எழுவர் குழு என்பது தான் ஜி-7 என்று அழைக்கப்படுகிறது. ஜி-7 என்பது அமெரிக்கா, ஜெர்மனி, கனடா, ஃப்ரான்ஸ், ஜப்பான், இத்தாலி மற்றும் இங்கிலாந்து உள்ளிட்ட ஏழு நாடுகளின் அரசியல் மற்றும் பொருளாதாரக் கூட்டணியாகும்.  

ஜி-7 நாடுகளின் சந்திப்பு

கடந்த ஜூன் 26 தொடங்கி ஜூன் 28 வரை ஜி-7 நாடுகளின் 48வது கூட்டம் ஜெர்மனியில் நடைபெற்று வருகிறது.

ஜி-7 நாடுகள் உலகெங்கிலும் உள்ள வளம் குறைந்த நாடுகளின் உள்கட்டமைப்பில் 600 பில்லியன் டாலர் முதலீடு செய்ய உள்ளன, அடுத்த ஐந்து ஆண்டுகளில் அமெரிக்கா இந்த்த் தொகையில் மூன்றில் ஒரு பங்கை செலுத்துகிறது. ஜெர்மனியில் ஞாயிற்றுக்கிழமை இந்த அறிவிப்பு வெளியிடப்பட்டது, இந்த முதலீடு சீனாவின் பட்டுப்பாதை முன்முயற்சிக்கு போட்டியாக இருக்கும் என எதிர்பார்க்கப்படுகிறது.

அமெரிக்க ஜனாதிபதி ஜோ பிடன் ஜி-7 குழுவின் மற்ற தலைவர்களுடன் குழுமியிருக்கும் போது, மேற்கத்திய நாடுகள் வளரும் மற்றும் நடுத்தர வருமானம் பெறும் நாடுகளில், உயர்தரமான, நிலையான உள்கட்டமைப்புக்கு நிதியுதவி செய்வதாக உறுதியளித்துள்ளன என்றார்.

ஆசியா, ஆப்பிரிக்கா மற்றும் லத்தீன் அமெரிக்காவில் உள்ள நாடுகளில் அதிக முதலீடு செய்வதன் மூலம் சீனா தனது செல்வத்தை ஆயுதமாக்குவதாக அமெரிக்கா நீண்ட காலமாக குற்றம் சாட்டி வருகிறது. டிரம்ப் நிர்வாகம் பெய்ஜிங் அதன் கடன் வாங்குபவர்களிடம் "கடன் பொறி இராஜதந்திரத்தை" பின்பற்றுவதாகக் கூறியது. கடன் பெறுபவர்களுக்கு திருப்பிச் செலுத்த முடியாத கடன்களையே வழங்குகிறார்கள் என்றும் கடன் செலுத்தாதவர்களிடம் அந்த கடன் மூலமாக கட்டப்பட்ட உள்கட்டமைப்பு வசதிகளை பிணையமாக எடுத்துக்கொள்கிறார்கள் என்றும் அமெரிக்கா கூறி வருகிறது.

2.5 டிரில்லியன் டாலர் என மதிப்பிடப்பட்டுள்ள அதன் உலகளாவிய உள்கட்டமைப்பு முதலீடுகள் தனக்கும் தான் கடன் வழங்கும் நாடுகளுக்கும் பயனளிக்கும் என்று கூறியுள்ள சீனா, அமெரிக்காவின் இந்தக் கூற்றை நிராகரிக்கிறது. பெரும்பாலான பணம் சாலைகள் மற்றும் துறைமுகங்கள் போன்றவற்றிற்கு செல்கிறது, இது சீனாவை வெளிநாட்டு வளங்கள் மற்றும் சந்தைகளுக்கும் இடையே நேரடித் தொடர்பை ஏற்படுத்துவதாக சீனா கூறுகிறது.

