காவிரி விவகாரத்தில் காவிரி மேலாண்மை ஆணையம் வழங்கிய உத்தரவை அமல் படுத்த வேண்டும் என உச்சநீதிமன்றம் உத்தரவிட்டுள்ளது. 

காவிரியில் இருந்து தமிழ்நாட்டிற்கு விநாடிக்கு 24 ஆயிரம் கனஅடி நீர் திறக்க வேண்டும் என்று தமிழ்நாடு அரசு சார்பில் கோரிக்கை விடுக்கப்பட்டது. அதே நேரம், குடிநீர் தேவைக்கு மட்டுமே நீர் இருப்பு உள்ளது என்று கூறி 3 ஆயிரம் கனஅடி நீர் மட்டுமே திறக்கப்படும் என கர்நாடக அரசு பதில் மனு தாக்கல் செய்தது. 

இது தொடர்பாக காவிரி மேலாண்மை ஆணையம், விசாரணை மேற்கொண்டு, தமிழ்நாட்டிற்கு விநாடிக்கு 5 ஆயிரம் கனஅடி வீதம் அடுத்த 15 நாட்களுக்கு தண்ணீர் திறக்க வேண்டும் என கர்நாடக அரசுக்கு உத்தரவிட்டது. 

இதனை கார்நாடக அரசு ஏற்க மறுத்ததால் தமிழ்நாடு அரசு உச்சநீதிமன்றத்தில் முறையிட்டது. கர்நாடக அரசு சார்பிலும், உச்சநீதிமன்றத்தில் மனு தாக்கல் செய்யப்பட்டது. இந்நிலையில், இந்த மனுக்கள், நீதிபதிகள், பி.ஆர்.  கவாய், பி.எஸ். நரசிம்மா, பிரசாந்த் குமார் மிஸ்ரா ஆகியோர் அமர்வு முன்னிலையில் விசாரணைக்கு வந்தது. மனுவை விசாரித்த நீதிபதிகள், காவிரி மேலாண்மை ஆணையம் வழங்கிய உத்தரவை அமல்படுத்த வேண்டும் என்று உத்தரவிட்டு, இருதரப்பு மனுக்களையும் தள்ளுபடி செய்தனர்.

இது குறித்து செய்தியாளர்களிடம் பேசிய அமைச்சர் துரைமுருகன், காவிரி விவகாரத்தில் இரு மாநில பேச்சுவார்த்தைக்கே இடமில்லை என்றும், உச்சநீதிமன்ற தீர்ப்பே இறுதியானது என்றும் திட்டவட்டமாக கூறினார். 

இதையும் படிக்க || ”காவிரி விவகாரத்தில் பேச்சுவார்த்தை என்ற பேச்சிற்கே இடமில்லை” - அமைச்சர் துரைமுருகன் திட்டவட்டம்!

புதிய நாடாளுமன்றத்தில் முதல் மசோதாவா மகளிர் இடஒதுக்கீடு மசோதா தாக்கல் செய்யப்பட்ட நிலையில், நாள் முழுவதுமாக மக்களவையில் விவாதம் நடைபெற்றது.

தொடர்ந்து மக்களவையில் முதலாவதாக பேசிய நாடாளுமன்ற காங்கிரஸ் குழுத்தலைவர் சோனியாகாந்தி, மசோதாவுக்கு காங்கிரஸ் ஆதரவளிப்பதாகவும், மகளிர் இடஒதுக்கீடு மசோதா முன்னாள் பிரதமர் ராஜீவ்காந்தியின் கனவு எனவும் தெரிவித்தார். மகளிர் இடஒதுக்கீடு மசோதா சந்தோஷத்தைக் கொடுத்தாலும் சந்தேகங்களை ஏற்படுத்துவதாகவும் சாதிவாரி கணக்கெடுப்பை நடத்தி சட்டத்தை உடனடியாக அமல்படுத்த வேண்டும் எனவும் அவர் வலியுறுத்தினார்.

தொடர்ந்து பேசிய பாஜக எம்.பி நிஷிகாந்த் துபே, மகளிர் இடஒதுக்கீடு மசோதாவுக்காக காங்கிரஸ் எதையும் செய்யவில்லை என விமர்சித்த நிலையில், அடுத்து பேசவிருந்த திமுக எம்.பி கனிமொழியையும் பேசவிடாமல் தடுத்தார்.

இதுதான் பெண்களை பாஜக மதிக்கும் லட்சணம் என எதிர்கட்சிகள் விமர்சித்த நிலையில், இந்தியில் பேசினால் ஒன்றும் புரியாது எனக்கூறி கனிமொழி தனது பேச்சைத் தொடர்ந்தார்.

