தமிழகத்தில் தி.மு.க ஆட்சிக்கு வந்த பின் அ.தி.மு.க ஆட்சியில் நடந்த ஊழல்களை வெளிக்கொண்டு வந்து அதன் மீது நடவடிக்கை எடுக்கப்படும் என முதல்வர் மு.க.ஸ்டாலின்  தெரிவித்திருந்தார். அதன் அடிப்படையில் அ.தி.மு.க முன்னாள்  அமைச்சர்களான எம்.ஆர் விஜயபாஸ்கர், எஸ்.பி வேலுமணி, கே.சி வீரமணி ஆகியோர்  தொடர்புடைய இடங்களில் லஞ்ச ஒழிப்பு துறையினர் சோதனை நடத்தி பல லட்சம் ரொக்கம், பல முக்கிய ஆவணங்களை  பறிமுதல் செய்தனர். அதன் மீதான விசாரணை நடந்து வருகிறது.

இந்நிலையில் கடந்த 10 ஆம் தேதி பொதுப்பணிதுறை அலுவலகத்தில் இருக்கக்கூடிய 8 கணினிகளின் ஹார்டிஸ்க் அழிக்கப்பட்டு இருப்பதாக வெளியான தகவல் அதிர்ச்சியை ஏற்படுத்தியுள்ளது. குறிப்பாக அந்த கணினியில் கடந்த ஆட்சி காலத்தின்போது தமிழகத்தில் புதிதாக கட்டப்பட்ட கட்டிடங்களின் விவரங்கள் மற்றும் சீரமைப்பு செய்யப்பட்ட கட்டிட விவரங்கள் என பல முக்கிய கோப்புகள் இருந்ததாக கூறப்படுகிறது.

இது தொடர்பாக பொதுப்பணித்துறை அதிகாரிகள் அலுவலகத்தில் பொருத்தப்பட்ட சி.சி.டி.வி காட்சிகளை ஆய்வு செய்து அதன் அடிப்படையில் மேற்கொண்ட விசாரணையில் பொதுப்பணித் துறையின் இணை தலைமை பொறியாளர் மற்றும் கண்காணிப்பு பொறியாளர் ஆகியோர் கோப்புகளை அழித்தது தெரிய வந்துள்ளதாக தகவல் வெளியாகியுள்ளது. குறிப்பாக இணை தலைமை பொறியாளராக இருக்கக்கூடியவர் முன்னாள் அமைச்சர் ஒருவரின் நெருங்கிய நபர் எனவும், கடந்த ஆட்சியின் போது பொதுப்பணித் துறை சார்பில் டெண்டர் உட்பட அனைத்து ஒப்பந்தங்களையும் கவனித்து வந்தவர் என்பதும் குறிப்பிடத்தக்கது.

சில நாட்களுக்கு முன்பு பொதுப்பணி துறை அலுவலகத்தில் சீரமைப்பு பணிகள் மேற்கொள்ள இருப்பதாகக் கூறி சீரமைப்பு பணியின் போது 8 கணினியில் இருந்த முக்கிய கோப்புகளை இவர்கள் அழித்ததாக கூறப்படுகிறது. இதனையடுத்து உடனடியாக இணை தலைமை பொறியாளர் மற்றும் கண்காணிப்பு பொறியாளரை வேலூர் மற்றும் மதுரைக்கு பணியிட மாற்றம் செய்து பொதுப்பணி துறை நிர்வாகம் நடவடிக்கை எடுத்துள்ளது. மேலும், அழிக்கப்பட்ட கோப்புகளை மீட்டெடுக்கும் பணியில் சைபர் கிரைம் போலீசாரின் உதவியுடன் பொதுப்பணித் துறை அதிகாரிகள் ஈடுபட்டு வருவதாக தகவல் கசிந்துள்ளன.