உலகளாவிய உட்கட்டமைப்புத் திட்டம்

ஏறக்குறைய பத்து ஆண்டுகளுக்கு முன்பு  பட்டுப் பாதை திட்ட்த்திற்கான முன்முயற்சி தொடங்கப்பட்டதில் இருந்து, அமெரிக்காவும் அதன் நட்பு நாடுகளும் சீனாவின் திட்டத்திற்கு மாற்றாக ஒன்றை வழங்க முயற்சித்து வருகின்றன. கடந்த ஆண்டு, இங்கிலாந்தில் உள்ள கார்ன்வாலில் நடந்த ஒரு சந்திப்பின் போது, ​​ஜி-7 நாடுகள் தங்கள் சொந்த திட்ட்த்தை அறிவித்தன, "சிறந்த உலகத்தை மீண்டும் கட்டியமைப்போம்"(BBBW) என்று அத்திட்ட்த்திற்கு பெயரிடப்பட்டது. பிடன் நிர்வாகத்தின் உள்நாட்டுத் திட்டத்தை பிரதிபலிக்கும் வகையில், அது இருந்ததால் பல்வேறு தரப்பினரால் இது புறக்கணிக்கப்பட்டது. பின்னர் உலகளாவிய உள்கட்டமைப்பு மற்றும் முதலீட்டிற்கான கூட்டாண்மை(PGII) என மறுபெயரிடப்பட்டது.

இது உதவியோ அல்லது தொண்டோ அல்ல என்று பிடன் கடந்த ஞாயிற்றுக்கிழமை ஜெர்மனியில் தனது உரையின் போது கூறினார். இது அமெரிக்க மக்கள் மற்றும் நமது அனைத்து நாடுகளைச் சேர்ந்த மக்களுக்கும் வருமானத்தை வழங்கும் ஒரு முதலீடு என்று அவர் கூறினார். 

இது எங்கள் எல்லாருடைய பொருளாதாரத்தையும் மேம்படுத்தும், மேலும் எதிர்காலத்திற்கான எங்கள் நேர்மறையான பார்வையைப் பகிர்ந்து கொள்ள இது ஒரு வாய்ப்பாகும், மேலும் உலகெங்கிலும் உள்ள சமூகங்கள் மற்றும் ஜனநாயக நாடுகளுடன் எங்களுடன் கூட்டு சேருவதன் மூலம் உறுதியான நன்மைகளைத் அவர்களே பார்ப்பார்கள்  என பிடன் கூறினார்.

ஓய்வூதிய நிதியம், தனியார் காப்பீட்டு நிதியம் போன்ற முதலீட்டாளர்களின் தனிப்பட்ட மூலதனத்துடன் அமெரிக்க அரசின் நிதியையும் இணைப்பதன் மூலம் அமெரிக்கா வழங்கும் 200 பில்லியன் டாலர்  ஈடுசெய்யப்படும் என பிடென் தெரிவித்தார். ஐரோப்பிய ஒன்றியம் கடந்த ஆண்டு டிசம்பரில் பட்டுப் பாதை திட்ட்த்திற்கு பதிலாக 300 பில்லியன் யூரோ மதிப்பிலான தனது சொந்த திட்டத்தை அறிவித்தது என்பது குறிப்பிட்த்தக்கது.

 ஜி-7 நாடுகளின் இந்த்த் திட்டம் காலநிலை மாற்றத்தை எதிர்க்கும் விதமான உள்கட்டமைப்பு மற்றும் எரிசக்தி ஆதாரங்கள், பாதுகாப்பான தகவல் தொடர்பு, பாலின சமத்துவத்தை மேம்படுத்தும் திட்டங்கள் மற்றும் சுகாதாரம் உள்ளிட்ட நான்கு முக்கிய துறைகளில் கவனம் செலுத்தும் என்று வெள்ளை மாளிகை தெரிவித்துள்ளது. ஏற்கனவே நூற்றுக்கும் மேற்பட்ட திட்டங்கள் நடந்து வருகின்றன என்று கூறிய அவர், அதில் ஒரு சில திட்டங்களைப் பற்றிக் கூறினார்.

ஒரு சிறிய மாடுலர் ரியாக்டர் (SMR) ஆலையை உருவாக்க ரூமேனிய நாட்டின் முயற்சிகளுக்கு ஆதரவாக 14 மில்லியன் டாலர். மத்திய கிழக்கு மற்றும் ஆப்பிரிக்கா வழியாக சிங்கப்பூரை பிரான்சுடன் இணைக்க கடலுக்கடியில் தொலைத்தொடர்பு கேபிளை உருவாக்க 600 மில்லியன் டாலர் ஒப்பந்தம்; மற்றும் கோட் டி இவோரியில் மருத்துவமனைகளைக் கட்ட 320 மில்லியன் டாலர் தனியார் மேம்பாட்டுத் திட்டம் போன்றவற்றைக் குறிப்பிட்டார்.

பொலிட்டிகோ போன்ற சில செய்தி நிறுவனங்கள் காலநிலை மாற்றத்தை எதிர்க்கும் வகையில் உருவாக்கப்பட்டுள்ள மேற்கத்திய முதலீட்டுத் திட்டங்கள் ஏற்கனவே விமர்சனத்திற்கு உள்ளாகியுள்ளது என்றும் அது போதிய பலனை தரப்போவதில்லை என்றும் குறிப்பிட்டுள்ளன.

