மழையால் பாதிக்கப்பட்ட பயிர்களுக்கு தமிழ்நாடு அரசு  அறிவித்த நிவாரண தொகை போதாது என்று  பாதிக்கப்பட்ட விவசாயிகள் கருத்து தெரிவித்துள்ளனர்.

நிவாரணம்:

மழையால் பாதிக்கப்பட்ட பயிர்களுக்கு ஹெக்டேர் ஒன்றுக்கு 20 ஆயிரம் ரூபாய் நிவாரணம் வழங்கப்படும் என முதலமைச்சர் மு.க.ஸ்டாலின் அறிவித்திருந்தார்.

கனமழை:

தமிழ்நாட்டில் நடப்பு ஆண்டில் கொட்டித் தீர்த்த கனமழையால் டெல்டா மாவட்டங்கள் மட்டுமன்றி பல்வேறு பகுதிகளிலும் சம்பா மற்றும் மானாவரி பயிர்கள் தண்ணீரில் மூழ்கின.  இதனால், பாதிக்கப்பட்ட விவசாயிகள் பாதிக்கப்பட்ட விளை நிலங்களை ஆய்வு செய்து உரிய நிவாரணம் வழங்க வேண்டும் என கோரிக்கை விடுத்து வந்தனர்.  இதனையடுத்து, அமைச்சர்கள் தலைமையில் முதலமைச்சர் அமைத்த குழுவினர் பயிர் சேதங்களை ஆய்வு செய்தனர். 

ஆய்வு:

இந்நிலையில், பயிர் சேதம் மற்றும் இழப்பீடு வழங்குவது குறித்து முதலமைச்சர் மு.க.ஸ்டாலின், சென்னை தலைமைச் செயலகத்தில் ஆலோசனை மேற்கொண்டார்.  அப்போது, அமைச்சர்கள் எம்.ஆர்.கே.பன்னீர் செல்வம், சக்கரபாணி, தலைமைச் செயலாளர், துறை சார்ந்த அதிகாரிகள் உள்ளிட்டோர் கலந்து கொண்டனர்.   

இழப்பீடு அறிவிப்பு:

இதனிடையே, கனமழையால் பாதிக்கப்பட்ட நெற்பயிருக்கு இழப்பீடாக 33 சதவிகிதம் மற்றும் அதற்குமேல் மகசூல் இழப்பு ஏற்பட்ட பயிர்களுக்கு ஹெக்டேர் ஒன்றுக்கு 20 ஆயிரம் ரூபாய் நிவாரணம் வழங்கப்படும் என முதலமைச்சர் மு.க.ஸ்டாலின் அறிவித்துள்ளார். 

இழப்பீட்டு தொகை:

சேதமடைந்த பயறு வகைகளுக்கு இழப்பீடாக ஹெக்டேர் ஒன்றுக்கு 3 ஆயிரம் ரூபாய் வழங்கப்படும் என்றும், உளுந்து விவசாயம் செய்ய 50 சதவிகிதம் மானியத்தில் ஒரு ஏக்கருக்கு 8 கிலோ பயறு விதைகள் வழங்கப்படும் என்றும் தெரிவிக்கப்பட்டுள்ளது. டெல்டா மாவட்டங்களில் 50 சதவிகித மானியத்தில் நெல் அறுவடை இயந்திரம் வாடகைக்கு வழங்கப்படும் என்றும் தெரிவிக்கப்பட்டுள்ளது. 

விவசாயிகள் கோரிக்கை:

திடீர் மழையால் பாதிக்கப்பட்ட பயிர்களுக்கு ஹெக்டேருக்கு 20 ஆயிரம் ரூபாய் நிவாரணம் வழங்கப்படும் என தமிழ்நாடு அரசு அறிவித்திருந்த நிலையில், இந்த தொகை மிகவும் குறைவானது என்றும், இழப்பீட்டுத் தொகையை உயர்த்தி வழங்க வேண்டும் என்றும் விவசாய சங்க ஒருங்கிணைப்புக்குழுத் தலைவர் பி.ஆர். பாண்டியன் வலியுறுத்தியுள்ளார்.  சென்னையில் செய்தியாளர்களை சந்தித்த அவர், ஏக்கர் ஒன்றுக்கு  35 ஆயிரம் ரூபாய் வழங்க வேண்டும் என வலியுறுத்தினார்.