கடந்த ஆட்சியில் நடைபெற்ற ஊழலை வெளிகொண்டு வர தொடர்ந்து லஞ்ச ஒழிப்பு துறையினர் சோதனை நடத்தி வரும் நிலையில், பொதுப்பணி துறைக்கு சம்பந்தமான முக்கிய கோப்புகள் அழிக்கப்பட்டிருப்பது சந்தேகத்தை ஏற்படுத்தி உள்ளது. ஊழலில் ஈடுபட்ட ஆதாரங்களை அழிக்கும் நோக்கில் செயல்பட்டுள்ளனரா? இந்த சம்பவத்தில் முன்னாள் அமைச்சரின் தலையீடு உள்ளதா? என குற்றச்சாட்டில் சம்மந்தப்பட்ட பொதுப்பணித் துறை அதிகாரிகளிடம் விசாரணை நடத்த முடிவு செய்திருப்பதாக கூறப்படுகிறது.

நாட்டில் நடைபெறும் சிறு குற்றங்கள் முதல் கொடூரமான குற்றங்களின் புள்ளி விவரங்கள் ஒவ்வொரு ஆண்டும் தேசிய குற்ற ஆவணக் காப்பகம் மூலம் வெளியிடப்படும். அந்த வகையில் 2020 ஆம் ஆண்டுக்கான தேசிய குற்ற ஆவணக் காப்பகத்தின் அறிக்கை சமீபத்தில் வெளியானது. அந்த அறிக்கை மூலம் பல்வேறு அதிர்ச்சித் தகவல்கள் வெளியாகியுள்ளது. குறிப்பாக பல்வேறு குற்ற வழக்குகளில் தண்டனை விகிதத்தை தேசிய குற்ற ஆவணக் காப்பகம் வகைப்படுத்தி வெளியிட்டுள்ளது.

அந்த வகையில் கடந்த 2020 ஆம் ஆண்டில், கலவரம் தொடர்பாக விசாரணைக்கு எடுத்துக்கொள்ளப்பட்ட 81 ஆயிரத்து 846 வழக்குகளில் 43 ஆயிரத்து 063 வழக்குகளுக்கு மட்டுமே குற்றப்பத்திரிக்கை தாக்கல் செய்யப்பட்டுள்ளதாகவும், அதில் 4 ஆயிரத்து 613 வழக்குகளில் மட்டுமே குற்றம் நிரூபிக்கப்பட்டு குற்றவாளிகள் தண்டிக்கப்பட்டுள்ளதாகவும், அது தவிர்த்து 5 லட்சத்து 19 ஆயிரத்து 589 வழக்குகள் நிலுவையில் உள்ளதாகவும் தெரியவந்துள்ளது. இதன் மூலம் கலவரம் தொடர்பான வழக்குகளில் வெறும் 29 சதவிகிதம் வழக்குகளில் மட்டுமே குற்றவாளிகள் தண்டனைக்கு உள்ளாக்கப்பட்டது தெரிய வந்துள்ளது.

அதுமட்டுமல்லாமல் கடந்த ஆண்டு மொத்தம் 43 ஆயிரம் பாலியல்  வழக்குகளில் விசாரணை துவங்கப்பட்டு அதில் வெறும் 3, 814 வழக்குகளில் மட்டுமே குற்றம் நிரூபிக்கப்பட்டு தண்டனை வழங்கப்பட்டுள்ளது. அதேபோல விசாரணைக்கு எடுத்துக்கொள்ளப்பட்ட 50 ஆயிரத்து 258 கொலை வழக்குகளில் காவல்துறை மூலம் 24 ஆயிரத்து 015 வழக்குகளுக்கு மட்டுமே குற்றப்பத்திரிக்கை தாக்கல் செய்யப்பட்டு 2 லட்சத்து 32 ஆயிரத்து 859 வழக்குகள் நிலுவையில் இருப்பதும் தேசிய குற்ற ஆவணக் காப்பகத்தின் அறிக்கை மூலம் தெரிய வந்துள்ளது.

