கொலம்பியா மற்றும் வெனிசுலா இடையே மீண்டும் தூதரக உறவு

மூன்று ஆண்டுகளுக்கு முன்பு துண்டிக்கப்பட்ட உறவுகளை இரு அண்டை நாடுகளும் இயல்பு நிலைக்கு கொண்டு வருவதற்காக கொலம்பியாவின் தூதர் வெனிசுலா வந்தடைந்தார்.

கொலம்பியாவும் வெனிசுலாவும் மூன்று வருட இடைவெளிக்குப் பிறகு இராஜதந்திர உறவுகளை முழுமையாக மீட்டெடுத்துள்ளன. கொலம்பிய நாட்டின் புதிய தூதர் அர்மாண்டோ பெனெடெட்டி நேற்று வெனிசுலா தலைநகர் கராகஸ் வந்தடைந்தார்.

மீண்டும் இணைந்த நாடுகள்

வெனிசுலாவுடனான உறவுகள் ஒருபோதும் துண்டிக்கப்பட்டிருக்கக் கூடாது. நாங்கள் சகோதரர்கள், ஒரு கற்பனைக் கோடு எங்களைப் பிரிக்க முடியாது என்று புதிய தூதர் தனது ட்விட்டரில் எழுதியுள்ளார்.

பெனடெட்டியை வெனிசுலாவின் துணை வெளியுறவு அமைச்சர் ராண்டர் பெனா ராமிரெஸ் வரவேற்றார், அவர் "எங்கள் வரலாற்று உறவுகள் எங்கள் மக்களின் மகிழ்ச்சிக்காக ஒன்றிணைந்து செயல்பட எங்களை அழைக்கிறது" என்று ட்வீட் செய்துள்ளார்.

இரு தேசங்களின் தலைவர்களால் சாத்தியமான இணைப்பு

கொலம்பியாவின் புதிய இடதுசாரி குடியரசுத் தலைவர் குஸ்டாவோ பெட்ரோ மற்றும் வெனிசுலாவின் சோசலிஸ்ட் குடியரசுத் தலைவர் நிக்கோலஸ் மதுரோ ஆகியோர் ஆகஸ்ட் 11 அன்று இராஜதந்திர உறவுகளை மீட்டெடுக்க திட்டமிட்டுள்ளதாக அறிவித்தனர், கடந்த 2019 ஆம் ஆண்டு இரு நாடுகளுக்கு இடையேயான தூதரக உறவு துண்டிக்கப்பட்டது.

வெனிசுலா எதிர்க்கட்சி உறுப்பினர்கள் கொலம்பிய பிரதேசத்தில் இருந்து உணவு மற்றும் மருந்து ஏற்றப்பட்ட டிரக்குகளுடன் செல்ல முயன்றதை அடுத்து, அந்த ஆண்டின் தொடக்கத்தில் வெனிசுலா அரசு கொலம்பியாவுடனான உறவை முறித்துக் கொண்டது.

கொலம்பியாவின் முன்னாள் குடியரசுத் தலைவர் இவான் டுக், 2019 இல் மதுரோவின் மறுதேர்தலை அங்கீகரிக்கவில்லை, அதற்கு பதிலாக அவர் வெனிசுலாவின் இடைக்கால குடியரசுத் தலைவர் என்று எதிர்க்கட்சித் தலைவர் ஜுவான் குவைடோவை ஆதரித்தார்.

இணைந்து செயலாற்ற முடிவு

ஆகஸ்ட் தொடக்கத்தில் பெட்ரோ பதவியேற்றதிலிருந்து உறவுகள் சூடுபிடித்துள்ளன.கொலம்பியாவின் முதல் இடதுசாரி குடியரசுத் தலைவரான பெட்ரோ, மதுரோவை அங்கீகரிப்பதாகவும், நாடுகளுக்கு இடையே உள்ள நுண்துளைகள் நிறைந்த எல்லையில் கிளர்ச்சிக் குழுக்களுடன் சண்டையிடுவது உட்பட பல பிரச்சினைகளில் வெனிசுலா அரசாங்கத்துடன் இணைந்து பணியாற்றுவதாகவும் கூறினார்.

மதுரோ, முன்னாள் வெளியுறவு அமைச்சர் பெலிக்ஸ் பிளாசென்சியாவையும் கொலம்பியாவுக்கான தூதராக நியமித்துள்ளார்.

தூதர்களை பரிமாறிக்கொள்வதோடு, இரு நாடுகளுக்கும் இடையேயான 2,000-கிமீ எல்லையை முழுமையாக மீண்டும் திறப்பது, இராணுவ உறவுகளை மேம்படுத்துவது உள்ளிட்ட முக்கியமான முடிவுகள் எடுக்கப்பட்டுள்ளன.