நன்றியுடன் கோரிக்கை:

இதனிடையெ முதலமைச்சரின் அறிவிப்பை வரவேற்றுள்ள டெல்மா மாவட்ட விவசாயிகள் தமிழக முதலமைச்சருக்கு நன்றி தெரிவித்துக் கொண்டனர். மேலும், இழப்பீட்டுத் தொகையை அதிகரித்து வழங்க வேண்டும் என்றும் அவர்கள் கோரிக்கை விடுத்துள்ளனர். 

இதையும் படிக்க:   மத வெறுப்பை ஏற்படுத்தியர் உயர்நீதிமன்ற நீதிபதியா?!!

ஆன்லைன் ரம்மி விளையாட்டில் பணத்தை இழந்த இளைஞர் ஒருவர் தற்கொலை செய்துள்ள சம்பவம் பரபரப்பை கிளப்பியுள்ளது.  உயிர்ப்பலி வாங்கும் ஆன்லைன் ரம்மியை தடை செய்வதற்கான ஏற்பாடு ஒரு பக்கம் இருந்தாலும், தொடர்ந்து இவ்வாறான சம்பவங்கள் நடப்பது ஏன்? இது தொடர்பான தகவல்களை காணலாம் இந்த செய்தித் தொகுப்பில்.. 

குறுக்கு வழி:

சேலம் மாவட்டத்தைச் சேர்ந்த குணசீலன் என்ற இளைஞர் மதுரை அண்ணாநகரில் உள்ள ஓட்டல் ஒன்றில் வேலை பார்த்து வந்துள்ளார்.  குறைந்த வருமானத்தால் குடும்பம் நடத்த முடியாத குணசீலனுக்கு குறுக்கு வழியில் முன்னேற வேண்டும் என்ற ஆசையும் முளைத்துள்ளது. 

அதற்கான வழி:

இதனால் என்ன செய்யலாம் என ஆலோசனையில் இறங்கியவர், ஆன்லைன் ரம்மி விளம்பர மோகத்தில் விழுந்தார். இதையடுத்து கடந்த இரண்டு வருடங்களாக ஆன்லைன் ரம்மியில் விளையாடி வந்தவருக்கு முதல் வருடத்தில் கை மேல் பலன் கிடைத்துள்ளது. 

மீட்டாக வேண்டும்:

ஜெயித்த பணத்தை மீண்டும் அதிலேயே முதலீடு செய்து வந்த நிலையில் கடந்த 6 மாதங்களாக வருமானம் இல்லாமல் போனது.  விட்ட பணத்தை மீண்டும் பெற்றே ஆக வேண்டும் என நினைத்த குணசீலன், நண்பர்களிடத்தில் 5000, முதல் 20 ஆயிரம் வரை பணம் வாங்கியுள்ளார். 

தொடர் தோல்வி:

ஆனால் ரம்மியில் தொடர் தோல்வியையே சந்தித்தவர் லட்சக்கணக்கில் கடனில் மூழ்கி மீள முடியாத நிலைக்கு சென்றார். பின்னர் குடும்பத்தையும் கவனிக்க முடியாமல் திணறிப்போன குணசீலன் மதுரை ஓட்டலில் வேலை செய்து வந்தார். 

ஓட்டல் அறையில்:

இந்நிலையில் ஓட்டல் அறையில் யாரும் இல்லாத நேரத்தில் மனஉளைச்சலுக்கு ஆளான இவர் தூக்கு போட்டு தற்கொலை செய்து கொண்டார். ஏற்கெனவே ஆன்லைன் ரம்மியால் தற்கொலை சம்பவங்கள் அதிகரித்து வந்த நிலையில் இந்த தற்கொலை பட்டியலில் குணசீலனும் இணைந்துள்ளார்.   

தொடரும் முயற்சிகள்:

கிட்டத்தட்ட 35-க்கும் மேற்பட்டோரை காவு வாங்கிய இந்த ஆன்லைன் ரம்மியை தடை செய்ய வேண்டும் என தமிழ்நாடு அரசு எவ்வளவோ முயற்சிகளை மேற்கொண்டு வருகிறது. ஆனால் ஆன்லைன் ரம்மிக்கான தடைச் சட்டத்துக்கு ஆளுநர் ஒப்புதல் அளிக்காததாலும் தற்போது ஆன்லைன் ரம்மி தடைச் சட்டத்துக்கான மசோதாவும் காலாவதியாகி விட்டது. 