இதன்படி மிக கொடூரமான குற்றங்களாக கருதப்படும் பாலியல் மற்றும் கொலை போன்ற வழக்குகளில் முறையே 39 சதவிகிதம் மற்றும் 41 சதவிகிதம் வழக்குகளில் மட்டுமே குற்றவாளிகள் கண்டறியப்பட்டு சட்டத்திற்கு முன் நிறுத்தி தண்டனைப் பெற்றுத்தரப்பட்டுள்ளது என்ற அதிர்ச்சித் தகவல் தெரியவந்துள்ளது. கலால் சட்டம் தொடர்பாக பதியப்பட்ட வழக்குகளில் மட்டுமே 94 சதவிகிதம் வழக்குகளில் தண்டனை பெற்றுத் தரப்பட்டுள்ளது எனவும் தேசிய குற்ற ஆவணக் காப்பகத்தின் அறிக்கையில் குறிப்பிடப்பட்டுள்ளது.

தமிழகத்தில் கொரோனா முதல் அலை ஓய்ந்து, இரண்டாம் அலையின் தாக்கத்தால் பொதுமக்கள் அதிகளவில் பாதிக்கப்பட்டனர். இந்நிலையில் அதிகளவில் பாதிக்கப்பட்ட பகுதிகளில் இருந்து எடுக்கப்பட்ட மாதிரிகளை பெங்களூர் ஆய்வகத்திற்கு பரிசோதனைக்காக அனுப்பி வைத்தனர். இதன் முடிவில் டெல்டா மற்றும் டெல்டா பிளஸ் உருமாறிய கொரோனா தொற்று இருந்தது கண்டறியப்பட்டு, மருத்துவ சிகிச்சை அளிப்பது மிகுந்த சவாலை ஏற்படுத்தியது. தொடர்ந்து நோய் பரவல் அதிகரிக்க தமிழகத்தில் பரவி வரும் கொரோனோ பாதிப்புகள் தன்மை குறித்து கண்டறிய மரபணு பகுப்பாய்வு பரிசோதனை மேற்கொள்வதற்கான தேவை அதிகரித்தது. உருமாறிய கொரோனோ வைரசை கண்டறியும் ஆய்வகங்கள் பெங்களூரு , புனே  உள்ளிட்ட 23 வெளி மாநிலங்களில் இருப்பதால், தமிழகத்திலிருந்து அனுப்பப்படும் மாதிரிகளை சோதனை செய்து முடிவுகள் பெறுவதில் காலதாமதமும், அதிக செலவும் ஏற்படுகிறது. எனவே, தமிழகத்தில் உருமாறிய வைரசை கண்டறியும் ஆய்வகம் அமைக்க வேண்டியதற்கான தேவை ஏற்பட்டது.

இதன்படி, கட்நத 2 ஆம் தேதி சுகாதாரத்துறை மானிய கோரிக்கையின் போது உருமாறிய கொரோனோ வைரஸை கண்டறிய ஆய்வகம் தொடங்கப்படும் என்று தமிழக முதலமைச்சர் தெரிவித்தார். அதன் அடிப்படையில் இந்தியாவிலேயே மாநில அரசின் சார்பில் தமிழகத்தில் 4 கோடி ரூபாய் செலவில் 12 நாட்களுக்குள் பகுப்பாய்வு மையம் அமைக்கப்பட்டது. அதனை முதலமைச்சர் மு.க.ஸ்டாலின்  திறந்து வைத்தார். இந்த ஆய்வகம் மூலமாக இனி கொரோனோ தொற்று உறுதி செய்யப்படும் நபர்களுக்கு எந்த வகை கொரோனா பாதிப்பு உள்ளது என்பதை எளிதில் கண்டறிய முடியும் என பொது சுகாதாரத்துறை ஆய்வக இணை இயக்குநர் ராஜு தெரிவிக்கிறார். ஒரு வாரத்தில் குறைந்தது 180 லிருந்து 200 மாதிரிகள் வரை ஆய்வு செய்யும் வகையில் இந்த மையம் வாயிலாக மரபணு பரிசோதனைக்கு உட்பட்ட மாதிரிகளின் முடிவுகள் 3 அல்லது 4 நாட்களுக்குள் பெறப்படும் என ஆய்வகத்தின் அலுவலர் ஹேமாஸ்ரீ கூறினார். பெங்களூருவில் உள்ள மரபணு பகுப்பாய்வு மையத்தில் பொது சுகாதாரத் துறையைச் சேர்ந்த ஆய்வக நுட்பனர்கள் ஒரு வார காலம் பயிற்சி பெற்று தங்களது பணியை  தொடங்கியுள்ளனர்.