 - ஜோஸ் 

பஞ்சாப் மாநிலத்தில் நடைபெற்ற சங்ரூர் நாடாளுமன்றத் தொகுத்திக்கான இடைத்தேர்தலில் சிரோண்மனி அகாலிதளம் (அமிர்தசரஸ்) கட்சியின் தலைவர் சிம்ரஞ்சித் சிங் மான் வெற்றிபெற்றுள்ளார்.இவர் காலிஸ்தான் ஆதரவாளர் என்பதுகுறிப்பிடத்தக்கது.

தனிநாட்டுக்கான எண்ணம் நீண்ட காலமாகவே சீக்கியர்களிடம் இருந்து வந்தது. சீக்கிய மத குருவான பிந்தரன் வாலே “காலிஸ்தான்” என்னும் சீக்கியர்களுக்கான தனிநாட்டுக் கோரிக்கையை முன்வைத்தார்.1978 சுமார் பதினைந்து ஆண்டுகள் பல்வேறு ஆயுதக் குழுக்கள் காலிஸ்தான் கோரிக்கைக்காக செயல்பட்டுவந்தன.

பஞ்சாப் இளைஞர்களிடம் பிந்தரன்வாலேவுக்கு பெரும் ஆதரவு உண்டானது.ஆயிரத்திற்கும் மேற்பட்ட காலிஸ்தான் போராளிகள் சீக்கிய மதத்தின் தலைமையிடமான பொற்கோயிலைத் தளமாகக் கொண்டு செயல்பட ஆரம்பித்தனர்.அவர்களை அழித்து பொற்கோயிலை கைப்பற்ற நினைத்த இந்திய அரசு ”ஆப்ரேசன்ப்ளூஸ்டார்” என்னும் இராணுவ நடவடிக்கையை தொடங்கியது.

பத்தாயிரம் இந்திய இராணுவத்தினர் குவிக்கப்பட்டனர். ஏராளமான பீரங்கிகளும், கவச வாகனங்களும் இந்த இராணுவ நடவடிக்கையில் ஈடுபடுத்தப்பட்டது.பொற்கோயில் மீது பெரும் தாக்குதலைத் தொடங்கியது இந்திய அரசு.பொற்கோயிலைச் சுற்றிக் குடியிருந்தவர்களும் இராணுவத் தாக்குதலுக்கு இலக்காகினர். ஏராளமான காலிஸ்தான் போராளிகளும், சீக்கிய பக்தர்களும் கொல்லப்பட்டனர். 500க்கும் மேற்பட்டோர் கைது செய்யப்பட்டனர்.காலிஸ்தான் இயக்கத் தலைவர் பிந்தரன் வாலே இந்திய இராணுவத் தாக்குதலில் கொல்லப்பட்டார்.இந்திய இராணுவத் தாக்குதலில் பொற்கோயில் கடுமையான சேதத்திற்குள்ளாகியது.

தங்கள் புனிதத் தலமான பொற்கோயில் மீது நடந்த தாக்குதல் சீக்கியர்களுக்குள் சீற்றத்தை உண்டாக்கியது.இந்தத் தாக்குதலுக்கு உத்தரவிட்ட அப்போதைய பிரதமர் இந்திராகாந்தி மீது சீக்கியர்களுக்கு கடுமையான கோபம் இருந்தது.அந்தக் கோபம்இந்திரா காந்தியை பழி தீர்க்கும் அளவுக்குச் சென்றது.

பொற்கோயில் மீது இந்திய அரசு மேற்கொண்ட ”ஆபரேசன்ப்ளூஸ்டார்” இராணுவ நடவடிக்கையால் கோபமடைந்த அரசின் முக்கியப் பணிகளில் இருந்த சீக்கியர்கள் பலர் பதவி விலகினர்.அதில் ஒருவர் தான் சிம்ரஞ்சித் சிங் மான்.இவர் ஐ.பி.எஸ் அதிகாரியாக பணியாற்றி வந்தவர்.மகாராஷ்டிர மாநிலத்தில் மத்திய தொழிற் பாதுகாப்புப் படையின் கமாண்டண்ட் ஆக பணியாற்றிக் கொண்டிருந்த போது தான் பொற்கோயில் மீதான இந்திய இராணுவத்தின் தாக்குதல் நடந்தது.அதற்கு எதிர்ப்பு தெரிவித்து பதவி விலகினார்.