முற்றுப்புள்ளி வைக்கப்படுமா?:

உயிர்ப்பலி வாங்கும் ஆன்லைன் ரம்மிக்கு மத்திய அரசு வரியைத்தான் புகுத்துகிறதே தவிர, சாமானிய மக்களின் வலியை புரிந்து கொள்வது எப்போது? இவ்வாறான தொடர் தற்கொலைக்கு முற்றுப்புள்ளி வைப்பது எப்போது? 

இதையும் படிக்க:   துருக்கி நிலநடுக்கம்.... மூன்றாவது முறை.... உயிரிழந்தோர் எண்ணிக்கை அதிகரிப்பு!!!

இந்தியாவோட பழம்பெரும் பாடகிகள பத்தி பேசணும்னா அதுல முதன்மையா நம்ம மைன்ட்க்கு வரவங்கன்னா அது லதா மங்கேஸ்கர் தான்.  கிட்டத்தட்ட எண்பது வருஷமா இசைத்துறைல சாதிச்ச லதா மங்கேஸ்கர் கிட்டத்தட்ட 36 மொழிகள்ல பாடல்கள் பாடி இந்திய ரசிகர்கள் மனசுல நீங்காத இடம் புடிச்சு இருக்காங்க. 

வெளியாகாத முதல் பாடல்:

இந்தியாவோட nightingaleன்னு ரசிகர்கள் செல்லமா கூப்புட்ற லதா மங்கேஸ்கர் பிறந்தது மத்திய பிரதேசம் இந்தூர்ல  1929 செப்டம்பர் 29ம் தேதி.  அவரோட அப்பா மூலமா இசைய கத்துகிட்டவரு ,முதன் முதலா 1942 ல  “கிதி ஹசால்”ன்னு ஒரு மராத்திய பாடல பாடினாங்க.  

ஆனா,அந்த பாடல் வெளியாகாம கைவிடப்பட்டது.  அதற்கு பிறகு மஜ்பூர்ன்ற படம் மூலமா திரைத்துறைக்கு அறிமுகமான லதா மங்கேஸ்கர்  ஹேமந்த் குமார் கய்யாம், ரவி, சலீம் செளத்திரி,சஜ்ஜத் ஹூசைன், ரோஷன், கல்யாண்ஜி,இளையராஜா,ஏ.ஆர்.ரஹ்மான்னு இந்திய சினிமாவின் முன்னணி இசைப்பாளர்கள் எல்லார்கூடவும் வொர்க் பண்ணிருக்காங்க.

தமிழ் முதல் பாடல்:

நடிகர் திலகம் சிவாஜி கணேசன் மேல பெரும் மதிப்பு உள்ளவங்க லதா மங்கேஸ்கர்.  இன்னமும் லதா மங்கேஸ்கரோட சகோதரியான உஷா மங்கேஸ்கர் வரஞ்ச சிவாஜி கணேசனோட ஓவியம், இன்னைக்கு வர சிவாஜியோட அன்னை இல்லத்த அலங்கரிச்சுட்டு இருக்கு.  அவர் மேல உள்ள மதிப்பின் காரணமா சிவாஜி புரொடக்சன்ஸ் தயாரிப்புல தமிழ்ல பிரபு நடிச்சு  வெளிவந்த  ஆனந்த் படம் மூலமா  "ஆராரோ ஆராரோ" பாடல பாடிக் கொடுத்தாங்க அதுதான் லதா மங்கேஸ்கர் தமிழ்ல பாடுன முதல் பாடல்.

லதாவைத் தான்:

அதை  தொடர்ந்து  இளையராஜா இசையில கமல் நடிச்சு வெளிவந்த சத்யா படத்துல வர வளையோசை கல கல கல பாடல் மூலமா தமிழ்நாட்டின் பட்டிதொட்டி வரைக்கும் போயி பேசப்பட்டாங்க லதா மங்கேஷ்வர், 70ஸ் கிட்ஸ்ல இருந்து இன்னைக்கு இருக்குற 2kகிட்ஸ் வரைக்கும் அவங்க playlist இந்த பாடல் இடம் பிடிச்சிருக்கும்.  