பெரியார், பாரதியார் கூற்றுகளை மேற்கோள் காட்டி தனது உரையைத் தொடங்கிய கனிமொழி, தொகுதி மறுவரையறைக்குப் பிறகே மகளிர் இடஒதுக்கீடு அமல் என்ற நிபந்தனை ஏன் என கேள்வியெழுப்பினார். மக்கள்தொகை அடிப்படையில் மகளிர் இடஒதுக்கீடு மசோதாவை அமல்படுத்தினால் தென்மாநில பெண் பிரதிநிதிகள் பங்கேற்பு குறையும் எனவும், தொகுதிகளின் அடிப்படையில் தற்போதைய நிலையை தொடர்ந்தால் மட்டுமே உரிய அங்கீகாரம் கிடைக்கும் எனவும் அவர் வலியுறுத்தினார்.

அனைத்து தரப்பினரும் சேர்ந்து நிறைவேற்ற வேண்டிய மகளிர் இடஒதுக்கீடு மசோதாவில் பாஜக அரசியல் செய்வது கண்டிக்கத்தக்கது எனவும் அவர் விமர்சித்தார்.

இதைத்தொடர்ந்து NCP எம்.பி சுப்ரியே சூலே பேசிய போது, வீட்டில் சமையல் செய்யுங்கள்-நாட்டை நாங்கள் பார்த்துக்கொள்கிறோம் என மகாராஷ்டிராவில் நேரலையில் நிஷிகாந்த் பேசியதை சுட்டிக்காட்டினார். தன்னை இப்படி இழிவாக விமர்சித்துவிட்டு, நாடாளுமன்றத்தில் மசோதாவை பாஜக ஆதரிப்பது ஆச்சரியமளிக்கிறது எனவும் கூறினார். 

திரிணாமுல் காங்கிரஸ் எம்.பி மஹூவா மொய்த்ரா பேசும்போது, இது போலித்தனமான வாக்குறுதியே தவிர வரலாற்றுசிறப்பு மிக்க மசோதா அல்ல என தெரிவித்தார். மக்கள்தொகை கணக்கெடுப்பு, எல்லை நிர்ணயம் என சிக்கலான இரு காரணிகளைக் கொண்டுள்ள இம்மசோதா, 2029ம் ஆண்டில் கூட அமலுக்கு வராது எனவும் அவர் ஆவேசத்துடன் விமர்சித்தார்.

மக்களவையில் மசோதா தொடர்பான விவாதத்தில் பேசிய ராகுல்காந்தி, மகளிருக்கு 33 சதவீதம் இடஒதுக்கீட்டை இன்றே வழங்க வேண்டும் என குறிப்பிட்டார். மத்திய அரசின் நிர்வாகத்தின் 90 செயலாளர்களில் 3 பேர் மட்டுமே ஓபிசி வகுப்பைச் சேர்ந்தவர்கள் எனக்கூறிய அவர், ஓபிசி இடஒதுக்கீடு இல்லாமல் மகளிர் இடஒதுக்கீடு மசோதா முழுமைபெறாது எனவும் குற்றம்சாட்டினார். அப்போது பாஜக எம்.பிக்கள் இடைமறித்து அமளியில் ஈடுபடவே, உண்மையைக் கண்டு அஞ்ச வேண்டாம் எனக்கூறி ராகுல்காந்தி பேச்சைத் தொடர்ந்தார். 

மகளிர் இடஒதுக்கீடு மசோதாவுக்கு மக்களவை கணக்கெடுப்பு தேவையில்லை எனவும் சாதிவாரி கணக்கெடுப்பை பாஜக அரசு புறக்கணிப்பது கண்டிக்கத்தக்கது எனவும் அவர் கூறினார். பளபளப்பான இந்த புதிய நாடாளுமன்றத்தில், நாட்டின் முதல் குடிமகனான பழங்குடியினத்தைச் சேர்ந்த பெண் குடியரசுத் தலைவரை பார்க்க முடியவில்லை எனவும் அவர் விமர்சித்தார்.

இதையடுத்துப் பேசிய மத்திய உள்துறை அமைச்சர் அமித்ஷா, மகளிர் இடஒதுக்கீடு மசோதாவை எதிர்க்கட்சிகள் அரசியல் விவகாரமாகவே அணுகுகின்றனர் என குறிப்பிட்டார். நீண்ட காலத்திற்கு பிறகு மகளிருக்கு நீதி கிடைத்துள்ளது எனவும் மகளிர் இட ஒதுக்கீட்டு மசோதாவின் நீண்ட பயணம் பாஜக ஆட்சியில் முழுமை பெற்றுள்ளது எனவும் அவர் கூறினார்.

