புதுச்சேரியில் வைக்கப்பட்டுள்ள 55 அடி உயர அஜித் கட்டவுட்டில், ஆபத்தை உணராத அஜித் ரசிகர்கள் ஏறி நின்று பாலாபிஷேகம் செய்து ஆரவாரம் செய்தனர்.
இளைஞர்களின் கொண்டாட்டம்:
பொதுவாகவே, தீபாவளி மற்றும் பொங்கல் பண்டிகை என்றால் காலம் காலமாக புதுப்படங்களின் வரவு தான் இளைஞர்களுக்கு கொண்டாட்டமாக இருக்கும். அதிலும் குறிப்பாக அஜித், விஜய் படங்கள் என்றால் அவர்களின் ரசிகர்களுக்கு சொல்லவே வேண்டாம்.
துணிவு - வாரிசு:
அந்த வகையில் இந்த ஆண்டு பொங்கலை முன்னிட்டு அஜித் படமும், விஜய் படமும் ஒரே நேரத்தில் மோதுகிறது. அஜித் நடிப்பில் உருவாகியுள்ள துணிவு திரைப்படமும், விஜய் நடிப்பில் உருவாகியுள்ள வாரிசு திரைப்படமும் வருகிற 11 ஆம் தேதி வெளியாகவுள்ளது.
விஜய் - அஜித் பேனர்கள்:
இந்நிலையில் புதுச்சேரி நகர மற்றும் புறநகர் பகுதிகளில் உள்ள 16 திரையரங்குகளிலும் இந்த இரண்டு படங்கள் மட்டுமே வெளியாகவுள்ள நிலையில், புதுச்சேரி நகரம் மற்றும் கிராமங்களில் உள்ள நூற்றுக்கணக்கான இடங்களில் அஜித் - விஜய் ரசிகர்கள் அவர்களின் பட பேனர்களை வைத்து வருகின்றனர்.
பாலாபிஷேகம்:
இதனிடையே அஜித் ரசிகர்கள் சுதேசி மில் அருகே வைத்துள்ள 55 அடி உயர கட்டவுட்டில் ஆபத்தை உணராமல் ஆர்வமிகுதியால் அதன் உச்சிக்கு ஏறி பால் ஊற்றி அபிஷேகம் செய்து ஆரவாரம் செய்தனர்.