இந்த பாட்ட வாலி எழுதும்போதே நான் லதாஜிய தான் பாட வைப்பேன்னு கண்டிசன் போட்டு தான் இசை அமைக்கவே செஞ்சாராம் இளையராஜா.   பிறகு என் ஜீவன் பாடுதுங்கிற படத்துல  எங்கிருந்தோ அழைக்கும் என் ஜீவன் ன்னு தன்னோட கடைசி தமிழ் பாடல பாடியிருந்தாங்க லதா மங்கேஸ்கர்.  

விருதுகள்:

தமிழ்ல வெறும்  மூன்றே பாடல்கள் பாடிருந்தாலும்  தமிழ் இசை  ரசிகர்கள் மனசுல நீங்காத இடம் புடிச்ச  லதா மங்கேஸ்கருக்கு, 1969ல பத்ம பூசன் விருது, 1999ல பத்ம விபூசன் ,1989 ல தாதாசாஹெப் பால்கே விருதுன்னு பல விருதுகள் கொடுத்து கெளரவிச்ச இந்திய அரசு, 2001-ம் ஆண்டு இந்தியாவோட உயரிய விருதான பாரத ரத்னா விருது கொடுத்தும் கவுரவிச்சு இருந்தது. 

கின்னஸ்:

தன் வாழ்நாள்ல திருமணமே பண்ணிக்காமா இசைக்காக தன் வாழ்க்கைய அர்ப்பணிச்ச லதா மங்கேஸ்கர் 1974லையே அதிக பாடல்கள் பாடுனதுக்கான கின்னஸ் சாதனைய படைச்சு இருந்தாங்க. அவங்களோட தொண்ணூறாவது வயசுல இந்திய அரசு இந்திய மகள்ன்ற  விருது வழங்கி சிறப்பு செஞ்சாங்க.  

உயிரிழப்பு:

தன்னோட வாழ்நாள்ல ஐம்பதாயிரம் பாடல்கள் கிட்ட பாடுனதா சொல்லப்படுற லதா மங்கேஸ்கர் கடந்த ஆண்டு ஜனவரி மாசம் கொரானா தொற்றால  பாதிக்கப்பட்டு  பிறகு சிகிச்சை பலனளிக்காம பிப்ரவரி மாசம் 6-ம் தேதி உயிரிழந்தாங்க.  அவங்களோட இறப்பு இசைத்துறைக்கு ஏற்பட்டிருக்குற மாபெரும் இழப்பா இருந்தாலும், இன்னமும் அவரோட பாடல்கள் மூலமா நம்மகிட்ட வாழ்ந்துட்டு தான் இருக்காங்க, இந்தியாவோட nightingale லதா மங்கேஸ்கர்.

இதையும் படிக்க:   இந்தியா சார்பில் வழங்கப்பட்ட 500 பேருந்துகள்.....

எடப்பாடி பழனிசாமி முன்மொழிந்துள்ள வேட்பாளரை ஏற்கிறீர்களா அல்லது மறுக்கிறீர்களா என்ற விவரத்தை சொல்லுமாறு அனைத்து பொதுக்குழு உறுப்பினர்களுக்கும் அவைத்தலைவர் உத்தரவிட்டுள்ளார்.

அதிமுக பொதுக்குழு வழக்கு :

அதிமுக கடந்த ஜூலை 11 ஆம் தேதி நடந்த பொதுக்குழு கூட்டத்திற்கு பிறகு ஈபிஎஸ், ஓபிஎஸ் என இரண்டு அணிகளாக பிரிந்தது. மேலும் இது தொடர்பான வழக்கு உச்சநீதிமன்றத்தில் விசாரணையில் உள்ளது. 

தேர்தல் ஆணையம் மறுப்பு :

இந்நிலையில் ஈரோடு கிழக்கு தொகுதிக்கு வரும் பிப்ரவரி 27 ஆம் தேதி இடைத்தேர்தல் நடத்துவதாக தேர்தல் ஆணையம் அறிவித்தது. இந்த அறிவிப்புக்கு பிறகு தமிழ்நாட்டில் அரசியல் களம் சூடுபிடித்தது. அனைத்துக் கட்சிகளும் தங்களது நிலைப்பாட்டை அறிவித்து வந்த நிலையில், அதிமுக தரப்பில் இரண்டு வேட்பாளர்களை அறிவித்தனர். இதனால் அதிமுக சின்னம் எந்த அணிக்கு என்ற குழப்பம் நிலவிய நிலையில், அதிமுக இடைக்கால பொதுச்செயலாளராக எடப்பாடி பழனிசாமி கையொப்பமிட்ட வேட்பாளர் மனுவை தேர்தல் ஆணையம் மறுத்துவிட்டது.