கொரோனோ இரண்டாவது அலையில் வைரஸ் பாதிப்புகள் அதிகரித்த வேளையில் வைரஸின் உருமாற்றம் தொடர்பான மாதிரிகள் முடிவுகள் கடந்த காலங்களில் தாமதமாக கிடைக்கப்பெற்றது, தற்போது புதிதாக தொடங்கபட்ட இந்த மரபணு பகுப்பாய்வகம் வாயிலாக விரைந்து உருமாற்றம் அடைந்த பாதிப்புகளை கண்டறிய முடியும் என தமிழ்நாடு சுகாதாரத்துறை தெரிவித்துள்ளது.

2014ஆம் ஆண்டு டோனி கேப்டன் பதவியில் இருந்து விலகியதில் இருந்து ஒருநாள்,டி20 மற்றும் டெஸ்ட்  உள்ளிட்ட மூன்று வகையான போட்டிக்கும் இந்திய அணிக்கு விராட் கோலி கேப்டனாக உள்ளார். கோலி தலைமையிலான இந்தியா அணி பல வெற்றிகளை பெற்றாலும் ஐசிசி தொடரை ஒரு முறை கூட வெல்லவில்லை என்ற குறை மட்டும் கோலியை சுற்றி வலம் வருகிறது.

 இந்த நிலையில் தான் டி20 மற்றும் ஒருநாள் போட்டிக்கு ரோகித சர்மாவிடம் அளிக்க வேண்டும் என பல முன்னாள் வீரர்கள் கூறி வந்தனர். மேலும் கேப்டன் பதவியை ரோகித் சர்மாவிடம் கொடுத்தால் கோலிக்கு பணி சுமை குறையும் மற்றும் பேட்டிங்கில் மேலும் கவனம் செலுத்த முடியும் எனவும் கூறி வந்தனர்.

 மேலும் ஐசிசி தொடருக்கும் கோலிக்கும் ராசி இல்லை என சமூகவளைதங்களில் ரசிகர்கள் பலரும் கருத்து தெரிவித்து வந்தாலும் அது தான் உண்மையும் கூட கோலி தலைமையில் ஐசிசி தொடரில் 2017ஆம் ஆண்டு சாம்பியன் டிரபி தொடரில் பாகிஸ்தானுக்கு எதிரான இறுதி போட்டியில் தோல்வி, 2019ஆம் ஆண்டு நடைபெற்ற உலகக்கோப்பை அரையிறுதி வரை  சென்று தோல்வியடைந்தது. அந்த தொடரில் கோலிக்கும் ரோகித் சர்மாவுக்கும் பிரச்னை இருந்து வந்ததாக ஊடகங்களில் செய்தி வெளியாகின.

ஆம் நியூசிலாந்து அணிக்கு எதிரான அந்த போட்டியில் இலக்கை துரத்தி விளையாடிய இந்திய அணி அடுத்தடுத்த விக்கெட்டை இழந்து தடுமாறி கொண்டிருந்தது.அப்போழுது டோனியை களமிறங்க கோலியிடம்  சொன்னாராம் ரோகித் சர்மா ஆனால் ஹர்திக் பாண்டியவை டோனிக்கு முன்னாள் களமிறங்கிவிட்டதால் இருவருக்கும் கருத்து வேறுபாடு ஏற்பட்டதாக தகவல் கசிந்தன.

 இந்த பிரச்சனையில் தான் கோலி மற்றும் அவரது மனைவி அனுஷ்கா சர்மாவின் இன்ஸ்டாகிராம் பக்கத்தை ரோகித் சர்மா அன்பலோ செய்தார் என்று கூட செய்திகள் உலா வந்தன. இது போல பல முறை இருவருக்கும் முடிவு எடுப்பதில் பல பிரச்னைகள் வந்ததுள்ளது.