தேர்தலில் வெற்றி பெறுவதற்கும், மகளிர் இட ஒதுக்கீடு மசோதாவிற்கும் எந்த சம்பந்தமும் இல்லை எனவும் அவர் குறிப்பிட்டார். ஒரு ஓ.பி.சி பிரதமரைக் கூட காங்கிரஸ் அளித்ததில்லை எனக் கூறிய அவர், பாஜக ஆட்சியில் ஓ.பி.சி வகுப்பைச் சேர்ந்த ஒருவர் பிரதமராக பதவி வகித்துள்ளார் எனவும் தெரிவித்து ராகுல்காந்தி கருத்துக்கு பதிலடி கொடுத்தார். இவ்வாறு காரசார விவாதங்களுடன் மகளிர் இடஒதுக்கீடு மசோதா நிறைவுபெற்றது.

இதனையடுத்து மக்களவையில் 33 சதவீத பெண்களுக்கு இடமளிக்கும் மசோதா ஒருமனதாக நிறைவேற்றப்பட்டது. ஆதரவாக 454 பேரும், எதிராக 2 பேரும் வாக்களித்தனர். இந்நிலையில் இந்த மசோதா மாநிலங்களவையில் வியாழக்கிழமை தாக்கல் செய்யப்படவுள்ளது குறிப்பிடத்தக்கது.

இதையும் படிக்க  | மகளிர் இட ஒதுக்கீடு மசோதா; கனிமொழியை பேசவிடாத பாஜக எம்.பி.கள்; கட்டுப்படுத்தாத சபாநாயகர்!

மக்கள்தொகை கணக்கெடுப்பு மற்றும் எல்லை நிர்ணயத்தை முறையாகச் செய்தால் மட்டுமே மகளிர் இடஒதுக்கீடு மசோதா பலனளிக்கும் என காங்கிரஸ் எம்.பி கார்த்தி சிதம்பரம் தெரிவித்துள்ளார்.

டெல்லியில் நாடாளுமன்ற வளாகத்தில் பேட்டியளித்த அவர், கொள்கை அளவில் மகளிர் இடஒதுக்கீடு மசோதாவை வரவேற்பதாக குறிப்பிட்டார்.

மக்கள்தொகை அடிப்படையில் இடஒதுக்கீடு அமல்படுத்தப்பட்டால் தென்மாநிலங்களின் பிரதிநிதித்துவம் குறையும் எனவும் எல்லை நிர்ணய விவகாரத்தை மத்திய அரசு கவனமாக அணுக வேண்டும் எனவும் அவர் தெளிவுபடுத்தினார்.

 இதையும் படிக்க  |  மகளிர் உரிமை தொகை விண்ணப்பித்தும் கிடைக்காத பெண்கள்..!

நாடாளுமன்றம் மற்றும் சட்டமன்றத்தில் மகளிருக்கு 33 சதவீதம் இட ஒதுக்கீடு வழங்கக் கூடிய மசோதா மீதான விவதத்தின் போது திமுக மக்களவை உறுப்பினர் கனிமொழியை பேச விடாமல் கூச்சலிட்டனர். 

நேற்று புதிய நாடாளுமன்ற கட்டிடத்தில் முதல் முறையாக சிறப்புக் கூட்டத்தொடர் தொடங்கியது. இதில் முதல் சட்ட மசோதாவாக சட்டமன்றம் மற்றும் நாடாளுமன்றத்தில் பெண் உறுப்பினர்களுக்கு மூன்றில் ஒரு பங்கு இட ஒதுக்கீடு அளிக்கக் கூடிய மசோதாவை மக்களவையில் மத்திய சட்டத்துறை அமைச்சர் அர்ஜீன் ராம் மேக்வாலால் அறிமுகப்படுத்தினார். தொடர்ந்து, இதுத் தொடர்பான விவாதங்கள் இன்று நடைபெறும் எனவும் அறிவிக்கப்பட்டிருந்தது.  

