந்திரத்தால் சரஸ்வதியின் உடலை துண்டுத் துண்டாக வெட்டி, வெட்டிய உடற்பாகங்களை குக்கரில் வேக வைத்து, பிளாஸ்டிக் பைகளில் கட்டி வீசியுள்ளது தெரியவந்துள்ளது.

13 உடற்பாகங்கள் கண்டறியப்பட்டுள்ள நிலையில், தப்பியோடிய மனோஜின் மேல்  வழக்கு பதிவு செய்து, அவரைத் தேடும் பணியில் காவல்துறையினர் தீவிரமாக ஈடுபட்டுள்ளனர். 

சென்னை மாநகராட்சியில்  நடைபெற்ற டெண்டர் முறைகேடு புகார் தொடர்பாக முன்னாள் அமைச்சர் வேலுமணி உள்ளிட்டோர் மீது சட்டப்படி  நடவடிக்கை எடுக்க எந்த தடையும் இல்லை என சென்னை உயர்நீதிமன்றம் உத்தரவிட்டுள்ளது.

கடந்த 2020ம் ஆண்டு  அதிமுக ஆட்சியின்போது அறப்போர் இயக்கம் சென்னை உயர்நீதிமன்றத்தில் வழக்கு ஒன்றை தொடர்ந்திருந்தது. அதில், சென்னை மாநகராட்சி பகுதிகளில், கடந்த 2018 மற்றும் 2019 ம் ஆண்டுகளில் சாலை மறு சீரமைப்பு, மழை நீர் வடிகால் கட்டமைப்புகளுக்கான 37 டெண்டர் ஒதுக்கீடு நடைபெற்றதாகவும், சுமார் 300 கோடி மதிப்பில் 3800 சாலைகள் மறு சீ்ரமைப்பு மற்றும் 290 கோடி மதிப்பிலான மழைநீர் வடிகால் பணிகளுக்கான இந்த டெண்டரில், பல்வேறு முறைகேடுகள் நடைபெற்றதாக தெரிவித்திருந்தது.
  
ஒரே ஐபி முகவரியிலிருந்து குறிப்பிட்ட சிலருக்கு மட்டுமே இந்த டெண்டர்கள் ஒதுக்கீடு செய்வது  செய்யப்பட்டதாகவும், இந்த முறைகேட்டில் அப்போதைய உள்ளாட்சி துறை அமைச்சர் வேலுமணி , அப்போதைய மாநகராட்சி ஆணையர் கார்த்திகேயன் மற்றும் மாநகராட்சி அதிகாரிகள், ஒப்பந்ததாரர்கள் ஈடுபட்டதாகவும் குறிப்பிட்டிருந்தது. இந்த முறைகேட்டின் மூலம் கோடிக்கணக்கான ரூபாய் பொதுமக்களின் பணம் சுரண்டப்பட்டுள்ளதாகவும், இதுகுறித்து லஞ்ச ஒழிப்பு துறையிடம் புகார் அளித்தும் எந்த நடவடிக்கையும் எடுக்கப்படவில்லை என்று தெரிவித்திருந்தது. மேலும், இந்த முறைகேடுகள் குறித்து உரிய ஆரம்பகட்ட விசாரணை நடத்த உத்தரவிட வேண்டும் எனவும் கேட்டுக்கொண்டிருந்தது.

சென்னை உயர்நீதிமன்றத்தில் நிலுவையில் இருந்த இந்த வழக்கு தலைமை நீதிபதி கங்காபூர்வாலா, நீதிபதி ஆதிகேசவலு அடங்கிய முதன்மை அமர்வு முன்பு விசாரணைக்கு வந்தது.  அப்போது அரசு தலைமை வழக்குரைஞர் ஆர்.சண்முகசுந்தரம், அரசு தலைமை குற்றவியல் வழக்கறிஞர் அசன் முகமது ஜின்னா ஆகியோர் ஆஜராகி, ஆரம்ப கட்ட விசாரணை நடத்தப்பட்டு விட்டது என்றும், ஏற்கனவே இந்த வழக்கில் அடுத்த கட்ட நடவடிக்கை எடுப்பது குறித்து உயர்நீதிமன்ற ஒப்புதல் பெற வேண்டும் என உத்தரவிட்டுள்ளதாக என்று தெரிவித்தனர்.

இந்நிலையில், வழக்கை விசாரித்த நீதிபதிகள், ஏற்கனவே பிறப்பிக்கப்பட்ட உத்தரவு மாற்றி அமைக்கப்படுவதாகவும், அரசு  சட்டத்திற்கு உட்பட்டு அடுத்த கட்ட நடவடிக்கை எடுக்க எந்த தடையும் இல்லை என்றும், மேலும், அரசுக்கு அனைத்து அதிகாரங்கள் உள்ளது என்று கூறி வழக்கை முடித்து வைத்தனர்.

இதையும் படிக்க:குழந்தைகளின் எதிர்காலம் வீணாவதை அரசு வேடிக்கை பார்க்கின்றதா? :ஆவின் விவகாரம்!