 இந்த நிலையில் சமீபத்தில் நடைபெற்ற இந்தியா-இங்கிலாந்து அணிக்கு எதிரான டெஸ்ட் தொடரில் இருவரின் ஒன்றுமையை காண முடிந்தது. ஆம் மைதானத்தில் கோலி செய்யும் சேட்டைகளை பார்த்து ரசித்து சிரிப்பதும் சிலிப் பீல்டிங்கில் ரோகித் சர்மா கேட்ச் பிடித்தாலும், கோலி கேட்ச் பிடித்தாலும் இருவரும் துள்ளி குதித்து கொண்டாடுவதை ரசிகர்கள் சமூகவலைதளங்களில் பதிவிட்டு வந்தனர். 

சமீபத்தில் டி20 உலகக்கோப்பைக்கான இந்திய அணி அறிவிக்கப்பட்டது. அதில் கிட்டதட்ட நான்கு ஆண்டுகள் ஒருநாள் மற்றும் டி20 அணியில் விளையாடமல் இருந்த தமிழக வீரர் அஸ்வினை அணியில் எடுக்க சொன்னதே ரோகித் சர்மாதானம். கொரோனா தொற்று காரணமாக கடந்த முறை ஐக்கிய அரபு எமிரேட்ஸில் நடைபெற்ற் ஐபிஎல் தொடரில் டெல்லி அணிக்காக விளையாடிய அஸ்வின் சுழல்பந்து வீச்சாளராக நன்றாக விளையாடி ரன்களை கட்டுப்படுத்தினார். நான் பேட்டிங் செய்யும்போது  அவரது ஓவரை அடிக்க கடினமாக இருந்ததாக தேர்வு குழுவினரிடம் ரோகித் சர்மா கூறினாராம்.

இதனால் இந்த முறை ஐபிஎல் முடிந்த பிறகு ஐக்கிய அரபு எமிரேட்ஸில் டி20 உலகக்கோப்பை நடைபெறுவதால் அஸ்வினை எடுத்தால் இந்திய அணிக்கு மேலும் பலம் கிடைக்கும் என்றும் கடந்த காலங்களில் அஸ்வின் ஜடேஜாவும் அணிக்கு பல முறை வெற்றியை தேடி தந்துள்ளனார். இதனால் தான் சஹாலுக்கு பதிலாக அஸ்வினை எடுக்கலாம் என ரோகித் சர்மாதான் யோசனை கொடுக்க  அதற்கு கேப்டன் கோலியும்  வரவேற்பு தெரிவிக்கவே அப்படியதான்அஸ்வின் அணியில் இடம் பிடித்ததாக தகவல் வெளியாகியுள்ளது.

 இந்த நிலையில் தான் மூன்று விதமான போட்டிகளிலும் கேப்டன் பொறுப்பை வகிப்பதால், பேட்டிங்கில் கவனம் செலுத்த முடியவில்லை என்றும் பேட்டிங்கில் கூடுதல் கவனம் செலுத்தும் விதமாகவும் குறைந்த ஓவர் போட்டிக்கான கேப்டன் பதவியை துறக்க கோலி முடிவு செய்துள்ளதாகக் கூறப்படுகிறது.அவருக்குப் பதிலாக, ஐபிஎல் தொடரில், மும்பை இண்டியன்ஸ் அணியின் வெற்றிகரமான கேப்டனாகவும் இந்திய ஒரு நாள் அணியின் துணை கேப்டனாகவும் இருக்கும் ரோகித் சர்மா, புதிய கேப்டனாக பொறுப்பேற்க இருப்பதாகவும் கூறப்படுகிறது.

 டி20 உலகக் கோப்பை போட்டிக்குப் பிறகு விராத் கோலியே தனது பதவி விலகல் முடிவை அறிவிப்பார் என்றும் டெஸ்ட் மற்றும் டி20 போட்டிகளுக்கான கேப்டன் பொறுப்பில் விராத் கோலி தொடர்ந்து நீடிப்பார் என்றும் கூறப்படுகிறது. மேலும் 50ஓவர் உலக்கோப்பை தொடர் இன்னும் இரண்டு வருடங்கள் மட்டுமே உள்ளதால் கோலியின் இந்த முடிவு சரியானது தான் பலரும் கருத்து தெரிவித்து வருகின்றனர்.