இந்நிலையில் இன்று காலை 11 மணிக்கு மக்களவை கூடியதும் மகளிர் இட ஒதுக்கீடு மசோதா தொடர்பான விவாதங்கள் தொடங்கின. அப்போது திமுக நாடாளுமன்ற உறுப்பினர் கனிமொழி மசோதாவை ஆதரித்து பேசத்தொடங்கினார். ஆனால் அவரை பேச விடாமல் பாஜக உறுப்பினர்கள் பலரும் தொடர்ந்து கூச்சல் எழுப்பிக் கொண்டே இருந்தனர். இதனை பார்த்த தேசியவாத காங்கிரஸ் உறுப்பினர் சுப்ரியா சூலே பாஜக உறுப்பினர்களை கட்டுப்படுத்துமாறு சபாநாயகரிடம் வேண்டுகோள் விடுத்தார்.  ஆனால் அப்போதும் அவர்களை சபாநாயகர் கட்டுப்படுத்தவோ அமரச்சொல்லாவோ  இல்லை. அப்போது திமுக மக்களவை உறுப்பினர் கனிமொழி, "நீங்கள் ஏன் கூச்சலிடுகிறீர்கள்? நீங்கள் என்ன கூச்சலிட்டலாலும் அது எனக்கு புரியப்போவதில்லை" என கூறினார். அப்போது பாஜகவினர் கூச்சலிடுவதை நிறுத்தாததால்,இந்தியா கூட்டணி மக்களைவை உறுப்பினர்கள் பலரும் இதுதான் பாஜக மகளிருக்கு அளிக்கும் மரியாதையா என கேள்வி எழுப்பினர். 

இதனையடுத்து நாடாளுமன்ற விவகாரத்துறை அமைச்சர் பிரகலாத் ஜோஷி எழுந்து பாஜக மக்களவை உறுப்பினர்களை அமைதிபடுத்தி அமரச்சொன்னார். பின்னர் திமுக எம்பி கனிமொழி நாடாளுமன்றம் மற்றும் சட்டப்பேரவையில் மகளிருக்கான மூன்றில் ஒரு பங்கு இட ஒதுக்கீட்டை ஆதரித்து பேசினார். மகளிர் இட ஒதுக்கீட்டு மசோதாவை மகளிர் ஒருவர் ஆதரித்து பேசுவதை எதிர்த்து பாஜக உறுப்பினர்கள் கூச்சலிட்டதும் அதனை சபாநாயகர் தடுக்க முயலாததும் நாடாளுமன்றத்தின் பிற உறுப்பினர்களிடையே அதிருப்தியை ஏற்படுத்தியுள்ளன.

இதையும் படிக்க: தமிழ்நாட்டின் எம்பிகளை குறைக்கும் பேராபத்து; முதலமைச்சர் ஸ்டாலின் அறிக்கை!!

காவிரி விவகாரம் தொடர்பாக கர்நாடக துணை முதலமைச்சர் டி   கே சிவகுமார் மத்திய அமைச்சர் பிரல்ஹாத் ஜோஷியை சந்தித்திப் பேசினார்.

காவிரி நீரை தமிழ்நாட்டிற்கு திறந்து விடக்கோரி, கர்நாடக அரசி, தமிழ்நாடு அரசு வலியுறுத்தி வருகின்றது. ஆனால், கோரிக்கையை மறுத்து, தண்ணீரை திறந்து விட முடியாது என மறுத்துவிட்டது.

இந்தச் சூழலில், தமிழ் நாடு நீர்வளத் துறை அமைச்சர் துரைமுருகன் தலைமையில் தமிழ்நாடு அனைத்து கட்சி எம்பி குழு டெல்லி சென்று, மத்திய நீர்வளத் துறை அமைச்சர் கஜேந்திர சிங் ஷெகாவத்தை சந்தித்து, காவிரியில் இருந்து தமிழ் நாட்டிற்கு நீரை திறந்து விட வலியுரித்தனர்.

இந்நிலையில், காவிரி விவகாரம் தொடர்பாக கர்நாடக முதலமைச்சர் சித்தராமையா  தலைமையிலான குழுவினர், இன்று டெல்லியில் முகாமிட்டு சட்ட நிபுணர்களுடன் ஆலோசனை நடத்தவுள்ளார்.

இதனிடையே, அம்மாநில துணை முதலமைச்சர்  டி  கே சிவகுமார், அமைச்சர் ஜெயசந்திரா, எம்.பிக்கள் டி.  கே.சுரேஷ், சந்திரசேகர் ஆகியோர் மத்திய அமைச்சர் பிரல்ஹாத் ஜோஷியை சந்தித்துப் பேசியுள்ளனர். 

கர்நாடகக் குழு பிரதமர் மோடியை சந்தித்து கோரிக்கை விடுக்கவும் நேரம்   கேட்டுள்ளதாக தகவல் வெளியாகியுள்ளது.

இதையும் படிக்க || நடிகா் விஷால் நோில் ஆஜராக உத்தரவு!!