பொற்கோயில் மீது தாக்குதல் நடந்த சில மாதங்களிலேயே தனது சீக்கிய மெய்ப்பாதுகாவலர்களால் இந்திரா காந்தி கொல்லப்பட்டார்.இந்திரா காந்தி கொல்லப்பட்ட பிறகு வடஇந்தியாவில் சீக்கியர்களுக்கு எதிரான கலவரங்கள் நடைபெற்றன.அதைக் கண்டித்து நடந்த போராட்டங்களுக்கும் ஆதரவளித்தார்.

தனது காலிஸ்தான் ஆதரவு செயல்பாடுகளுக்காக 5 ஆண்டு காலம் சிறையிலடைக்கப்பட்டார். 1989 ஆம் ஆண்டு சிறையில் இருந்து கொண்டே நாடாளுமன்றத் தேர்தலில் போட்டியிட்டு வெற்றிபெற்றார்.பஞ்சாபில் மொத்தமிருந்த 13 நாடாளுமன்ற தொகுதிகளில் சிம்ரஞ்சித் சிங் மானின் சிரோண்மனி அகாலிதளம் கட்சி 6 இடங்களை கைப்பற்றியது.

இவர் நீண்ட காலமாக சீக்கியர்களின் அரசியல் உரிமைக்கும், பஞ்சாபி மொழி உரிமைக்கும் போராடி வருபவர். 1999 ஆம் ஆண்டு இதே சங்ரூர் தொகுதியிலிருந்து நாடாளுமன்ற உறுப்பினராக தேர்வு செய்யப்பட்டார்.

தற்போது பஞ்சாப் ஆளுங்கட்சியான ஆம் ஆத்மி வேட்பாளரை வீழ்த்தி மூன்றாவது முறையாக நாடாளுமன்றத்திற்குச் செல்லவுள்ளார்.இவர் நாடாளுமன்றத் தேர்தலில் வெற்றி பெற்றது சீக்கியர்களின் நலனில் அக்கறை கொண்ட பலருக்கும் நம்பிக்கையை ஏற்படுத்தியுள்ளது.

- ஜோஸ்

பிரபல தகவல் சரிபார்க்கும் தளமான ஆல்ட் நியூஸ் இணை நிறுவனர் முகமது சுபேர், இன்று டெல்லியில் போலீசாரால் கைது செய்யப்பட்டார். ஒரு வழக்கு குறித்து விசாரணைக்கு அழைத்துச் செல்லப்பட்டதில் வேறு வழக்கின் பின்னணியில் அவர் இருப்பது உறிது செய்யப்பட்டதாகவும், அவர் மீது எஃப் ஐ ஆர் பதிவு செய்யப்பட்டதாகவும் தகவல் வெளியாகதில் பெரும் பரபரப்பு ஏற்பட்டுள்ளது.

தகவல்களை சரிபார்க்கும் தளமான ஆல்ட் நியூசின் இணை நிறுவனர் முகமது சுபேர், பல தகவல்களை தனது சோசியல் மீடியாக்களிலும் பகிர்ந்து வருவது வழக்கம். 

இந்த நிலையில், அவருக்கு பல தரப்பில் இருந்து எதிர்ப்புகள் வந்தது அனைவரும் அறிந்ததே. இந்த நிலையில், தன்னை கொடுமையாக கமெண்ட் செய்த ஒரு ட்விட்டர் பயணியை எடுத்துக் காட்டி, அவரை டேக் செய்து, “நீங்கள் இப்படி சோசியல் மீடியாக்களில் வந்து அடுத்தவர்களை அசிங்கமாக பேசுவது உங்கள் பேத்திக்கு தெரியுமா? நீங்கள் உங்கள் profile pic மாற்ற பரிந்துரைக்கிறேன்.” என அந்த பயணியின் profile pic-இல் இருக்கும் அவரது பேத்தியை சுட்டிக் காட்டி பேசி இருக்கிறார். 

மேலும், அந்த பதிவு போடும் போது, அந்த பெண் குழந்தையும் முகத்தை மறைத்தும் பகிர்ந்திருக்கிறார். இதனைத் தொடர்ந்து, NCPCR, அதாவது, தேசிய குழந்தைகள் உரிமைகள் பாதுகாப்பு ஆணையத்திடம், சிறு குழந்தையின் தகவலை தவறான முறையில் கையாண்டதாக புகார் அளிக்கப்பட்டது.