பொதுக்குழுவை கூட்டி வேட்பாளரை தேர்வு செய்ய வேண்டும் :

இதன்காரணமாக, ஈபிஎஸ் தரப்பு அதிமுக பொதுக்குழு வழக்கில் இடைக்கால உத்தரவு வழங்கக்கோரி உச்சநீதிமன்றத்தில் மனுதாக்கல் செய்தார். இந்த மனுவை விசாரித்த உச்சநீதிமன்ற நீதிபதிகள், ஈபிஎஸ் மற்றும் ஓபிஎஸ் தரப்பு ஆதரவாளர்கள் அனைவரையும் உள்ளடக்கிய பொதுக்குழுவை கூட்டி வேட்பாளரை தேர்வு செய்ய வேண்டும் என்று இடைக்கால உத்தரவு பிறப்பித்தது.

இதையும் படிக்க : இல்லந்தோறும் ஒலித்த குரல்...இன்று சென்னை பெசன்ட் நகரில்...!

தமிழ்மகன் உசேன் அனுப்பிய கடிதம் :

இந்த உத்தரவிற்கு பிறகு, பொதுக்குழு பொறுப்பாளராக நியமிக்கப்பட்ட அவைத்தலைவர் தமிழ்மகன் உசேன், அதிமுகவில் இருந்து நீக்கப்பட்ட ஓ.பன்னீர்செல்வம், வைத்திலிங்கம், ஜே சி டி பிரபாகர், மனோஜ் பாண்டியன் உள்பட அனைத்து பொதுக்குழு உறுப்பினர்களுக்கும் நேற்று கடிதம் அனுப்பினார். அந்த கடிதத்தில், ஈரோடு கிழக்கு தொகுதி இடைத்தேர்தலுக்காக எடப்பாடி பழனிசாமி முன்மொழிந்த வேட்பாளர் தென்னரசுவை ஏற்கிறீர்களா? அல்லது மறுக்கிறீர்களா? என்ற விவரத்தை இன்று மாலை 7 மணிக்குள்ளாக சொல்ல வேண்டும் என்று அனைத்து பொதுக்குழு உறுப்பினர்களுக்கும் அவைத்தலைவர் உத்தரவிட்டிருந்தார்.

அதிமுக பொதுக்குழு தேர்ந்தெடுக்கப்போகும் வேட்பாளர் யார் ?

இந்நிலையில், அவைத்தலைவர் அனுப்பிய கடிதம் ஓபிஎஸ்க்கும் சென்ற நிலையில், அதிமுக வேட்பாளராக தென்னரசுவை முன்மொழிந்துள்ள எடப்பாடி பழனிசாமியின் பதவி பற்றி எதுவும் கடிதத்தில் இல்லாததால் அவர் என்ன பொறுப்பில் இருக்கிறார் என ஓ.பன்னீர்செல்வம் தரப்பு கேள்வி எழுப்பியுள்ளனர்.  இதனால் அவைத்தலைவர் அனுப்பியுள்ள கடிதத்திற்கு ஓபிஎஸ் தரப்பு ஓகே சொல்லுமா? அதிமுக பொதுக்குழு தேர்ந்தெடுக்கப்போகும் வேட்பாளர் யார் ? என்ற குழப்பம் அரசியல் வட்டாரத்தில் எழுந்துள்ளது. 

19 மொழிகளில் 10 ஆயிரத்திற்கும் மேற்பட்ட பாடல்களை பாடி, தமிழர்களின் வாழ்வில் பிரிக்க முடியாத நபராக இணைந்து விட்ட வாணி ஜெயராமின் வாழ்க்கைப் பயணத்தை இப்போது பார்ப்போம்...  

