இன்று இராமநாதபுரத்தில் நடக்கும் திமுக வாக்குச்சாவடி முகவர்கள் பயிற்சிக் கூட்டத்தில் முதலமைச்சர் முக ஸ்டாலின் கலந்துகொள்ள உள்ளார்.
முதலமைச்சர் மு.க.ஸ்டாலின் இன்றும், நாளையும் ராமநாதபுரம் மாவட்டத்தில் சுற்றுப்பயணம் மேற்கொள்கிறார். இதற்காக சென்னையில் இருந்து நேற்று மாலை விமானம் மூலம் மதுரை சென்றடைந்த அவருக்கு, திமுகவினர் உற்சாக வரவேற்பு அளித்தனர்.
பின்னர், தனது பயணத்தின் முதல் நிகழ்ச்சியாக, மறைந்த பின்னணி பாடகர் டி.எம். சவுந்தரராஜனின் நூற்றாண்டு விழாவையொட்டி, மதுரை மாநகராட்சி கட்டிட வளாகத்தில் நிறுவப்பட்டுள்ள டி.எம்.சவுந்தரராஜன் திருவுருவ சிலையை முதலமைச்சர் திறந்து வைத்தார். நிகழ்ச்சியில், அமைச்சர்கள் தங்கம் தென்னரசு, கே.கே.எஸ்.எஸ்.ஆர்.ராமச்சந்திரன், எ.வ.வேலு உள்ளிட்ட பலர் கலந்து கொண்டனர்.
இதன் தொடர்ச்சியாக, இன்று காலை 10 மணி அளவில் ராமநாதபுரத்திற்கு பயணம் மேற்கொள்ளும் முதலமைச்சருக்கு மாவட்ட எல்லையில் திமுகவினர் சார்பில் உற்சாக வரவேற்பு அளிக்கப்படுகிறது. மாலையில் பேராவூர் கிழக்கு கடற்கரை சாலையில் நடைபெற்ற திமுக வாக்குச்சாவடி முகவர்கள் பயிற்சி பாசறை கூட்டத்தில் முதலமைச்சர் உரையாற்றுகிறார்.
இதனைத் தொடர்ந்து, ராமேஸ்வரத்தில் நாளை நடைபெற உள்ள மீனவர்கள் மாநாட்டில் பங்கேற்று பல்வேறு நலத்திட்ட உதவிகளை வழங்க உள்ளார். இதேபோல், மண்டபம் பகுதியில் நடைபெறும் மீனவர் மாநாட்டிலும் முதலமைச்சர் மு.க.ஸ்டாலின் பங்கேற்க உள்ளார்.