பின், டெல்லி காவல்துறையின் சைபர் செல் அவர் மீது போக்சோ சட்டம் மற்றும் ஐடி சட்டத்தின் பிரிவுகளின் கீழ் வழக்கு பதிவு செய்தது. அந்த நேரத்தில், மைனரை ஏமாற்றியதாக சுபேருக்கு எதிரான குற்றச்சாட்டை ஆல்ட் நியூஸ் தவுடுபொடி ஆக்கியிருந்தது குறிப்பிடத்தக்கது. மேலும், சுபைர் டெல்லி உயர் நீதிமன்றத்தை அணுகியதால், நீதிமன்றம் அவருக்கு எதிராக எந்த ஒரு கட்டாய நடவடிக்கையும் எடுக்க டெல்லி காவல்துறைக்கு தடை விதித்தது.

இந்த நிலையில், இந்த வழக்கு சம்மந்தமாக சுபேரை டெல்லி போலீஸ் இன்று வரவழைத்திருந்தனர்.  ஆனால், அவருக்கு உயர் நீதிமன்றம் கொடுத்த பாதுகாப்பு காரணமாக புதிதாக ஒரு வழக்கு அவர் மீது பதிவு செய்து, அவர் மேல் எஃப் ஐ ஆர் பதிவு செய்யப்பட்டது. 

இதனை அடுத்து சுபேர் தனது வழக்கமான மருத்துவ பரிசோதனைக்காக மருத்துவமனையில் அனுமதிக்கப் பட்டிருப்பதாக தெரிவித்த ஆல்ட் நியூஸ் நிறுவர் பிரதீக் சின்ஹா, பத்திரிக்கையாளர்கள் சுபேரை சந்திக்க அனுமதிக்காததாகக் கூறப்படுகிறது. மேலும் எஃப் ஐ ஆர் குறித்த தகவல்களை வெளியிடவும் மறுத்ததாகத் தகவல்கள் கூறுகின்றன.

பெண்கள் மற்றும் குழந்தைகளுக்கு எதிரான சைபர் குற்றங்களைத் தடுக்கும் டெல்லி காவல்துறையின் IFSO அதாவது Intelligence Fusion and Strategic Operations சிறப்புப் பிரிவால் இந்த கைது பதிவு செய்யப்பட்டுள்ளது. அவர் கலவரத்தை ஏற்படுத்தும் நோக்கத்துடன் தூண்டுதல்களை வழங்குவது அடிப்படையில், பிரிவு 153 இன் கீழ், மற்றும் வேண்டுமென்றே மற்றும் தீங்கு இழைக்கும் செயல்கள், மதம் அல்லது மத நம்பிக்கைகளை அவமதிப்பதன் மூலம் எந்த வகுப்பினரின் மத உணர்வுகளையும் சீற்றம் செய்யும் நோக்கத்துடன் செயல்பட்டதாக, பிரிவு 295A வின் கீழ் கைது செய்யப்பட்டுள்ளதாக தெரிகிறது.

முகமது சுபேர் தகவல் சரிபார்ப்பு தளமான Alt News இன் இணை நிறுவனராக இருக்கும் நிலையில், பல வருடங்களாக போலிச் செய்திகளை இடைவிடாமல் நீக்கி வருகிறார். கடந்த மே மாதம், சுபேர் மூன்று சர்ச்சைக்குரிய இந்துத் தலைவர்களான யதி நரசிங்கானந்த், மஹந்த் பஜ்ரங் முனி மற்றும் ஆனந்த் ஸ்வரூப் - ஆகியோரை 'வெறுக்கத்தக்கவர்கள்' என்று ஒரு ட்வீட் செய்திருந்தார்.

அதற்காக, அவருக்கு எதிராக உத்தரபிரதேச காவல்துறை வழக்கும் பதிவு செய்தது. இந்து உணர்வுகளை சீர்குலைத்ததற்காக இந்திய தண்டனைச் சட்டம் (ஐபிசி) மற்றும் தகவல் தொழில்நுட்ப (ஐடி) சட்டத்தின் பிரிவு 67 ஆகியவற்றின் கீழ் சுபேர் மீது வழக்கு பதிவு செய்யப்பட்டது. அவர் வெறுப்பு உணர்வாளர்கள் என்று அழைக்கும் இந்த இந்துத் தலைவர்கள் இஸ்லாமியர்களுக்கு எதிராக ஆத்திரமூட்டும், முகம் சுளிக்கும் பல ஆட்சேபனைக்குரிய கருத்துக்களை வெளியிடுவதில் பெயர் பெற்றவர்கள் என்பதும், யதி நரசிங்கானந்தாவும் வெறுப்புப் பேச்சு வழக்கில் சிறையில் அடைக்கப்பட்டு பின்னர் ஜாமீன் பெற்றதும் குறிப்பிடத்தக்கது.