அமெரிக்க விண்வெளி ஆராய்ச்சி நிலையமான நாசா செவ்வாய் கிரகத்திற்கு பெர்சவரன்ஸ் ரோவர் விண்கலத்தை  கடந்த ஆண்டு அனுப்பியது. கடந்த பிப்ரவரி மாதம் பெர்சவரன்ஸ் ரோவர் செவ்வாய் கிரகத்தின் ஜெசெரோ க்ரேடர்  என்ற இடத்தில் தரையிறங்கியது. அப்பகுதியில் கோடிக்கணக்கான ஆண்டுகளுக்கு முன் ஏரி இருந்திருக்கலாம் என்று விஞ்ஞானிகளால் நம்பப்பட்டு ஆராய்ச்சிகளை மேற்கொண்டு வந்தன.

பெர்சவரன்ஸ் கருவி செவ்வாயின் புகைப்படங்களை தொடர்ந்து பூமிக்கு அனுப்பி வந்த நிலையில் கடந்த ஆகஸ்ட் மாதம் முதல் பாறைத்துகள்களை சேகரிக்கும் பணியில் ரோவர் ஈடுபட்டது. ஆனால் முதல் முயற்சியே தோல்வியில் முடிவடைந்ததால் நாசா விஞ்ஞானிகள் ஏமாற்றம் அடைந்தனர். இருப்பினும் தொடர் முயற்சியின் பயனாக 6 சக்கரங்களை கொண்ட பெர்சவரன்ஸ் ரோவர் கருவி பாறைகளை குடைந்து மாதிரிகளை வெற்றிகரமாக சேகரித்துள்ளது. விரல் அளவுக்கு தடிமனான பாறை துகள்களை டைட்டானியம் குழாய்க்கு ரோவர் சேமித்து வைத்துள்ளது.சேகரிக்கப்பட்ட மாதிரிக்கு நாசா பெயரிட்டு ஆய்வுகளை தொடங்கியுள்ளது. இது தொடர்பாக நாசா வெளியிட்டுள்ள படங்கள் சர்வதேச விண்வெளி ஆய்வாளர்களை ஆச்சரியத்தில் ஆழ்த்தியுள்ளன. 

செவ்வாயில் சேகரிக்கப்பட்ட மாதிரிகள் அமெரிக்காவில் தெற்கு கலிபோர்னியாவில் உள்ள நாசாவின் ஆய்வகத்தில் சோதனைக்கு உட்படுத்தப்பட உள்ளது. பாறை மாதிகள் மூலம் கிடைத்துள்ள முதல்கட்ட தகவலில் செவ்வாயில் எரிமலை செயல்பாடுகள் நீர் ஆதாரம் இருந்ததற்கான தடையங்கள் கிடைத்துள்ளதாக விஞ்ஞானிகள் தெரிவித்துள்ளனர். 2 மாதிரிகள் கிடைத்துள்ள நிலையில் பெர்சவரன்ஸ் கருவி அங்கிருந்து 650 அடி தூரம் நகர்ந்து பாறை மாதிரிகளை சேகரிக்கும் பணியில் ஈடுபடுத்தப்பட்டுள்ளதாக நாசா விஞ்ஞானிகள் தெரிவித்துள்ளனர்.

மேலும் இந்த நிலத்தடி நீர் ஒரு காலத்தில் ஜெசெரோவில் இருந்த ஏரியுடன் தொடர்புடையதாக இருக்கலாம் அல்லது ஏரி வற்றிப்போன பிறகு அது பாறைகள் வழியாக பயணம் செய்திருக்கலாம் என்றும் இந்த பாறைகளை மாற்றிய நீர் மில்லியன் கணக்கான ஆண்டுகளாக இருந்ததா என்று விஞ்ஞானிகளால் இன்னும் சொல்ல முடியவில்லை என்றாலும், அந்த பகுதியில் நுண்ணிய வாழ்க்கைக்கு அதிக வரவேற்பு அளிக்கும் வகையில் அது நீண்ட காலம் இருந்தது என்று அவர்கள் உறுதியாக நம்புகிறார்கள்.