தமிழர் உள்ளங்களில்:

1945-ம் ஆண்டு வேலூரில் கலைவாணி என்ற இயற்பெயரோடு பிறந்தவர் தான் வாணி ஜெயராம்.  1971-ம் ஆண்டு இந்தியில் வெளியான குட்டி படத்தில் போலே ரே பப்பி ஹரா என்ற பாடலின் மூலம் திரையுலகிற்கு அறிமுகமாகி,முதல் பாடலே அமோக வெற்றி பெற்றதைத் தொடர்ந்து இசையமைப்பாளர்களால் தேடப்படும் பாடகியாக உருவெடுத்தார்.  1974-ஆம் ஆண்டு கவிஞர் வாலி எழுத்தில் எம்.எஸ் விஸ்வநாதன் இசையில் ’ மல்லிகை என் மன்னன் மயங்கும் ‘ என்ற பாடலை பாடி தமிழர் உள்ளங்களில் நீக்கமற இடம்பிடித்தார். 

காந்த குரலால்:

ரோசாப்பூ ரவிக்கைக்காரி படத்தில் இவரது  குரலில் "என்னுள்ளே எங்கோ ஏங்கும் கீதம் ஏன் கேட்கிறது ஏன் வாட்டுது ஆனால் அதுவும் ஆனந்தம்" என்ற பாடலை கண்மூடி லயித்து கேட்கும் போது விழிகளை தாண்டும் கண்ணீரை யாராலும் தடுக்க இயலாது. 

தன் காந்த குரலால் பாடல் கேட்பவரின் உணர்வுகளை உலுக்கி சங்கமிக்கும் விந்தைகாரி தான் வாணி ஜெயராம்.  கவிதை கேளுங்கள் கருவில் பிறந்தது ராகம்..என்ற பாடல் தாளத்திற்கு ஏற்ற துள்ளல் நிறைந்ததாக அமைந்திருக்கும்.  வார்த்தை உச்சரிப்புகளில் அட்சர சுத்தம் நிறைந்திருக்கும். பாலைவனசாலை படத்தில் வரும் "மேகமே மேகமே " பாடலில் வரிக்கு வரி நெகிழ்ச்சியை உணர முடியும்.  அந்தமான் காதலியில் "நினைவாலே சிலை செய்துவைத்தேன் " என்ற பாடல் உறைந்து கிடக்கும்  அக ஊடாட்டங்களை தட்டி எழுப்பும். 

அனைத்தும்...:

இளமை ஊஞ்சலாடுகிறது என்ற படத்தில் " ஒரே நாள் உனை நான்" என்ற பாடலில் காதல்தேன் சொட்டும்.  தான் பாடும் பாடலின் வாயிலாக , ரசிகர்களின் காதுகளின் வழியாக மனதிற்குள் இறங்கி சென்று, காதல், மகிழ்ச்சி, துக்கம், ஏக்கம், குழப்பம், புத்துணர்ச்சி, காமம் ஆகியவற்றை துளியும் குறையாமல் கடத்தி தன் குரலால் என்றைக்குமே தமிழ் மக்களை ஆண்டு கொண்டிருக்கும் ஓர் பாடகிதான் வாணி ஜெயராம். 

விருதுகள்:

தலைமுறை கடந்து தன் தடம்பதித்த வாணி ஜெயராம் தேசிய விருது, பிலிம்பேர் விருது, நந்தி விருது, சிறந்த பின்னனி பாடகி விருது,பத்மபூஷண் விருது உட்பட பல்வேறு உயரிய விருதுகளை பெற்றுள்ளார். 

அதிசய பொக்கிஷம்:

திரையுலகில்  வாணி ஜெயராம் 10,000க்கும் அதிகமான பாடல்களை தமிழ், தெலுங்கு, கன்னடம் உட்பட 19 மொழிகளில் வாணி ஜெயராம் பாடல்களை பாடியுள்ளார்.  60 ஆண்டுகளை இசைக்காகவே அர்ப்பணித்து விட்ட வாணி ஜெயராம் தமிழ் சினிமா கண்டெடுத்த அதிசய பொக்கிஷம்.  தமிழ் திரையுலகில் இன்னும்  ஒலிக்க வேண்டிய குரல் தன் 78 வது  அகவையில் காற்றில் கரைந்து நிசப்தம் அடைந்திருக்கிறது.

இதையும் படிக்க:  உதவித்தொகையை நிறுத்துவதாக அறிவித்த மத்திய அரசு...கண்டனம் தெரிவித்த சிதம்பரம்!