உலகில் முதன் முதலாக பெமினிசம் என்ற சொல் உருவானதே அமெரிக்காவில் தான். பெண்களுக்கும் ஓட்டுரிமை வேண்டும் என போராட்டம் செய்து தங்களது ஓட்டுரிமையைப் பெற்று, உலகத்திற்கே பெண்ணியத்தின் பெருமையை எடுத்துக் காட்டினர்.

வளர்ந்த நாடாக தன்னைத் தானே காட்டிக் கொள்ளும் அமெரிக்கா, தற்போது, பின்தங்கிய நாடுகளை விட மேலும் பின்னோக்கி சென்று விட்டது. பெண்கள் தங்களது சொந்த உடல் குறித்த முடிவுகள் கூட எடுக்க முடியாத ஒரு நிலைக்கு தள்ளப்பட்டிருக்கின்றனர்.

பல வருடங்களாக, தங்களது மதத்தை முன்வைத்து பெண்கள் கருகலைப்பு செய்வது மாபெரும் பாவம் எனக் கூறி வந்த கூட்டத்திற்கு இடையில், தங்களது இயலாமை மற்றும் வறுமை காரணமாக பல பெண்கள் அமெரிக்காவில் கருகலைப்பு செய்து வந்தனர். சூழ்நிலை காரணமாக ஒரு சில பெண்கள் சிறு வயதில் கூட பலவந்தப்படுத்தப் படுவதால், கருவுற்று, தங்களது வாழ்க்கையையே இழக்கும் நிலை ஏற்பட்டு விடுகிறது. அவர்களது எதிர்காலத்தை எடுத்துக் காட்டுவது இந்த கருகலைப்பு தான். ஆனால், அது புரியாத ஒரு சிலர், தங்களது தனிப்பட்ட கருத்துகளை அடுத்தவர்கள் மீது திணிப்பதோடு, அந்த திணிப்பை பின்பற்றாதவர்களுக்கு சாபம் கூட கொடுத்து வருகின்றனர்.

அந்த வகையில், கருகலைப்பிற்கு அனுமதி அளித்த, 1972-இல் வழங்கப்பட்ட ரோ vs வேட் வழக்கின் தீர்ப்பு, தற்போது அமெரிக்காவில் ரத்து செய்யப்பட்டுள்ளது. இதனால், பெரும் கலவரங்கள் அமெரிக்காவின் பல பகுதிகளில் வெடித்துள்ளன.  மேலும், பின்னோக்கி இந்த தீர்ப்பு இருப்பதாக பலரால் எதிர்ப்பு தெரிவிக்கப்பட்டு வருவதால், அமெரிக்கா மட்டுமின்றி உலக மக்கள் பலரையும் பரபரப்பில் ஆழ்த்தியுள்ளது.

1972-இல் வழங்கப்பட்ட தீர்ப்பின் படி, அமெரிக்காவின் எந்த பகுதியிலும் இருக்கும் பெண்கள், கருகலைப்பு செய்ய முழு அனுமதி வழங்கப்பட்டது. மேலும், கருகலைப்பு, அமெரிக்க பெண்களின் அடிப்படை உரிமை என்றும் நீதிமன்றம் வலியுறுத்தியது. 50 ஆண்டுகளுக்கு முன் எதற்க்காக போராடி வெற்றிப் பெற்று ஒரு தீர்ப்பைப் பெற்றனரோ, அந்த போராட்டம் வலுவிழந்து போனது காலத்தின் முரண்பாடு.  

இதற்கு காரணம் என்ன? என உலக மக்கள் பலராலும் கேள்வி எழுப்பப்பட்டு வருகிறது. இதற்கு முக்கிய காரணம், முந்தைய ஆட்சியில், செய்யப்பட்ட பிரச்சாரங்கள் தான் எனக் கூறப்படுகிறது. தற்போது ஆட்சி செய்யும் ஜோ பைடனுக்கு முன், அமெரிக்காவை மோசமான நிலைக்கு கொண்டு போனதாக விமர்சனம் பெற்ற ஆட்சியாளர் தான் டோனால்டு ட்ரம்ப்.  யாராலும் சகிக்க முடியாத பல திட்டங்களைக் கொண்டு வந்து பலரது வெறுப்புகளை ட்ரம்ப் சம்பாதித்தார் என்று சொன்னால், அது அவரது ஆட்சியை விமர்சிப்பதில் மிகையாகாது. இத்தகைய தலைவர் இருந்த போது வந்த பிரச்சாரங்களில் ஒன்று தான் கருகலைப்பிற்கான எதிர்ப்பு. ஆட்சி காலத்தில் மட்டுமல்லாமல், இரண்டாவது முறையாக ஆட்சி பிடிக்க பிரச்சாரம் செய்த போது கூட ட்ரம்ப் கொடுத்த அந்த வாக்குறுதிகளில் ஒன்று, கருகலைப்புக்கு தடை.

தற்போது, 1972ம் ஆண்டு வழங்கப்பட்ட தீர்ரப்பை நீக்கி, அமெரிக்க உச்ச நீதிமன்றம் தீர்ப்பு வழங்கியதில் அங்குள்ள 50 மாகாணங்களில் பெரும்பாலான மாகாணங்களில் இந்த சட்டம் அமலுக்கு வரும் என எதிர்பார்க்கப்படுகிறது. இந்த வழக்கில் சம்பந்தப்பட்ட 9 உச்ச நீதிமன்ற நீதிபதிகளில் 6 பேர் கருக்கலைப்பை தடை செய்துள்ளனர். அதில் 3 நீதிபதிகள் டிரம்பிற்கு நெருக்கமானவர்கள் என்றும் டிரம்ப் மூலம் நியமிக்கப்பட்டவர்கள் என்றும் கூறப்படுகிறது. அதாவது நேரடியாக நீதிபதிகள் ஆகாமல் நியமன முறையில் டிரம்ப் மூலம் நீதிபதிகள் ஆனார்கள் என்பது குறிப்பிடத்தக்கது.

இதனால், அவர்கள் முன்முடிவோடுதான் இந்த வழக்கை அணுகியுள்ளனர் என்றும், இந்த தீர்ப்பை இப்படி வழங்கியதாகவும் புகார் வைக்கப்பட்டு இருக்கிறது. அது மட்டுமின்றி, கடந்த மாதம் இந்த வழக்கில் ஒரு நீதிபதியாக நியமிக்கப்பட்டிருந்த சாமுவேல் அலிட்டோவ் என்பவரது தீர்ப்பின் நகலும் லீக்-காகி பெரும் பரபரப்பை ஏற்படுத்தியது. அதிலும் கருக்கலைப்பிற்கு தடை என்ற வாசகங்கள் இருந்த நிலையில், அதற்கு எதிராக அப்போதே பெண்கள் அங்கு கடுமையாக போராட்டம் செய்தனர். இந்த தீர்ப்பு தற்போது வெளியாகி உள்ள நிலையில் பெண்கள் மேலும் போராட்டம் செய்வார்கள் என்று எதிர்பார்க்கப்படுகிறது.

இந்த தீர்ப்பு வந்த சில மணி நேரங்களில் வரிசையாக பல மாகாணங்கள் அங்கு கருக்கலைப்பை தடை செய்து உத்தரவிட்டுள்ளது. அலபாமா, அர்கான்சஸ், கென்டகி, லுய்சியானா, மிசோரி, ஓக்லகோமா, தெற்கு டக்கோடா ஆகிய 7 மாகாணங்கள் முதல் கட்டமாக கருக்கலைப்பை தடை செய்துள்ளது. மேலும், அமெரிக்காவின் 50 மாகாணங்களில் 29 மாகாணங்களில் இந்த தடை அமலாக்கப்பட்டுள்ளதாக தகவல்கள் வெளியாகியுள்ளன. இவை எல்லாம் டிரம்பின் குடியரசு கட்சி சேர்ந்த ஆளுநர் மாகாணங்கள் என்பதும் குறிப்பிடத்தக்கது.

இதனால், ஒரு வேளை தடை செய்யப்பட்ட பகுதிகளில் இருக்கும் பெண்கள் கருகலைப்பு செய்ய முயன்றால், அவர்கள் தடையில்லா மாகாணங்களுக்கு பயணம் செய்ய வேண்டி இருக்கும். உதாரணத்திற்கு, மிசோரி பகுதி பெண்கள், அருகில் இருக்கும், மினிசோட்டா மாகாணங்கள், அதாவது ட்ரம்பின் குடியரசு கட்சியின் ஆளுநர்களுக்கு கீழில்லாத மாகாணங்களுக்கு பயணம் செய்து தான் கருகலைப்பு செய்ய வேண்டும்.

இவ்வளவு அடக்குமுறைகளை கையாண்டு வரும் அமெரிக்க அதிபர்கள் மீது கடும் கோபத்தில் இருக்கும் பொது மக்கள் தங்களது எதிர்ப்புகளை போராட்டங்கள் மூலம் வெளிப்படுத்தி வருகின்றனர். மேலும், அவ்வளவு தவறான செயல் கருகலைப்பு என்றால், அது நடக்காமல் இருக்க, கருத்தடைகளை கொண்டு வர வேண்டும் என்றும், பாதுகாப்பான உடலுறவு செய்வதை ஊக்குவிக்க வேண்டும் என்றும், பலாத்காரங்களையும் பலவந்தமான உடலுறவுகளையும் எதிர்த்து கடுமையான சட்டங்கள் வரவழைக்க வேண்டும் என்றும் அனைவரும் சாலைகளிலும் சோசியல் மீடியாக்களிலும் போராடி வருகின்றனர்.

மேம்பட்ட நாடாக இருந்த அமெரிக்க, மக்கள் மனதில் 50 வருடங்கள் பின்னோக்கி சென்று விட்டது என்பதில் எந்த ஐயமும் இல்லை.

யஷ்வந்த் சின்ஹா:
         
குடியரசு தலைவர் தேர்தலில் எதிர்க்கட்சிகளின் வேட்பாளராக இருக்கும் யஷ்வந்த் சின்ஹா, பீகார் மாநிலத்தின் தலைநகர் பாட்னாவில் பிறந்தவர். தற்போது 84 வயதாகும் இவர், முதலில் ஐஏஎஸ் அரசு அதிகாரியாக பணியாற்றி வந்தார். இவர் தனது பதவியை 1984 - ல் ராஜினாமா செய்ததை அடுத்து தனது முதல் அரசியல் பயணத்தை ஜனதா தளம் கட்சியில் ஆரம்பித்தார். மேலும் 1988 ல் ராஜ்யசபா உறுப்பினராகவும் பணியாற்றி வந்தார். 

இதனையடுத்து பாஜாகவில் மிகப்பெரிய புகழை பெற்ற இவர், பாகிஸ்தான் பயணத்தின் போது முகமது அலி ஜின்னாவைப் புகழ்ந்ததற்காக தனது வழிகாட்டியான அத்வானியை எதிர்க்கட்சித் தலைவரிலிருந்து பதவி விலகக் கோரி குரல் எழுப்பியதால் 2005 க்கு பிறகு கட்சியில் யஷ்வந்த் சின்ஹாவின் ஓரங்கட்டல் தொடங்கியது. 

இதனிடையே 1998 க்கும் 2002 க்கும் இடையில் பிரதமர் வாஜ்பாய் தலைமையிலான அமைச்சரவையில்  2 முறை மத்திய நிதித்துறை அமைச்சராகவும், பிரதமர் சந்திர சேகர் தலைமையிலான அமைச்சரவையில் மத்திய வெளியுறவுத்துறை அமைச்சராகவும் பணியாற்றிய யஷ்வந்த் சின்ஹா, பாஜக தலைமையில் மோடி பதவி ஏறியதைத்தொடர்ந்து, கடந்த 2018 ஆம் ஆண்டு பாஜகவில் இருந்து விலகினார். 

அதைத் தொடர்ந்து, 2021- ஆம் ஆண்டு திரிணாமூல் காங்கிரஸ் கட்சியில் தன்னை இணைத்துக்கொண்ட யஷ்வந்த் சின்ஹா கட்சியின் துணைத் தலைவராக பணியாற்றி வந்தார். இவர் நீண்ட நெடிய அரசியல் அனுபவம் கொண்டவர். தற்போது பெரிய தேசிய நோக்கத்திற்காக திரிணாமூல் காங்கிரஸ் கட்சியிலிருந்து விலகியதாகக் கூறி தனது ட்விட்டர் பக்கத்தில் அதிகாரப்பூர்வமாக அறிவித்திருந்தார். இந்நிலையில் குடியரசு தலைவர் தேர்தலில் எதிர்க்கட்சிகளின் பொது வேட்பாளராக தற்போது களமிறக்கப்பட்டுள்ளார். அதற்கான வேட்புமனுவையும் இன்று யஷ்வந்த் சின்ஹா தாக்கல் செய்துள்ளார். இவர் மோடி அரசாங்கத்தின் வேட்பாளர் திரௌபதி முர்முவுக்கு ஒரு பெரிய போட்டியாளராக இருப்பார் என்று எதிர்ப்பார்க்கப்படுகிறது.